نالے میں بہہ رہے تھے 500 روپے کے بہت سارے نوٹ، ٹوٹ پڑے لوگ، بھیڑ نے لاکھوں روپے لوٹے

مہاراشٹر کے سانگلی میں ایک نالے میں بہہ رہے 500 کے نوٹوں پر لوگ ٹوٹ پڑے۔ Notes Floating in Ravine

سانگلی:مہاراشٹر کے سانگلی ضلع کے آٹ پاڈی میں نالے میں بہتے نوٹوں کو لوٹنے کے لیے لوگوں کی بڑی تعداد پہنچ گئی۔ لوگوں کا جوش و خروش دیکھنے کے لائق تھا۔ دراصل امبا بائی نالے میں 500 روپے کے بہت سارے نوٹ بہہ رہے تھے۔ ان نوٹوں کو جمع کرنے کے لیے لوگوں کی بڑی بھیڑ جمع ہوگئی۔

سنیچر کو ہفتہ وار بازار گئے لوگوں نے دیکھا کہ 500 روپے کے بے شمار نوٹ نالے میں بہہ رہے ہیں۔ اس کے بعد لوگ نوٹوں کو پکڑنے کے لیے نالے میں کود پڑے۔ ایک اندازے کے مطابق لوگ نالے سے تقریباً دو سے ڈھائی لاکھ روپے نکالنے میں کامیاب رہے۔

جانکاری کے مطابق آٹ پاڈی قصبے میں سنیچر کو ہفتہ وار بازار لگتی ہے۔ یہ بازار گاؤں میں ہی امبا بائی مندر کے ساتھ واقع نالے کے پاس لگتی ہے۔ چونکہ بازار کا دن تھا، اس لیے صبح کے وقت لوگ آ جا رہے تھے۔ صبح نو بجے کے قریب بازار جانے والے کچھ لوگوں نے دیکھا کہ نالے میں نوٹ بہہ رہے ہیں۔

اس کے بعد کچھ لوگ پانی میں اتر گئے اور چیک کرنے کے بعد پایا کہ یہ نوٹ اصلی ہیں۔ 500 روپے کے نوٹ اصلی ہونے کی جانکاری علاقے میں ہوا کی طرح پھیل گئی۔ اس کے بعد لوگوں کی ایک بڑی تعداد نوٹ پانے کے لیے نالے میں کود پڑی۔

نوٹ کہاں سے آئے؟

اس دوران اطلاع ملتے ہی آٹ پاڈی پولیس بھی موقعے پر پہنچ گئی۔ پولیس نے لوگوں کو نالے سے باہر نکال کر نوٹ جمع کرنے کا کام شروع کر دیا۔ لیکن یہ نوٹ کہاں سے آئے؟ کس نے اور کیوں پھینکا؟ یہ بات ابھی تک کسی کو سمجھ میں نہیں آئی۔