وزیراعظم کا خاموش رہ کر ووٹ اپیل کا منفرد استعمال ہے روڈ شو: وزیراعلیٰ ڈاکٹرموہن یادو - unique use of vote appeal

کل وزیراعظم نریندر مودی بھوپال کا دورہ کرینگے، یہ ان کا پچھلے دنوں میں پانچواں دورہ ہے۔مدھیہ پردیش کے وزیر اعلیٰ ڈاکٹر موہن یادو نے آج کہا کہ وزیراعظم نریندر مودی نے روڈ شو کی شکل میں خاموش رہ کر ووٹ مانگنے کا 'منفرد'طریقہ شروع کیا ہے۔

بھوپال: مدھیہ پردیش کے وزیر اعلیٰ ڈاکٹر موہن یادو نے آج کہا کہ وزیر اعظم نریندر مودی نے روڈ شو کی شکل میں خاموش رہ کر ووٹ مانگنے کا 'منفرد' تجربہ شروع کیا ہے اور ان کے روڈ شو کا انعقاد کیا جائے گا۔ کل دارلحکومت بھوپال میں یہ شو منعقد ہونے جا رہا ہے۔

یہاں نامہ نگاروں سے بات چیت کے دوران ڈاکٹر یادو نے کہا کہ وزیر اعظم کا کل ریاست کا دورہ ہے گزشتہ چند دنوں میں ان کا یہ پانچواں دورہ ہے۔ اس کے ساتھ سب سے زیادہ ریاست کا دورہ کرنے والے وزیر اعظم کا ریکارڈ ان کے نام ہونے والا ہے۔ ان کی قیادت میں ریاست کو تقریباً 1.25 لاکھ کروڑ روپے کے تحائف ملے ہیں۔

وزیر اعلیٰ نے کہا کہ ان کے گزشتہ 100 دنوں کے دور اقتدار میں ریاست کو وزیر اعظم کے ذریعے 35 ہزار کروڑ روپے مالیت کے پاروتی کالیسند پروجیکٹ اور 45 ہزار کروڑ روپے کے کین بیتوا پروجیکٹ کا تحفہ ملا ہے۔ یہ تمام اقدامات مرکز کے لیے مدھیہ پردیش کی اہمیت کو ظاہر کرتے ہیں۔

انہوں نے کہا کہ وزیر اعظم ساگر اور ہردا میں میٹنگیں کریں گے اور بھوپال میں روڈ شو کریں گے۔ تقریباً ایک کلومیٹر کا یہ روڈ شو نیو مارکیٹ کے علاقے میں ہوگا۔

ڈاکٹر یادو نے کہا کہ وزیر اعظم نے میٹروپولیٹن شہروں میں انتخابی مہم کے لیے ایک انوکھا تجربہ کیا ہے، جس میں ہاتھ میں کمل کا پھول پکڑ کر پارٹی کا پیغام بغیر کچھ کہے عوام تک پہنچ جاتا ہے۔ ووٹ کے لیے اس خاموش اپیل کا فائدہ یہ ہے کہ ہم ان تمام مسائل سے بچ سکتے ہیں جو جلسہ عام کے انتظامات میں آتے ہیں۔ اس سلسلے میں انہوں نے کہا کہ دوسری جماعتوں کو بھی وزیراعظم کے اس تجربے سے سبق لینا چاہیے۔

یواین آئی،