پٹنہ: بہار میں حکومت بدلتے ہی انفورسمنٹ ڈائریکٹوریٹ حرکت میں آگیا اور پیر کو آئی آر سی ٹی سی اراضی میں لالو پرساد سے نوکری کے معاملے میں پوچھ گچھ کرنے رابڑی دیوی کی رہائش گاہ پہنچ گیا۔ ای ڈی کی ٹیم اس سلسلے میں ایک سمن لے کر گئی اور دعویٰ کیا کہ ان کے پاس اس کیس کے بارے میں نئی لیڈز ہیں۔
آر جے ڈی سربراہ لالو پرساد یادو اور ان کی بیٹی میسا بھارتی انفورسمنٹ ڈائرکٹوریٹ کے دفتر پہنچے۔
رابڑی دیوی کی رہائش گاہ سے پٹنہ میں ای ڈی کے دفتر تک کے سفر کے دوران آر جے ڈی کے حامیوں کی ایک بڑی تعداد جمع ہوئی۔ انہوں نے لالو پرساد یادو کی حمایت میں اور مرکزی حکومت کے خلاف نعرے لگائے۔
لالو پرساد یادو کے علاوہ ان کے بیٹے اور بہار کے سابق نائب وزیراعلی تیجسوی یادو کو بھی ای ڈی نے آج طلب کیا تھا جس پر وہ ای ڈی کے دفتر حاضر ہوئے۔ اس دوران تیجسوی یادو کے ہمراہ آر جے ڈی کے کئی کارکن موجود تھے جو ای ڈی کے خلاف نعرے بازی کررہے تھے۔
مزید پڑھیں: بہار: تیجسوی یادو کی ای ڈی کے دفتر میں حاضری
واضح رہے کہ بہار میں لینڈ فار جابس معاملہ چودہ سال پرانا ہے۔ اس دوران لالو یادو ریلوے کے وزیر تھے۔ سی بی آئی کی چارج شیٹ کے مطابق ریلوے کے وزیر کے طور پر ان کے دور میں ملازمت کے بدلے زمین لی گئی تھی۔ اس معاملے میں سی بی آئی نے چھاپہ مار کر لالو خاندان اور ان کے قریبی لوگوں کے خلاف کارروائی کی تھی۔ لالو یادو کے قریبی شخص بھولا یادو کو بھی گرفتار کیا گیا۔ انفورسمنٹ ڈائرکٹوریٹ نے نئی دہلی کی ایک عدالت میں اس معاملے میں چارج شیٹ داخل کی ہے اور اس کی سماعت 9 فروری کو مقرر ہے۔
