শেহতীয়াকৈ বলীউডৰ অভিনেত্ৰী দীপিকা পাডুকন আৰু শ্বাহিদ কাপুৰৰ পত্নী মীৰা ৰাজপুতৰ মাতৃত্বৰ যাত্ৰাই যথেষ্ট চৰ্চা লাভ কৰিছে । মীৰা ৰাজপুতে ২১ বছৰ বয়সত মাতৃ হোৱাৰ বিপৰীতে দীপিকা পাডুকনে ৩৮ বছৰ বয়সত মাতৃ হ’বলৈ গৈ আছে । এই দুয়োটা ক্ষেত্ৰতে এটাই প্ৰশ্নৰ সৃষ্টি হৈছে যে মাতৃ হোৱাৰ উপযুক্ত বয়স কিমান ?
চিকিৎসা বিজ্ঞানৰ মতে, মাতৃ হোৱাৰ কোনো নিৰ্দিষ্ট বয়স নাই । ২০ৰ পৰা ৪০ বছৰ বয়সৰ ভিতৰত যিকোনো সময়তে মহিলাই গৰ্ভধাৰণ কৰিব পাৰে। হাংগেৰীৰ বুডাপেষ্টৰ চেমেলৱেইছ বিশ্ববিদ্যালয়ৰ গৱেষকসকলে প্ৰকাশ কৰিছে যে সন্তান জন্ম দিয়াৰ আটাইতকৈ নিৰাপদ বয়স ২৩ৰ পৰা ৩২ বছৰৰ ভিতৰত, কাৰণ সেই মাতৃৰ বয়সত কিছুমান জন্মগত বিসংগতিৰ সম্ভাৱনা খুব কম হয় । এই অধ্যয়ন BJOG: An International Journal of Obstetrics and Gynecology নামৰ আলোচনীখনত প্ৰকাশ পাইছে । ২৩ৰ পৰা ৩২ বছৰৰ ভিতৰৰ মহিলাৰ ডিম্বৰ গুণগত মান সৰ্বোত্তম আৰু গৰ্ভধাৰণৰ সম্ভাৱনাও বেছি থাকে ।
২৩ৰ পৰা ৩২ বছৰ বয়সত গৰ্ভধাৰণ কৰাটো কিয় জৰুৰী ?
- ডিম্বৰ গুণাগুণ: এই বয়সত মহিলাৰ ডিম্বৰ গুণগত মান সৰ্বোত্তম, যাৰ ফলত সুস্থ সন্তান জন্ম হোৱাৰ সম্ভাৱনা বৃদ্ধি পায় ।
- শাৰীৰিক স্বাস্থ্য: এই বয়সত মহিলাৰ শাৰীৰিক স্বাস্থ্যও উন্নত হয়, যাৰ বাবে গৰ্ভাৱস্থা আৰু প্ৰসৱ দুয়োটা সহজ হৈ পৰে ।
- মানসিক প্ৰস্তুতি: এই বয়সৰ ভিতৰত মহিলাসকলে শিশুৰ যত্ন ল’বলৈ আৰ্থিক আৰু মানসিকভাৱে সাজু হৈ উঠে ।
৩৫ বছৰৰ পিছত গৰ্ভধাৰণৰ কৰাৰ বিপদ
- ৩৫ বছৰৰ পিছত গৰ্ভপাতৰ আশংকা বৃদ্ধি পায় ।
- ক্ৰম’জমৰ অস্বাভাৱিকতা (যেনে ডাউন চিণ্ড্ৰম) হোৱাৰ সম্ভাৱনা বৃদ্ধি পায় ।
- গৰ্ভাৱস্থাৰ লগত জড়িত জটিলতা (যেনে ডায়েবেটিছ, উচ্চ ৰক্তচাপ আদি) হোৱাৰ সম্ভাৱনা বৃদ্ধি পায় ।
৩৮ বছৰত দীপিকা পাডুকনৰ গৰ্ভধাৰণ
৩৮ বছৰ বয়সত মাতৃ হ’বলৈ ওলাইছে দীপিকা পাডুকনে । যদিও, এই বয়স গৰ্ভধাৰণৰ বাবে সঠিক বয়সতকৈ অলপ বেছি, কিন্তু আজিকালি চিকিৎসা বিজ্ঞানৰ ইমানেই বিকাশ হৈছে যে উন্নত প্ৰযুক্তিৰ সহায়ত ৩৫ বছৰৰ পাচতো এটা সুস্থ সন্তান জন্ম দিব পৰা যায় ।
