চিটাৰা ডেস্ক, ৮ ছেপ্টেম্বৰ : বলীউডৰ ছুপাৰষ্টাৰ দীপিকা পাডুকন আৰু অভিনেতা স্বামী ৰণবীৰ সিং পিতৃ-মাতৃ হ’ল । দম্পতীটোৱে এটি কন্যা সন্তানৰ আশীৰ্বাদ লাভ কৰিছে । ইনষ্টাগ্ৰামত দম্পতীহালে এই খবৰ নিশ্চিত কৰি এটা পোষ্ট কৰে ৷ পোষ্টটোত লিখা আছিল, "ৱেলকাম বেবী গাৰ্ল ! ৮.০৯.২০২৪ ।"
শনিবাৰে মুম্বাইৰ গিৰগাঁও অঞ্চলৰ এইচ এন ৰিলায়েন্স হাস্পতালত দেখা গৈছিল অভিনেত্ৰীগৰাকীক । দীপিকাৰ চিকিৎসালয়লৈ যোৱাৰ পথৰ ফটো আৰু ভিডিঅ’ ছ’চিয়েল মিডিয়াত পোহৰলৈ অহাত দম্পতীটোৱে শিৰোনাম দখল কৰিছিল । প্ৰসৱৰ পূৰ্বে শুকুৰবাৰে অভিনেত্ৰীগৰাকীয়ে স্বামী আৰু পৰিয়ালৰ সৈতে মুম্বাইৰ সিদ্ধিবিনায়ক মন্দিৰ দৰ্শন কৰে ।
শনিবাৰৰ পৰা আৰম্ভ হোৱা গণেশোৎসৱৰ লগে লগে পৰিয়ালৰ লোকে প্ৰসৱৰ বাবে উপযুক্ত সময় বাছি লৈ শুভ দিনটোত কেঁচুৱাটোক আদৰণি জনায় । ২০২৪ চনৰ ফেব্ৰুৱাৰী মাহত দীপিকা আৰু ৰণবীৰে গৰ্ভধাৰণৰ কথা ঘোষণা কৰিছিল । পোষ্টটো শ্বেয়াৰ কৰি তেওঁলোকে উল্লেখ কৰিছিল, ‘ছেপ্টেম্বৰ ২০২৪’ । পোষ্টটোত শিশুৰ কাপোৰ, শিশুৰ জোতা আৰু বেলুন আছিল । শেহতীয়াকৈ দীপিকা আৰু ৰণবীৰে ইনষ্টাগ্ৰামত প্ৰসূতিৰ শ্বুট শ্বেয়াৰ কৰি গৰ্ভাৱস্থাৰ বিষয়ে চলি থকা জল্পনা-কল্পনাক অন্ত পেলাইছিল । বহুতে দীপিকাৰ বেবী বাম্পক নকল বুলি ট্ৰল কৰি আছিল ।
দীপিকাই পৰিয়ালৰ সৈতে সিদ্ধিবিনায়ক মন্দিৰ দৰ্শন কৰাৰ সময়ত বেনাৰসী শাৰী পিন্ধিছিল আৰু স্বামী ৰণবীৰৰ আগত খোজকাঢ়ি গৈছিল ৷ উল্লেখ্য যে, ২০১৮ চনৰ নৱেম্বৰ মাহত লেক কোমোত অনুষ্ঠিত হোৱা এক ব্যক্তিগত আৰু অন্তৰংগ অনুষ্ঠানত ৰণবীৰ আৰু দীপিকাই বিবাহপাশত আবদ্ধ হয় আৰু ইনষ্টাগ্ৰামত অনুৰাগীৰ সৈতে কিছুমান ছবি শ্বেয়াৰ কৰে ৷
