స్థిర వడ్డీ రేటుతో హోమ్ లోన్ తీసుకుంటున్నారా? లాభనష్టాలివే! - Home Loan At Fixed Interest Rate

Home Loan At Fixed Interest Rate : మీరు బ్యాంక్‌ నుంచి హోమ్ లోన్ తీసుకుందామని అనుకుంటున్నారా? అయితే ఇది మీ కోసమే. మీరు కనుక స్థిర వడ్డీ రేటులో గృహ రుణం తీసుకుంటే, కలిగే లాభనష్టాలు గురించి ఈ ఆర్టికల్‌లో తెలుసుకుందాం.

Home Loan At Fixed Interest Rate : సొంతిల్లు అనేది చాలా మందికి ఉండే ఒక గొప్ప కల. అందుకే ఇల్లు కొనుగోలు చేయాలని నిర్ణయించుకున్న తర్వాత, చాలా మంది బ్యాంకుల నుంచి లోన్‌ తీసుకోవడానికి మొగ్గు చూపుతుంటారు. లోన్‌ ఇచ్చే సమయంలో బ్యాంకులు రెండు రకాల ఇంట్రస్ట్‌ రేటు ఆప్షన్స్ ఇస్తాయి. అవి: స్థిర వడ్డీ రేటు, ఫ్లోటింగ్‌ వడ్డీ రేటు. ఈ ఆర్టికల్‌లో మనం స్థిర వడ్డీ రేటు ఎంచుకోవడం వల్ల కలిగే లాభ, నష్టాల గురించి తెలుసుకుందాం.

తక్కువ వడ్డీకి రుణం
మంచి క్రెడిట్‌ స్కోర్‌, స్థిరమైన ఆదాయం కలిగి ఉండి, గతంలో చెల్లింపులు సక్రమంగా చేసి ఉంటే, బ్యాంకులు తక్కువ (స్థిర) వడ్డీ రేటుకు లోన్‌ అందించే అవకాశం ఉంటుంది.

లాభాలు
స్థిర వడ్డీ రేటుతో హోమ్ లోన్‌ తీసుకుంటే, రుణ కాలవ్యవధిలో ఈఎంఐ మారకుండా ఒకే విధంగా ఉంటుంది. కనుక భవిష్యత్‌ ఈఎంఐలను ముందుగానే సులభంగా ప్లాన్‌ చేసుకోవచ్చు. విలువ స్థిరంగా ఉన్నందు వల్ల నెలవారీ బడ్జెట్‌ను చక్కగా వేసుకోవచ్చు. ద్రవ్యోల్బణం, ఆర్థిక మాంద్యం లాంటి పరిస్థితులతో సంబంధం లేకుండా మీ ఇంటి రుణ వడ్డీ అలాగే ఉంటుంది. కాబట్టి వడ్డీ రేటును తరచూ పర్యవేక్షించాల్సిన అవసరం ఉండదు. కనుక ఈఎంఐ పేమెంట్స్‌ను ఆటోమేట్‌ చేయొచ్చు.

నష్టాలు
కొన్ని సందర్భాల్లో ప్రభుత్వం కీలక వడ్డీ రేట్లు తగ్గిస్తూ ఉంటుంది. కనుక ఇలాంటి సందర్భాల్లో స్థిర వడ్డీ రేటు ఎంచుకున్న వారు నష్టపోతారు. ఇది కొంత వరకు ప్రతికూల విషయమే. స్థిర వడ్డీ రేటుకు సంబంధించిన మరొక ప్రతికూలత ఏంటంటే, ఒక పరిమితి మేరకు మాత్రమే ఇది స్థిరంగా ఉంటుంది. కనుక బ్యాంక్‌ లోన్‌ తీసుకునేటప్పుడే నియమ, నిబంధనలను జాగ్రత్తగా చదివి అర్థం చేసుకోవడం మంచిది. మీరు హోమ్ లోన్‌ను గడువుకు ముందే పూర్తిగా తీర్చేయాలని అనుకుంటే, ముందస్తు చెల్లింపు/ఫోర్‌క్లోజర్‌ ఛార్జీలు కట్టాల్సి ఉంటుంది.

చివరిగా : హోమ్ లోన్ స్థిర వడ్డీ రేటు వల్ల లాభనష్టాలు రెండూ ఉంటాయి. మీ వ్యక్తిగత స్థితిగతులు, ఆర్థిక పరిస్థితులను అనుసరించి, తగిన నిర్ణయం తీసుకోవాలి. అవసరమైతే మీ వ్యక్తిగత ఆర్థిక నిపుణులను సంప్రదించడం మంచిది.