ఎంచుకున్న ప్రతిరంగంలోనూ నాణ్యతే పరమావధిగా రామోజీరావు పనిచేశారు : ఈటల రాజేందర్ - BJP MP Etela Tribute to Ramoji Rao - BJP MP ETELA TRIBUTE TO RAMOJI RAO

Malkajgiri MP Etela Rajender Tribute to Ramoji Rao : రామోజీ గ్రూపు సంస్థల ఛైర్మన్, దివంగత రామోజీరావుకు మల్కాజ్‌గిరి ఎంపీ ఈటల రాజేందర్‌ నివాళులర్పించారు. ఫిల్మ్‌సిటీలోని రామోజీరావు నివాసానికి వెళ్లిన ఈటల, ఈనాడు మేనేజింగ్‌ డైరెక్టర్ సీహెచ్​ కిరణ్‌, మార్గదర్శి ఎండీ శైలజాకిరణ్, ఫిలింసిటీ ఎండీ విజయేశ్వరి సహా కుటుంబసభ్యులను పరామర్శించారు. రామోజీరావు మరణం పట్ల ప్రగాఢ సానుభూతి తెలియజేశారు. రామోజీరావు లాంటి వారు అరుదుగా ఉంటారని ఈటల అన్నారు.

ఎన్ని కష్టాలొచ్చినా ఆయన రాజీలేని పోరాటం చేశారని, ఎంచుకున్న ప్రతిరంగంలోనూ నాణ్యతే పరమావధిగా పనిచేశారని ఆయన కొనియాడారు. ఆ అక్షరయోధునితో తనకు ఉన్న పదిహేనేళ్ల ప్రత్యక్ష అనుబంధాన్ని గుర్తుచేసుకున్నారు. హైదరాబాద్​కు రామోజీ ఫిల్మ్​సిటీ యావత్​ ప్రపంచాన్నే ఆకర్షించిందని, ఆయన చూపిన మార్గాలు ఎందరికో జీవనపాఠాలన్నారు. ఆయన లేని లోటు తెలుగు ప్రజానికానికి తీర్చలేనిదని తెలిపారు. ఈటలతో పాటు రంగారెడ్డి జిల్లా బీజేపీ అధ్యక్షుడు సామ రంగారెడ్డి సహా పలువురు కార్పొరేటర్లు, కమలం పార్టీ నేతలు రామోజీరావుకు నివాళులర్పించారు.