ఎమ్మెల్సీ వెంకట్రామిరెడ్డి నగదు తరలింపు! - 'ఫోన్ ట్యాపింగ్​'లో తవ్వేకొద్దీ కొత్త విషయాలు - TS Phone Tapping Case

Telangana Phone Tapping Case Updates : సంచలనం సృష్టించిన ఫోన్ ట్యాపింగ్ వ్యవహారంలో తవ్వేకొద్దీ కొత్త విషయాలు వెలుగులోకి వస్తున్నాయి. టాస్క్‌ఫోర్స్‌ మాజీ ఓఎస్డీ రాధాకిషన్‌రావు విచారణలో దర్యాప్తు బృందం కీలక అంశాలను సేకరించారు. బీఆర్ఎస్‌కు అనుకూలంగా డబ్బు తరలించే వ్యవహారంలోనూ ఆయన కీలకంగా వ్యవహరించినట్లు పోలీసుల తాజా విచారణలో వెల్లడైంది.

Telangana Phone Tapping Case Updates :ఫోన్‌ ట్యాపింగ్‌ వ్యవహారంలో విచారణ చేసే కొద్దీ కొత్త అంశాలు బయటికి వస్తున్నాయి. బీఆర్ఎస్ ఎమ్మెల్సీ, మాజీ ఐఏఎస్ వెంకట్రామిరెడ్డికి చెందిన సొమ్మును ఎక్కువగా తరలించినట్లు రాధాకిషన్‌రావు (Task Force EX OSD Radhakishan Rao Case) పోలీసులకు తెలిపినట్లు సమాచారం. డబ్బు రవాణాకు ఎస్కార్ట్​గా వినియోగించుకున్న ఓ ఎస్సైని రాధాకిషన్‌రావు తప్పుడు సమాచారం ఇచ్చి బురిడీ కొట్టించినట్లు దర్యాప్తులో తేలింది.

Task Force EX OSD Radhakishan Rao Case : ఎన్నికల సొమ్ము తరలింపు విషయాన్ని చెప్పకుండా అత్యవసర పరిస్థితులకు అవసరమైన డబ్బును తరలించేందుకు సహకరించాలని ఎస్సైని రాధాకిషన్‌రావు నమ్మించినట్లు తెలిసింది. ఎన్నికల నియామవళి అమల్లో ఉన్న సమయంలో నిఘా బృందాలకు చిక్కకుండా ఉండేందుకు మాత్రమే అత్యవసర సొమ్మును పోలీసు వాహనాల్లో తరలిస్తున్నట్లు ఆయన సదరు ఎస్సైని నమ్మించినట్లు సమాచారం.

బీఆర్ఎస్‌కు లబ్ధి చేకూర్చేలా: 2023 అక్టోబరులో ఎన్నికల సమయంలో రాధాకిషన్‌రావు బీఆర్ఎస్‌కు లబ్ధి చేకూర్చేలా డబ్బు తరలించే కార్యాచరణకు పూనుకున్నారు. సదరు ఎస్సైకి ప్రత్యేకంగా ప్రభుత్వ బొలెరో వాహనాన్ని సమకూర్చి, అందులోనే పెద్దఎత్తున నగదును తరలించినట్లు తెలిసింది. ఆ సమయంలో రాధాకిషన్‌రావు సూచనతో ఆయన ఓ సందర్భంలో సికింద్రాబాద్‌లో ప్రముఖ ఆసుపత్రిలో విశ్రాంత ఎస్పీ దివ్యచరణ్ రావును కలిశారు.

SIB EX DSP Praneeth Rao Case Update : దివ్యచరణ్ రావు పంపించిన ఓ వ్యక్తితో కలిసి ఎస్సై రాణిగంజ్‌కి వెళ్లారు. అక్కడ రూ.కోటి తీసుకొని తిరిగి ఆసుపత్రికి తీసుకొచ్చి దివ్యచరణ్ రావుకు అప్పగించారు. మరోసారి అదే ఆసుపత్రి నుంచి ఆయన పంపించిన వ్యక్తితో కలిసి అఫ్జల్​గంజ్ వెళ్లారు. అక్కడ మరో రూ.కోటి తీసుకొని మలక్‌పేటలోని ఆసుపత్రిలో దివ్యచరణ్‌ రావుకు అప్పగించారు.

MLC Venkatrami Reddy Money Transported in Escort Vehicles : బీఆర్ఎస్ ఎమ్మెల్సీ, విశ్రాంత ఐఏఎస్ వెంకట్రామిరెడ్డికి (BRS MLC Venkatarami Reddy) చెందిన డబ్బు తరలింపు వాహనాలకు రాధాకిషన్‌రావు ఆదేశాలతో ఎస్సై పలు విడతలుగా ఎస్కార్ట్‌గా వ్యవహరించారు. ఈ క్రమంలోనే తెల్లాపూర్‌లోని రాజ్ పుష్ప గ్రీనోడేల్ విల్లాస్‌లో వెంకట్రామిరెడ్డి ఇంటి సమీపంలో ఉండే శివచరణ్ రెడ్డి అలియాస్ చరణ్‌ను కలవాలని రాధాకిషన్‌రావు ఎస్సైకి సూచించారు. అనంతరం శివచరణ్ రెడ్డి కొత్త ఐఫోన్‌, సిమ్‌కార్డు తీసుకొచ్చి ఆయనకు అప్పగించారు. నగదు తరలింపు వ్యవహారాల గురించి ఆ ఫోన్లోనే సంభాషించేవారు.

ఎస్సైకి అనుమానం వచ్చినా : అదే క్రమంలో ఎస్సై ఓసారి శివచరణ్ సూచించిన ప్రాంతానికి వెళ్లి అక్కడ రూ.కోటి తీసుకొచ్చి తెల్లాపూర్‌లో అప్పగించారు. అలాగే అక్టోబరు మూడో వారంలో రెండు, మూడు రోజుల వ్యవధిలో రెండుసార్లు రూ.కోటి చొప్పున తీసుకొచ్చి శివచరణ్‌కు ఆయన అప్పగించారు. ఇలా తరచూ జరుగుతున్న క్రమంలో ఏదో తేడాగా ఉందని ఎస్సైకి అనుమానం కలిగింది. ఉన్నతాధికారి కావడంతో రాధాకిషన్‌రావుకు అడ్డు చెప్పలేకపోయారు.

ఎప్పుడైతే రాధాకిషన్‌రావును ఎన్నికల కమిషన్ తొలగించిందో, అప్పుడు ఎస్సైకి అనుమానం కలిగింది. అప్పటి అధికార బీఆర్ఎస్‌ పార్టీకి అనుకూలంగా రాధాకిషన్‌రావు చట్ట వ్యతిరేక కార్యకలాపాలకు పాల్పడ్డారని ఆయనకు అర్థమైంది. ఇదే క్రమంలో గులాబీ పార్టీ ఓటమి తర్వాత డిసెంబరు 4న రాధాకిషన్‌రావు తన ఓఎస్డీ పదవికి రాజీనామా చేశారు. తన రహస్య కార్యకలాపాలు బహిర్గతం కాకుండా ఉండేందుకు తన రెండు మొబైల్‌ ఫోన్లను ఫార్మాట్ చేశారు. ఆ రెండు ఫోన్లను తర్వాత దర్యాప్తు బృందం స్వాధీనం చేసుకుంది. వాటి నుంచి డేటాను తిరిగి పొందే దిశగా ప్రయత్నిస్తున్నారు. వెంకట్రామిరెడ్డి తన బాల్య స్నేహితుడు కావడంతో ఎన్నికల వేళ అతడు తరలించే సొమ్మునకు ఎస్సైని ఎస్కార్ట్‌గా పంపించినట్లు రాధాకిషన్‌రావు పోలీస్ విచారణలో వెల్లడించారు.