YUVA - ఆకట్టుకుంటున్న యువతి పెయింటింగ్స్ - సందేశాలిచ్చేలా చిత్రకారిణి చిత్రాలు - Yuva on Young Artist

Story on Young Painting Artist : కుంచెలో దాగిన కంచెల్లేని ఆలోచనలను ఆవిష్కరించేది చిత్రం. అలాంటి చిత్రాలను పలు రకాలుగా ఆవిష్కరిస్తోంది ఆ యువతి. విభిన్న శైలుల మేళవింపుతో తనదైన శైలిలో చిత్రాలు గీస్తోంది. చిన్నప్పటి నుంచి ఉన్న ఆసక్తినే తన కెరీర్‌గా ఎంచుకుని ముందుకుసాగుతోంది. ఏ బొమ్మ గీసిన దానికి ప్రాణం పోయగలిగితే ఆర్టిస్ట్‌గా విజయవంతమైనట్లే అని చెబుతోంది. ఇంతకీ ఆ యువతి ఎవరు? ఏయే శైలుల్లో చిత్రాలు గీస్తోంది. ఆ వివరాలివి.

Yuva on Young Artist From Hyderabad : చిత్రం గీసినప్పుడు ఓ రకమైన ఆనందం కలిగినా దాన్ని కొన్ని రోజుల తర్వాత చూస్తే ఎనలేని సంతోషం కలుగుతుంది. చిత్రం పలికించే మాటలు అప్పటికి మూగవైనా కూడా తర్వాత తోటివారితో పాటు ప్రేక్షకులు వాటిని బాగున్నాయంటూ మెచ్చుకుంటుంటే ఆ భావన మనసుకు హాయితో పాటు కళకు ప్రోత్సాహాన్నిస్తుంది. అలాంటి ప్రోత్సాహం తన మిత్రులతో పాటు కళాశాల తనకిస్తుందని చెబుతోంది ఈ యువతి. చిత్రం వేసే ప్రాసెస్‌ను ఎంజాయ్ చేస్తే చిత్రం వాస్తవికతకు దగ్గరగా వస్తుందంటోంది.

అందంగా బొమ్మలేస్తున్న ఈ యువతి పేరు వీఎస్‌ అరుణ శ్రీ. హైదరాబాద్ గౌతం నగర్‌లో స్థిర నివాసం. స్థానిక శాంతినికేతన్ పాఠశాలలో పదో తరగతి పూర్తి చేసింది. తర్వాత ఇంటర్ పూర్తి చేసి, ప్రస్తుతం మాదాపూర్‌లోని వెంకటేశ్వర ఫైన్ ఆర్ట్స్‌ కాలేజీలో రెండో సంవత్సరం చదువుతోంది. చిన్నప్పటి నుంచి ఉన్న తన ఆసక్తికి తల్లిదండ్రుల ప్రోత్సాహం తోడవడం, కరోనా ఖాళీ సమయంలో తనలోని ప్రతిభకు మెరుగులు దిద్దుకునే ప్రయత్నం చేయడంతో ఇలా చిత్రాలు వేయగలుగుతున్నాను అని చెబుతోంది.

గ్రీకు పురాతన కథను ప్రతిబింబించేలా :చిత్రాల్లో పలు శైలిలు ఉంటాయి. అక్రాలిక్, వాటర్ స్కెచ్, 2డీ ఇలా పలు రకాలు ఉంటాయని చెబుతోంది అరుణ శ్రీ. వీటన్నింటిని గురించి ఫైన్‌ ఆర్ట్స్ చదువుతుండడంతో తనకు తెలిసిందంటోంది. అన్నింటిపై అవగాహన ఉండడం, ఒకదాంట్లో నిష్ణాతులై ఉండడం ఉత్తమమనే విషయాన్ని బలంగా నమ్ముతానని చెబుతోందీ చిత్రకారిణి. తన చిత్రాలన్నింటికీ తన తండ్రే మొదటి ప్రేక్షకుడని, ఎలాంటి తప్పు ఉన్న ఇట్టే పసిగట్టి వాటిని సరిచేసేందుకు సూచనలిస్తారని చెబుతోంది. తాను వేస్తున్న డిఫరెంట్ స్టైల్స్ గురించి ఇలా వివరిస్తోంది.

చిత్రం వేస్తుంటే అందులో కళ్లకు అత్యంత ప్రాధాన్యత ఇస్తే చిత్రంలో కళ ఉట్టిపడుతుందని చెబుతోంది అరుణ శ్రీ. తాను గీస్తున్న చిత్రాల్లో పురాణ పాత్రలకు ప్రాధాన్యత ఇస్తోంది. అందుకు తనకు చరిత్రతో పాటు మైథాలజీ గురించి తెలుసుకోవాలనే ఆసక్తే ప్రధానంగా ఉందని చెబుతోంది. కళలు సమాజాన్ని మార్చేవి కావు, సమాజాన్ని ప్రతిబింబిచేవి అంటాడు ప్రముఖ రచయిత త్రివిక్రమ్. అలానే ఇటీవల మహిళలపై జరుగుతున్న దాడులకు చలించి, ఈ చిత్రకారిణి గ్రీకు పురాతన కథను ప్రతిబింబించే చిత్రం గీస్తోంది.

'ఐదో తరగతిలోనే నాకు పెయింటింగ్స్​పై ఆసక్తి పెరిగింది. స్కూల్​లో డ్రాయింగ్​ టీచర్​ పెయింటింగ్స్ చూసి నాకు చాలా ఆసక్తి పెరిగింది. వివిధ రకాల పెయింటింగ్స్ చూసి చిన్నచిన్నగా చిత్రాలు వేశాను. కరోనా సమయంలోనే నేను చాలా నేర్చుకున్నా'- వీఎస్‌ అరుణ శ్రీ, యువ చిత్రకారిణి

కాలేజీ తరుఫున పలు చిత్రాలతో ప్రదర్శన : సమాజంలో ఈ తారతమ్యాలు, వస్త్రధారణే దాడులకు కారణం కాదని చెబుతోంది. ఆ చిత్రం వెనుకున్న కథను ఇలా వివరిస్తోంది. అరుణ శ్రీ ప్రతిభతో తాను చదువుతున్న కళాశాల నుంచి పలు అవార్డులు, ప్రశంసాపత్రాలు సైతం అందుకుంది. తన చిత్రకళ పలువురికి తెలిసేలా కాలేజీతో కలిసి పలు ప్రదేశాల్లో ఇప్పటికే తను ఆర్ట్‌ ఎగ్జిబిషన్ నిర్వహించింది. కాలేజీ తరఫున పలు చిత్రాలు ప్రదర్శనలో ఉంచింది. ప్రతీవారం ఇచ్చే అసైన్‌మెంట్స్‌ వల్లే తనలో గతం కంటే ఇప్పటికీ తాను చాలా మెరుగయ్యానని చెబుతోంది.

తన గదిని సైతం మొత్తం కళారూపాలతో నింపేసింది. అయితే అరుణ శ్రీ తన భవిష్యత్‌ కోసం ఏం చేసినా తనను ప్రోత్సహిస్తామని చెబుతున్నారు ఆమె తల్లిదండ్రులు. విభిన్న రకాల చిత్రలేఖనాల గురించి తెలుసుకోవడం తనకు ఇష్టమని చెబుతోంది. ఇప్పుడు కష్టపడితేనే ఎంతైనా నేర్చుకోవచ్చని చెబుతోంది. తన భవిష్యత్‌ లక్ష్యం గురించి ఇలా వివరిస్తోంది. ప్రతిభకు అవార్డులు, ప్రశంసా పత్రాలు కాదు, చిత్రాన్ని చూసిన తర్వాత కళాకారుడి హృదయం ప్రేక్షకుడికి అర్థమయితే అదే అవార్డులతో సమానమంటోందీ చిత్రకారిణి.