'త్వరలో టీడీపీలో చేరతా' చంద్రబాబును కలిసిన తీగల కృష్ణారెడ్డి - Teegala krishna Reddy Join In TDP

హైదరాబాద్‌లో ఏపీ సీఎం చంద్రబాబును ఆయన నివాసంలో కలిసిన తీగల కృష్ణారెడ్డి, మాజీ మంత్రి మల్లారెడ్డి - త్వరలో టీడీపీలో చేరతానని పార్టీకి మళ్లీ పూర్వ వైభవం తీసుకొస్తామని తీగల ప్రకటన

TG Ex MLA Teegala krishna Reddy Join In TDP : త్వరలో టీడీపీలో చేరతానని మాజీ ఎమ్మెల్యే తీగల కృష్ణారెడ్డి తెలిపారు. పార్టీకి మళ్లీ పూర్వ వైభవం తీసుకొస్తామని చెప్పారు. హైదరాబాద్‌లో టీడీపీ అధినేత, ఏపీ సీఎం చంద్రబాబును ఆయన నివాసంలో తీగల కలిశారు. అనంతరం మీడియాతో ఆయన మాట్లాడారు. చంద్రబాబు, టీడీపీ వల్లే హైదరాబాద్‌ అభివృద్ధి జరిగిందన్నారు. తెలంగాణలో టీడీపీ అభిమానులు చాలా మంది ఉన్నారని చెప్పారు. ఏపీ సీఎం చంద్రబాబును మాజీ మంత్రి మల్లారెడ్డి, ఆయన అల్లుడు, ఎమ్మెల్యే రాజశేఖర్‌రెడ్డి కలిశారు. తన మనవరాలి వివాహానికి చంద్రబాబును ఆహ్వానించినట్లు మల్లారెడ్డి తెలిపారు. అయితే మీడియాతో మాట్లాడేందుకు మల్లారెడ్డి నిరాకరించారు.

"తెలంగాణలో టీడీపీ పూర్వ వైభవానికి తీసుకు వచ్చేందుకు చంద్రబాబు ప్రయత్నాల్లో ఉన్నారు. ఆంద్రప్రదేశ్​లో మళ్లీ చంద్రబాబు సీఎం కావడం సంతోషకరమైన విషయం. హైదరాబాద్ అభివృద్దికి బాబు ఎంతగానో కృషి చేసారు. హైదరబాద్​ ఐటీ రంగం ఆయన వల్లే అభివృద్ది చెందింది. తెలంగాణలో నేడు పాలన ఎలా ఉందో అందరికీ తెలుసు. పూర్వ వైభవాన్ని మళ్లీ తెలంగాణలో తీసుకొస్తాం. టీడీపీ అభిమానులు తెలంగాణలో చాలామంది ఉన్నారు."-తీగల కృష్ణారెడ్డి, మాజీ ఎమ్మెల్యే

చంద్రబాబుకు ఆహ్వాన పత్రిక అందజేసిన మల్లారెడ్డి (ETV Bharat)

మల్లారెడ్డి మనవరాలు వివాహ ఆహ్వాన పత్రిక : మల్లారెడ్డి మనవరాలు, మల్కాజ్​గిరి ఎమ్మెల్యే మర్రి రాజశేఖర్ రెడ్డి కూతురి వివాహం నేపథ్యంలో ప్రముఖులను కలిసి మల్లారెడ్డి ఆహ్వాన పత్రిక అందజేస్తున్నారు. అందులో భాగంగా నేడు ఏపీ సీఎం చంద్రబాబునాయుడును కలిసి ఆహ్వాన పత్రిక అందజేశారు. ఆదివారం తెలంగాణ డిప్యూటీ సీఎం భట్టి విక్రమార్కను కలిసి తన మనవరాలు శ్రేయరెడ్డి వివాహానికి రావాలని ఆహ్వానించారు. మంత్రి పొన్నం ప్రభాకర్​ను సైతం కలిసి మనవరాలి వివాహానికి ఆహ్వానించారు. ఇటీవలె మల్లారెడ్డి మాజీ సీఎం కేసీఆర్​ను కలిసి ఆహ్వానపత్రిక అందించి వివాహానికి రావాలని ఆహ్వానించారు. ఇటీవలే మాజీ మంత్రి హరీశ్ రావు, కేటీఆర్​ను వీరు కలిసి వివాహ ఆహ్వాన పత్రిక అందించారు. అయితే త్వరలో సీఎం రేవంత్ రెడ్డిని కలసి మల్లారెడ్డి ఆహ్వాన పత్రిక అందిస్తారని ప్రచారంసాగుతోంది.