گڈا (جھارکھنڈ ): ریاست جھارکھنڈ کے دیہی ترقیات کے وزیر ڈاکٹر عرفان انصاری نے مدارس کے کردار پر سوال اٹھانے والوں پر سخت حملہ کیا ہے۔ انہوں نے کہا کہ مدارس سماج کے دبے کچلے طبقے کے بچوں کو تعلیم یافتہ بنانے اور ملک و قوم کی تعمیر میں اہم خدمات انجام دے رہے ہیں۔
ریاست جھارکھنڈ کے ضلع گڈا میں واقعے رہائشی ہاسٹل کے افتتاح کے موقع پر انہوں نے کہا کہ مدارس کو شک کی نگاہ سے دیکھنے والوں کو مدارس کی تاریخ اچھی طرح پڑھ لینی چاہیے۔ انہوں نے باور کرایا کہ مدارس کے علماء نے جنگ آزادی میں بے شمار قربانیاں دی ہیں اور مدارس کے بچے اب آئی اے ایس، پی سی ایس، ڈاکٹر اور انجینئر بھی بن رہے ہیں۔
مدرسہ پہنچنے پر وہاں کے طلباء اور اساتذہ کرام نے عرفان انصاری کا والہانہ استقبال کیا۔ ساتھ ہی اس موقع پر مدینہ منورہ سے تشریف لائے مہمان شیخ ہارون ملک عبد الحق کے ہاتھوں مسجد الرحمہ کا بھی افتتاح عمل میں آیا۔ شیخ ہارون ملک عبد الحق نے یہاں ایک شاندار مسجد تعمیر کرائی ہے اور بذات خود وہ مدینہ میں ایک عظیم ادارہ چلاتے ہیں جس میں ہزاروں بچے زیر تعلیم ہیں۔ انہوں نے ہندوستان آمد پر اپنی خوشی کا اظہار کیا اور کہا کہ وہ مستقبل میں مزید فلاحی کاموں کو انجام دینے کے لیے تیار ہیں۔