ఫోన్లు ట్యాపింగ్ పై టీడీపీ తీవ్ర ఆగ్రహం- ఈసీకి ఫిర్యాదు - TDP leaders phone tapping

TDP Leaders Complained to CEO About Phone Tapping : ఆంధ్రప్రదేశ్​లో ఎన్నికల వేళ ఫోన్‌ ట్యాపింగ్‌ వ్యవహారం తీవ్ర కలకలం రేపుతోంది. ప్రతిపక్షాలకు చెందిన ముఖ్య నేతల ఫోన్లను జగన్‌ ప్రభుత్వం ట్యాపింగ్‌ చేస్తోందని విమర్శలు వ్యక్తమవుతున్నాయి. తాజాగా ఈ వ్యవహారంపై తెలుగుదేశం నేతలు ఈసీకి ఫిర్యాదు చేసారు. కొందరు ఐపీఎస్​లు ఈ తరహా అధికార దుర్వినియోగం చేస్తున్నారని ఆరోపించారు. దీనిపై కేంద్ర ఎన్నికల సంఘానికి, ఏపీ సీఈఓకి ఫిర్యాదు చేశామని నేతలు తెలిపారు. రాష్ట్ర వ్యాప్తంగా వేర్వేరు ప్రాంతాల్లో టీడీపీ నేతలపై నమోదు చేసిన కేసులు వివరాలు ఇవ్వాలని కోరినా పోలీస్​లు ఇవ్వడం లేదని ఆగ్రహం వ్యక్తం చేశారు. ఈ అంశంలో డీజీపీ పక్షపాత వైఖరితో వ్యవహరిస్తున్నారని ఆగ్రహం వ్యక్తం చేశారు. దీనిపైనా సీఈఓకు ఫిర్యాదు చేశామని నేతలు వెల్లడించారు. 

ఎన్నికల కోడ్​ను ఉల్లంఘించేలా సీఎం జగన్ ఆదేశాలు ఇస్తున్నారని మండిపడ్డారు. ఎక్కడైనా ఎన్నికల కోడ్ అమల్లోకివస్తే అవినీతి తగ్గాలి. కానీ రాష్ట్రంలో మాత్రం వైఎస్సార్సీపీ ప్రజా ప్రతినిధులు కోడ్​ను ఉల్లంఘించి అక్రమాలు చేస్తున్నారని ధ్వజమెత్తారు. అధికారులు తమకు తాము తప్పించుకునే ప్రయత్నంచేస్తున్నారని విమర్శించారు. రిటర్నింగ్ అధికారికి ఫిర్యాదు చేసినా అక్రమ ఇసుక తవ్వకాలపై పట్టించుకోవడం లేదని దుయ్యబట్టారు.