రూ.15 లక్షల వరకు లడ్డూ వేలంలో పాల్గొని - ఆపై తీన్మార్​ స్టెప్పులేసి - అంతలోనే! - Ganesh immersion in Manikonda

Software Employee Died of Heart Attack : హైదరాబాద్ నగర శివారు మణికొండలోని అల్కాపురీ కాలనీలో తీవ్ర విషాదం చోటుచేసుకుంది. అల్కాపురీ టౌన్​షిప్​లోని గణేశ్​ ఉత్సవ కమిటీ లడ్డు వేలం పాటలో పాల్గొన్న శ్యామ్​ ప్రసాద్​ అనే ఓ సాఫ్ట్‌వేర్ ఉద్యోగి మృతి చెందాడు. రూ.15 లక్షల వరకు లడ్డూ వేలం‌ పాట పాడాడు. రూ.16 లక్షలకు అదే టౌన్​షిప్​లోని మిత్రుడు సురేశ్ ఆ లడ్డూ కైవసం చేసుకున్నాడు. ఆ ఆనంద క్షణాన సురేశ్​తో కలిసి కాసేపు స్టెప్పులేశాడు. అనంతరం అక్కడి నుంచి ఇంటికెళ్లి ఒక్కసారిగా కుప్పకూలి పడిపోయాడు. కుటుంబసభ్యులు గమనించి సీపీఆర్​ చేసినా, ఫలించలేదు. చూస్తుండగానే శ్యామ్​ ప్రసాద్​ మరణించాడు.

అప్పటి వరకు గణేశుడి వద్ద లడ్డూ వేలంలో పాల్గొని, నృత్యాలు చేస్తూ ఆనందంగా గడిపిన శ్యామ్ ప్రసాద్, గుండె పోటుతో మృతి చెందడం పట్ల కాలనీ వాసులు విస్మయానికి గురయ్యారు. ఆయన కుటుంబ సభ్యులు తీవ్ర విషాదంలో మునిగిపోయారు.