ఒక్క టానిక్‌ వైన్స్​లోనే రూ.1000 కోట్ల 'పన్ను ఎగవేత' లావాదేవీలు!

Tax Evasion in Foreign Liquor Sales Scam Update : టానిక్‌ మద్యం దుకాణానికి అనుకూలంగా గత ప్రభుత్వం ఎందుకు ప్రత్యేక జీవో ఇచ్చింది? అన్ని మద్యం దుకాణాలకు రెండేళ్లు లైసెన్స్‌ గడువు ఉంటే, దీనికి ఎందుకు ఐదేళ్లు లైసెన్స్‌ గడువు ఇచ్చింది? ఆ తర్వాత కూడా ప్రభుత్వం గడువు పొడిగించుకుంటూ రావాల్సిన అవసరం ఏమొచ్చింది? నిర్దేశిత మద్యం డిపో నుంచి కాకుండా, రాష్ట్రంలోని ఏ మద్యం డిపో నుంచైనా మద్యాన్ని తెచ్చుకోడానికి వెసులుబాటు ఎందుకు కల్పించింది?మద్యంతో పాటు సాఫ్ట్​ డ్రింకులు, సిగరెట్లు, గ్లాసులు లాంటివి విక్రయించుకోడానికి కూడా ఎందుకు అనుమతిచ్చింది? ఇలా సమాధానాలు లేని సవాలక్ష ప్రశ్నలతో గత ప్రభుత్వం ఇచ్చిన జీవో తెరపైకి తెస్తోంది. టానిక్‌ మద్యం దుకాణం లైసెన్స్‌ విషయంలో ఏం జరిగిందో తెలియాలంటే ఈ కథనం చూడాల్సిందే.

Tax Evasion in Foreign Liquor Sales Scam Update : రాష్ట్రంలో 2016 అక్టోబరు 26న అప్పటి బీఆర్‌ఎస్‌ ప్రభుత్వం ఎలైట్‌ షాప్‌ రూల్స్‌-2016 పేరిట ఓ జీవో ఇచ్చింది. ఈ జీవో ప్రకారం ఏర్పాటయ్యే దుకాణంలో ఫారెన్‌ వైన్‌, ఫారెన్‌ లిక్కర్‌, ఫారెన్‌ బీరుతో పాటు ఇండియన్‌ మేడ్‌ ప్రీమియం లిక్కర్‌, వైన్‌లు అమ్ముకోవచ్చని స్పష్టం చేసింది. ఇందుకు సంబంధించి నిబంధనలు కూడా వెల్లడించింది.

ఆబ్కారీ శాఖకు చెందిన మద్యంపై వ్యాట్‌ విధింపు విషయమై వ్యాట్‌ చట్టం షెడ్యూల్ -6, ఎక్స్‌ప్లనేషన్‌-1 ప్రకారం తెలంగాణ రాష్ట్ర బేవరేజెస్‌ కంపెనీ లిమిటెడ్‌ మాత్రమే చెల్లించాల్సి ఉంది. దీంతో ఎలైట్‌ టానిక్‌ మద్యం దుకాణానికి బయటి దేశాల నుంచి మద్యం దిగుమతి చేసుకునేందుకు వెసులుబాటు ఇచ్చినప్పటికీ, ఆ సరకును టీఎస్‌బీసీఎల్‌ అధికారుల దృష్టికి తీసుకెళ్లి, లేబులింగ్‌ చేయించుకోవాల్సి ఉంటుంది. అలా చేసినట్లయితే నిర్దేశిత 70 శాతం వ్యాట్ ప్రభుత్వానికి వచ్చేస్తుంది. కానీ ఇక్కడ టానిక్‌ మద్యం దుకాణానికి ఎలైట్‌ షాపు పేరుతో ఇచ్చిన జీవోలో దుకాణదారులకు అనుకూలంగా అనేక వెసులుబాట్లు కల్పించారు.

ఒకే పేరుతో 9 దుకాణాలు : హైదరాబాద్‌ జూబ్లీహిల్స్‌ ప్రశాసన్​నగర్‌ చిరునామాతో అమిత్‌ రాజ్‌ లక్ష్మారెడ్డి పేరున ఈ టానిక్‌ మద్యం దుకాణం లైసెన్స్‌ ఉంది. టానిక్‌ మద్యం దుకాణం ఏర్పాటు చేసిన బంజారాహిల్స్‌లో సాధారణ మద్యం దుకాణానికి లైసెన్స్‌ ఫీజు రూ.1.10 కోట్లు ఉండగా, టానిక్‌ దుకాణం లైసెన్స్‌ ఫీజు మాత్రం రూ.1.25 కోట్లుగా ఉంది. అయితే ఈ టానిక్‌ మద్యం దుకాణానికి అనుబంధంగా మరో 9 మద్యం దుకాణాలు ఇదే బ్రాండ్‌ పేరుతో హైదరాబాద్‌ నగరంలో ఏర్పాటయ్యాయి. ఈ టానిక్‌ మద్యం దుకాణం ఏర్పాటు తెర వెనుక, గత ప్రభుత్వానికి చెందిన బడాబాబులు ఉండటంతో ఆబ్కారీ శాఖ అధికారులు కూడా ఈ జీవో గురించి కానీ, నియమ నిబంధనల గురించి కానీ పట్టించుకోలేదు.

తెర వెనక బడాబాబులు : ఆ దుకాణదారుడు మద్యం ఎక్కడి నుంచి తెచ్చుకుంటున్నాడు? ఏ ఏ రకాల మద్యం అమ్ముతున్నాడు? తెచ్చుకున్న మద్యానికి వ్యాట్‌ చెల్లిస్తున్నారా లేదా అన్న దానిపై కూడా అధికారుల వద్ద సమాచారం లేదు. దీనికి ప్రధాన కారణం ఆ దుకాణం అప్పటి పాలకులకు దగ్గరగా ఉన్న బడా బాబులకు చెందింది కావడమేనన్న విమర్శలు ఉన్నాయి. సాధారణ తనిఖీల్లో సైతం ఎలైట్‌ దుకాణం జోలికి వెళ్లకుండా అధికారులు మిన్నకుండి పోయారు. ఈ దుకాణదారుడు ట్యాక్స్‌ ఎగ్గొడుతున్నట్లు ప్రచారం జోరుగా జరగడంతో టానిక్‌ దుకాణంతో పాటు మరో 9 దుకాణాలపై ఆబ్కారీ శాఖ దాడులు నిర్వహించింది.

ఎన్‌ఫోర్స్‌మెంట్ విభాగం అధికారులు 10 బృందాలుగా విడిపోయి, తనిఖీలు నిర్వహించారు. ఆయా దుకాణాల్లో లభ్యమైన రికార్డులను స్వాధీనం చేసుకున్నారు. ఏయే అంశాలను పరిశీలించాలన్న దానిపై ఇవాళ కమిషనర్‌ శ్రీధర్‌ అధికారులతో సమీక్ష నిర్వహించారు. టానిక్‌ దుకాణం ఒక్కటే రూ.1000 కోట్లకు పైగా వ్యాపార లావాదేవీలు చేసినట్లు సమాచారం. ఇందుకు సంబంధించి 2016 నుంచి ఇప్పటి వరకు రికార్డులు అన్నీ పరిశీలించిన తర్వాతనే ఎక్కడ నిబంధనలు ఉల్లంఘనలు జరిగాయో స్పష్టం అవుతుందని అధికారులు వెల్లడిస్తున్నారు.

లొసుగులను ఆసరాగా చేసుకుని : ఫిల్మ్‌నగర్‌లో ఏర్పాటైన టానిక్‌ అనుబంధ మద్యం దుకాణాల్లో ఇతర మద్యం దుకాణాలకు చెందిన మద్యం లభ్యమైనట్లు తేలింది. టానిక్‌ దుకాణంలో కూడా ఎప్పుడో ఓల్డ్‌ స్టాక్‌ మద్యం సీసాలు దొరికినట్లు ఎక్సైజ్‌ అధికారులు చెబుతున్నారు. ఇప్పటి వరకు స్వాధీనం చేసుకున్న రికార్డుల పరిశీలన చేసే కార్యక్రమం వేగవంతం చేసింది. జీవోలోని కొన్ని లొసుగులను ఆసరాగా చేసుకుని, వ్యాట్ ఎగవేతకు పాల్పడి ఉండొచ్చని అటు ఆబ్కారీ శాఖ, ఇటు వాణిజ్య పన్నుల శాఖ అనుమానిస్తున్నాయి.

టానిక్‌ మద్యం దుకాణం ప్రత్యేక జీవోతో ఏర్పాటు కావడం, మద్యం పాలసీకి భిన్నంగా నియమావళి రూపకల్పన చేయడం, అన్ని మద్యం దుకాణాలకు రెండు సంవత్సరాల పాటు గడువు కలిగిన లైసెన్స్‌ ఉంటే, ఈ టానిక్‌ మద్యం దుకాణానికి మాత్రం ఏకంగా ఐదు సంవత్సరాల కాలానికి జీవో ద్వారా లైసెన్స్‌ ఇచ్చారు. అంతటితో ఆగలేదు. గడిచిన మూడేళ్లుగా ప్రతి ఏటా ఆ దుకాణానికి చెందిన లైసెన్స్‌ గడువు పెంచుకుంటూ వచ్చింది గత ప్రభుత్వం.

న్యాయ సలహా తీసుకుని ముందుకు : తాజాగా ప్రభుత్వం మారిన తర్వాత గత ప్రభుత్వం చేసిన తప్పిదాలు ఒక్కొక్కటీ బయటకు వస్తున్నాయి. అందులో భాగంగా ఈ మద్యం దుకాణంపై దర్యాప్తునకు శ్రీకారం చుట్టిన ప్రభుత్వం, సోదాలు నిర్వహింప చేసి రికార్డులను స్వాధీనం చేసుకుంది. తదుపరి ఏం చేయాలన్న దానిపై అధికారులు సమీక్షలు నిర్వహించడంతో పాటు న్యాయ సలహా తీసుకుని ముందుకు వెళ్లాలని ఆబ్కారీ శాఖ నిర్ణయించింది. అయితే ఏదైనా నిర్ణయం కానీ, ప్రతిపాదన కానీ ఎవరికైనా అత్యధిక లబ్ధి చేకూర్చేటట్లు ఉన్నప్పుడు దానిని పరిగణనలోకి తీసుకొని అవినీతి నిరోధక చట్టం ప్రకారం దర్యాప్తు చేసే అధికారం ప్రభుత్వానికి ఉంటుందని అవినీతి నిరోధక చట్టం సెక్షన్ 17(ఏ) స్పష్టం చేస్తోంది.