ప్రయాణికుల భద్రతపై టీజీఆర్టీసీ కీలక నిర్ణయం- ఏంటంటే? - TGRTC Key Decision

TGRTC Focus on Passengers Safety : మహాలక్ష్మి పథకం- మహిళలకు ఉచిత బస్సు ప్రయాణం అందుబాటులోకి వచ్చిన తర్వాత భారీ సంఖ్యలో మహిళలు బస్సుల్లో ప్రయాణిస్తున్నారు. దీంతో బస్సులు కిటకిటలాడిపోతున్నాయి. హైదరాబాద్ మహానగరంలో సిటీ బస్సుల్లో ప్రయాణించే మహిళల సంఖ్య కూడా భారీగానే ఉంటుంది. పురుష, మహిళ ప్రయాణికులందరూ ఒకే ద్వారం నుంచి ఎక్కువ సంఖ్యలో ఎక్కడం, దిగడం వల్ల ఇటీవలి కాలంలో ప్రమాదాలు చోటుచేసుకున్నాయి. దీంతో గ్రేటర్ ఆర్టీసీ అధికారులు కీలక నిర్ణయం తీసుకున్నారు. ఇంతకీ ఆర్టీసీ తీసుకున్న ఆ నిర్ణయం ఏంటీ? ఆ వివరాలు తెలుసుకుందాం.

Mahalakshmi Scheme in Telangana :మహాలక్ష్మి పథకంతో, మహిళల ఉచిత బస్సు ప్రయాణానికి అనూహ్య స్పందన లభిస్తుంది. రాష్ట్రవ్యాప్తంగా ఇప్పటి వరకు సుమారు 40 కోట్ల మంది మహిళలు ఉచిత బస్సు ప్రయాణం చేసినట్లు అర్టీసీ అధికారులు అంచనా వేస్తున్నారు. సుమారు రూ.1,800 కోట్ల రూపాయలను మహిళలు ఆదా చేసుకున్నట్లు ఆర్టీసీ అధికారులు పేర్కొంటున్నారు. జిల్లాల్లో తిరిగే బస్సులకు ఒకే డోర్ ఉంటుంది. కానీ, గ్రేటర్ హైదరాబాద్‌లోని సిటీ బస్సుల్లో రెండు డోర్లు ఉంటాయి.

ముందు భాగం నుంచి మహిళలు, వెనక భాగం నుంచి పురుషులు ఎక్కుతుంటారు, దిగుతుంటారు. కానీ, మహాలక్ష్మి పథకం ఉచిత ఆర్టీసీ ప్రయాణంతో మహిళల సంఖ్య భారీగా ఉంటుంది. దీంతో బస్సుల్లో ఎక్కే ప్రయాణికుల్లో సింహభాగం మహిళలే ఉంటున్నారు. ముందు ద్వారం, వెనక ద్వారం రెండింటి నుంచి మహిళలు ఎక్కడం, దిగడం వల్ల పురుష ప్రయాణికులకు ఇబ్బందికరంగా మారింది. పైగా టిక్కెట్ కొనుక్కుని ప్రయాణిస్తున్న తమకు, దిగే అవకాశం లేదని ఆందోళన వ్యక్తంచేస్తున్నారు.

దీంతో పాటు కొన్నిసార్లు ప్రమాదాలు కూడా జరిగినట్లు డ్రైవర్లు, కండక్టర్లు పేర్కొంటున్నారు. మహిళలకు, పురుషులకు ఎవ్వరికి ఇబ్బందులు కలగకుండా గ్రేటర్ ఆర్టీసీ అధికారులు కీలక నిర్ణయం తీసుకున్నారు. ముందు ద్వారం వద్ద మహిళల ఫోటో, వెనక ద్వారాల వద్ద పురుషుల ఫోటోతో పెయింట్ వేశారు. ఎవరికి కేటాయించిన ద్వారం నుంచి వాళ్లే ఎక్కాలని కండక్టర్లు సైతం పదేపదే ప్రయాణికులకు చెబుతున్నారు. దీంతో ఎవరికి ఇబ్బందులు లేకుండా ప్రయాణం సాఫీగా సాగిపోతుందని డ్రైవర్లు, కండక్టర్లు సంతోషం వ్యక్తంచేస్తున్నారు. బస్సులోకి ప్రవేశించే సమయంలో, దిగే సమయంలో కూడా పదేపదే చెప్పడంతో ప్రమాదాలు జరగకుండా నివారించగలుగుతున్నామని పేర్కొంటున్నారు.

"స్త్రీలు ముందువైపు నుంచి బస్సులోకి ఎక్కాలని, పురుషులు వెనుకవైపు నుంచి బస్సు ఎక్కాలని సూచిస్తూ స్టిక్కర్లు ఏర్పాటు చేశాము. ఇంతకు ముందు కొందరు మహిళలు వెనుకవైపు నుంచి బస్సులోకి ఎక్కబోయి కిందపడ్డారు. తీవ్రంగా గాయాలయ్యాయి. అందుకే ఇటువంటి ప్రమాదం చోటుచేసుకోకుండా ఉండేందుకు, ఉన్నతాధికారులు అధికారులు స్టిక్కర్లు ఏర్పాటు చేయాలని నిర్ణయించారు". - కండక్టర్‌, టీజీఆర్టీసీ