త్వరలో అందుబాటులోకి మల్టీ లెవల్​ కార్​ పార్కింగ్​ కాంప్లెక్స్​ - విశేషాలు ఇవే! - Multi Level Car Parking Complex

Hyderabad Metro MD Visit Multi Level Car Parking Complex : హైదరాబాద్​ వాహనదారులకు శుభవార్త. నాంపల్లిలో నిర్మిస్తున్న మల్టీ లెవల్​ కారు పార్కింగ్​ కాంప్లెక్స్​ త్వరలోనే అందుబాటులోకి రానున్నట్లు హైదరాబాద్​ మెట్రో రైల్​ ఎండీ ఎన్వీఎస్​ రెడ్డి తెలిపారు. అత్యాధునిక వసతులతో నిర్మిస్తున్నామని గుర్తు చేశారు. కాంప్లెక్స్​ పనులను పరిశీలించిన ఆయన, దాని విశేషాలను తెలియజేశారు. ప్రభుత్వ ప్రైవేట్​ భాగస్వామ్యంతో సుమారు రూ.80 కోట్లు కేటాయించామని పేర్కొన్నారు.

Multi Level Car Parking Complex at Nampally : దేశంలోనే ప్రప్రథమంగా జర్మన్​ పాలిస్​ పార్కింగ్​ విధానంలో తక్కువ స్థలంలో ఎక్కువ వాహనాలు పార్కింగ్ చేసేలా ప్రాజెక్ట్​ను రూపొందిచామని హైదరాబాద్ మెట్రో రైలు ఎండీ అన్నారు. అర్ధ ఎకరంలో 15 అంతస్తులు నిర్మాణం జరిగిందన్నారు. అందులో 10 అంతస్తుల్లో వాహనాల పార్కింగ్​, మిగిలిన 5 అంతస్తుల్లో వాణిజ్య దుకాణాలు, రెండు తెరలతో ఒక సినిమా థియోటర్ ఉన్నాయని వివరించారు. పార్కింగ్​ ప్రదేశాల్లో 250 కార్లు, 200 ద్విచక్రవాహనాలు పార్క్​ చేసే అవకాశం ఉందన్నారు. ఈ కాంప్లెక్స్​ను పీపీపీ విధానంలో మెస్సర్స్ భారీ ఇన్ఫ్రా ప్రైవేటు లిమిటెడ్ కంపెనీ రూపొందించిందని వెల్లడించారు. కోవిడ్ తీవ్రత, డెట్ ఫైనాన్సింగ్ సమస్యలు, గ్లోబల్ సప్లయ్ చైన్ అంతరాయాల వల్ల ప్రాజెక్టు నిర్మాణంలో జాప్యమైందని స్పష్టం చేశారు.