How Storms Are Named : ఏపీకి మరో ముప్పు ముంచుకొస్తుంది. బంగాళాఖాతంలో ఏర్పడిన వాయుగుండం క్రమంగా తుపానుగా మారనుంది. విశాఖకు ఆగ్నేయంగా దక్షిణ కోస్తా మీదుగా కదులుతున్న తుపాను కారణంగా రానున్న రెండ్రోజుల్లో ఓ మోస్తారు నుంచి భారీ వర్షాలు పడే అవకాశముందని ఐఎండీ పేర్కొంది. మంగళవారం నుంచే సముద్ర అలల తీవ్రత ఎక్కువగా ఉంటుందని, భోగాపురం, పూసపాటిరేగ మండలాల తీరప్రాంత మత్స్యకారులు చేపల వేటకు వెళ్లొద్దని, ఒడ్డునున్న పడవలను తక్షణమే వెనక్కి తీసుకురావాలని మత్స్యశాఖ డీడీ నిర్మలాకుమారి సూచించారు.
తీర ప్రాంతాల్లో గంటకు 40 నుంచి 50 కి.మీ వేగంతో గాలులు వీస్తాయని అలర్ట్స్ జారీ చేసారు. మంగళవారం సాయంత్రం కోస్టల్ ప్రాంతాల్లో రెడ్‌ అలర్ట్ ప్రకటించనున్నామని, ఇప్పటికే మత్స్యకారులకు మెరైన్, మత్స్యశాఖ ద్వారా సమాచారం చేరవేశామని తెలియజేశారు. ఈ క్రమంలోనే తుపానులకు ప్రత్యేకమైన పేర్లను ఎలా సూచిస్తారు? ఇంతకీ వాటిని ఆమోదించేది ఎవరు? అనే సందేహం మీకెప్పుడైనా వచ్చిందా! ఐతే వాటన్నింటికీ సమాధానం ఈ స్టోరీలో మీకోసమే! తుపానులకు పేర్లు పెట్టే విధానం చాలా ఆసక్తికరమైనది. ప్రపంచంలోని వివిధ ప్రాంతాల్లో ఈ పేరు పెట్టే విధానం కొద్దిగా మారుతుంది. కనీసం 61 కి.మీ. వేగం గాలులతో కూడిన సైక్లోన్ సంభవించినప్పుడే పేర్లు పెట్టడం సంప్రదాయంగా వస్తోంది.
ఎందుకు పేర్లు పెడతారు ?
- గుర్తింపు : వేర్వేరు తుపానులను సులభంగా గుర్తించడానికి.
- ప్రజలకు హెచ్చరిక : తుపాను గురించి సమాచారం వేగంగా ప్రసారం చేయడానికి.
- సమాచార మార్పిడి : శాస్త్రవేత్తలు, వాతావరణ శాస్త్రవేత్తలు తుపాను గురించి సమాచారాన్ని సులభంగా మార్పిడి చేసుకోవడానికి.
పేర్లు ఎలా ఎంచుకుంటారు ?
- ప్రత్యేకమైన పేర్లు : ప్రతి తుపానుకు ప్రత్యేకమైన పేరు ఇస్తారు.
- పేర్ల జాబితా : ముందుగానే తయారు చేసిన పేర్ల జాబితా నుంచి పేర్లు ఎంచుకుంటారు.
- వర్ణమాల క్రమం : సాధారణంగా వర్ణమాల క్రమంలో పేర్లు ఎంచుకుంటారు.
- పునరావృతం కావు : ఒకసారి ఉపయోగించిన పేరును మళ్లీ ఉపయోగించరు.
- ప్రాంతాల వారీగా పేర్లు : వివిధ ప్రాంతాల్లో వివిధ భాషలలో పేర్లు ఉపయోగిస్తారు. ఉదాహరణకు, అట్లాంటిక్ మహాసముద్రంలో పుట్టే తుపానులకు మానవ పేర్లు ఉంటాయి, అయితే పసిఫిక్ మహాసముద్రంలో పుట్టే సైక్లోన్లకు ప్రకృతి దృశ్యాల పేర్లు ఉంటాయి.