Telangana High Court on Gated Community Guidelines : గేటెడ్ కమ్యూనిటీలో నివసిస్తున్న వాళ్లకి ఎలాంటి ఇబ్బందులు తలెత్తకుండా నిబంధనలు రూపొందించాలని తెలంగాణ హైకోర్టు పోలీసులకు ఆదేశాలు జారీ చేసింది. చేసే పనులు, చేయకూడని పనులు రూపొందించి వాటిని గేటెడ్ కమ్యూనిటీలో ఉండే ఎగ్జిక్యూటివ్ కమిటీలకు అందించాలని ఆదేశించింది. కూకట్‌పల్లి హౌసింగ్ బోర్డ్ కాలనీ, ఇందు ఫార్చ్యూన్ ఫీల్డ్ విల్లాలో నిర్వహిస్తున్న పార్టీల్లోని సౌండ్ సిస్టమ్‌ వల్ల ఇబ్బందులు తలెత్తుతున్నాయని దాఖలైన పిటిషన్‌పై హైకోర్టు ఈ మేరకు తీర్పు వెలువరించింది. క్లబ్ హౌస్‌ల్లో నిర్వహించే కార్యకలాపాలతో స్థానికులకు ఎలాంటి ఇబ్బందులు తలెత్తకుండా చూడాలని హైకోర్టు పోలీసులను ఆదేశించింది.
మెరుగైన జీవన శైలి, శాంతి, గౌరవప్రదమైన ప్రశాంతమైన జీవితాన్ని గడపడానికి సామరస్యం, మెరుగైన సౌకర్యాలు, వ్యాయామ శాల, క్రీడా సౌకర్యాలు, ఉద్యాన వనాలు, తదితర సౌకర్యాలుంటాయన్న ఉద్దేశంతో ఎక్కువ మంది గేటెడ్ కమ్యూనిటీని ఎంచుకుంటున్నారని హైకోర్టు తెలిపింది. గేటెడ్ కమ్యూనిటీ కార్యకలాపాల నిర్వహణకు సంబంధించి ప్రత్యేక చట్టం ఉందన్న వివరాలేవీ లేవని, ప్రస్తుతం గేటెడ్ కమ్యూనిటీలతో పాటు ఫ్లాట్ అసోసియేషన్లు తెలంగాణ అపార్ట్మెంట్ చట్టం నిబంధనల కింద నడుస్తున్నాయని హైకోర్టు పేర్కొంది.
వివరాలు గోప్యంగా ఉంచాలి :ప్రస్తుతం గేటెడ్ కమ్యూనిటీలతో పాటు ఫ్లాట్ అసోసియేషన్లు తెలంగాణ అపార్ట్మెంట్ చట్టం నిబంధనల కింద నడుస్తున్నాయని హైకోర్టు పేర్కొంది. గేటెడ్ కమ్యూనిటీలో జరిగే అసాంఘిక, చట్టవిరుద్ధమైన కార్యకలాపాల నియంత్రణకు చర్యలు చేపట్టే అధికారం పోలీసులకు ఉందని స్పష్టం చేసింది. ఈ మేరకు మార్గదర్శకాలతో పాటు అనుసరించాల్సిన చట్ట నిబంధనలు, ప్రభుత్వ ఉత్తర్వులను కూడా అందజేయాలని పేర్కొంది. నిబంధనలు అతిక్రమించిన వారిపై క్రిమినల్‌ చర్యలు తీసుకుంటామని హెచ్చరికలు జారీ చేయాలని పోలీసులను హైకోర్టు ఆదేశించింది. అవసరం అయితే కమ్యూనిటీల్లో ఫిర్యాదుల స్వీకరణకు ఆయా పోలీస్‌స్టేషన్ పరిధిలో యాప్‌ను రూపొందించే అంశాన్ని పరిశీలించాలని సూచించింది. యాప్స్ ద్వారా ఫిర్యాదు చేసేవారి వివరాలను గోప్యంగా ఉంచాలని హైకోర్టు నిర్దేశించింది.