YSRCP Leaders Filed Petition In AP HC for Bail :ఆంధ్రప్రదేశ్లోనిమంగళగిరిలో ఉన్న తెలుగుదేశం పార్టీ కార్యాలయంపై దాడి చేసి విధ్వంసం సృష్టించిన కేసులో వైఎస్సార్సీపీ సీనియర్ నేతలు అరెస్టు భయంతో ముందుస్తు బెయిల్ కోసం ఏపీ హైకోర్టుకు క్యూ కడుతున్నారు. వైఎస్సార్సీపీ ప్రభుత్వ మాజీ సలహాదారు సజ్జల రామకృష్ణారెడ్డి, మాజీ ఎమ్మెల్యే ఆళ్ల రామకృష్ణారెడ్డి బెయిల్ కోసం హైకోర్టులో పిటిషన్లు దాఖలు చేశారు. ఈ వ్యాజ్యాలపై ఇవాళ హైకోర్టు విచారణ జరపనుంది.
Hearing Of Suits In AP High Court :మరోవైపు ఇదే కేసులో ముందస్తు బెయిల్ కోసం వైఎస్సార్సీపీ ఎమ్మెల్సీలు లేళ్ల అప్పిరెడ్డి, తలశిల రఘురాం, వైఎస్సార్సీపీ నేత దేవినేని అవినాశ్ దాఖలు చేసిన వ్యాజ్యాలు హైకోర్టులో బుధవారం (జులై 10న) విచారణకు వచ్చాయి. విచారణను గురువారానికి వాయిదా వేయాలని పోలీసుల తరఫు న్యాయవాది కోర్టును కోరారు.
ఈ కేసులో మరో ఇద్దరు తాజాగా పిటిషన్లు వేశారని, ప్రస్తుత వ్యాజ్యాలను వాటితో కలిపి విచారణ చేయాలని పిటిషనర్ల తరఫు న్యాయవాది కోరారు. అందుకు అంగీకరించిన న్యాయమూర్తి విచారణను ఇవాళ్టికి వాయిదా వేశారు. మరోవైపు సీఎం చంద్రబాబు ఇంటిపై దాడి చేసిన కేసులో ముందస్తు బెయిల్ కోసం మాజీ మంత్రి జోగి రమేశ్ దాఖలు చేసిన పిటిషన్ కూడా నేటికి వాయిదా పడింది.