ప్లమ్​ కేక్​లో రమ్!​ - ఫుడ్​ సేఫ్టీ అధికారుల తనిఖీల్లో బయటపడ్డ బాగోతం

గత కొద్ది రోజులుగా రాష్ట్రంలో ఫుడ్​ సేఫ్టీ అధికారుల దాడులు - ఎక్సైజ్​ శాఖ అనుమతి లేకుండా ప్లమ్ కేకులో రమ్​ కలిపి తయారు చేస్తున్న నిర్వాహకులు

Plum Cake Making with Alcohal : గత కొన్ని రోజులుగా తెలంగాణ రాష్ట్రంలో ఫుడ్‌ సేఫ్టీ అధికారుల మెరుపు దాడులు కొనసాగుతున్నాయి. తాజాగా సికింద్రాబాద్, అల్వాల్ పరిధిలోని పలు బేకరీ షాపుల్లో ఫుడ్ సేఫ్టీ అధికారులు ఆకస్మిక తనిఖీలు నిర్వహించారు. ఈ దాడుల్లో విస్తుపోయే నిజాలు వెలుగు చూశాయి. సికింద్రాబాద్ ఖార్ఖానాలోని వ్యాక్స్ ప్యాట్రీస్ బేకరిలో ఎక్సైజ్ శాఖ నుంచి అనుమతి లేకుండా ప్లమ్​ కేక్‌లను తయారు చేయడానికి ఆల్కహాల్ (రమ్) ఉపయోగిస్తున్నట్లు అధికారులు గుర్తించారు. దీంతో వెంటనే ఫుడ్​ సేఫ్టీ అధికారులు నోటీసులు జారీ చేశారు.

కిచెన్​ అపరిశుభ్రం : అంతే కాకుండా కేక్ తయారీలో ఉపయోగించే పాత్రలు వంటగది మొత్తం అపరిశుభ్రంగా ఉన్నట్లు అధికారులు తెలిపారు. ఫుడ్​ సేఫ్టీ స్టాండర్డ్స్​ అథారిటీ ఆఫ్​ ఇండియా (ఎఫ్ఎస్ఎస్ఏఐ) లైసెన్స్ నిబంధనలు ఉల్లంగించినట్లు తెలిపారు. కెమికల్స్, నాన్ వెజ్ ఫుడ్ ఆర్టికల్స్ వంటి వస్తువులతో పాటు ఇతర సామాగ్రి అన్ని ఒకే చోట ఉన్నట్లు గుర్తించారు.

ఎలుకల, బోద్దింకలు :మరోవైపు అల్వాల్ ప్రాంతంలోని మరో బేకరి షాపులో తనిఖీ నిర్వహించిన ఆహార భద్రత అధికారులు నిబంధనలు అతిక్రమించినట్లు గుర్తించారు. కేక్‌ల తయారీలో ఉపయోగించే అచ్చు పాత్రలు చాలా అపరిశుభ్రంగా ఉండటం పట్ల ఆగ్రహం వ్యక్తం చేశారు. కేక్​ను తయారు చేసే కిచెన్​లో ఎలుకలు, బోద్దింకలు ఉన్నట్లు గుర్తించారు. ఇది అధికారులను సైతం ఆశ్చర్యపరిచింది.