పామాయిల్‌ పరిశ్రమలో అగ్నిప్రమాదం - తప్పిన ప్రాణ నష్టం - 3F Palm Oil Industry Fire Accident

Fire Accident 3F Palm Oil Industry in Nellore District : నెల్లూరు జిల్లా ముత్తుకూరు మండలం పంటపాలెం సమీపంలోని 3ఎఫ్​ పామాయిల్ పరిశ్రమలో బుధవారం రాత్రి భారీ అగ్నిప్రమాదం జరిగింది. పామాయిల్ ఫ్యాక్టరీలో బాయిలర్లలో నైట్రోజన్ ట్రాన్స్ పేలడంతో భారీగా మంటలు చెలరేగాయి. పరిశ్రమ చుట్టూ మంటలు వ్యాపించాయి. పరిశ్రమలో పని చేస్తున్న కార్మికులు భయాందోళనకు గురై బయటకు పరుగులు తీశారు. స్థానికుల సమాచారంతో అగ్నిమాపక సిబ్బందితో పాటు పోలీసులు కూడా హుటాహుటిన సంఘటన స్థలానికి చేరుకున్నారు.

పామాయిల్​ కర్మాగారం నుంచి ఎగిసి పడుతున్న మంటలను అగ్నిమాపక సిబ్బంది అదుపు చేశారు. ఈ సంఘటనలో ఎలాంటి ప్రాణ నష్టం జరగకపోవడంతో అంతా ఊపిరి పీల్చుకున్నారు. భారీ ఆస్తి నష్టం జరిగినట్లు అధికారులు ప్రాథమికంగా అంచనా వేస్తున్నారు. సంఘటనా స్థలాన్ని నెల్లూరు రూరల్ డీఎస్పీ శ్రీనివాసరావు పరిశీలించారు. ప్రమాద వివరాలను స్థానికులను అడిగి తెలుసుకున్నారు. సంఘటనకు సంబంధించిన పూర్తి వివరాలు తెలియాల్సి ఉందని డీఎస్పీ తెలిపారు.