రాష్ట్రంలోని 65 ఐటీఐలలో స్కిల్‌ కేంద్రాల ఏర్పాటు - టాటా టెక్నాలజీస్‌తో ప్రభుత్వం ఒప్పందం

Tata Technologies signed MoU with Telangana Government : స్కిల్​ కేంద్రాల ఏర్పాటుపై టాటా టెక్నాలజీస్​తో ప్రభుత్వం ఒప్పందం కుదుర్చుకుంది. ఎంవోయూపై సీఎం రేవంత్​ రెడ్డి సమక్షంలో టాటా, ప్రభుత్వ ప్రతినిధులు సంతకాలు చేశారు. 65 ఐటీఐలలో స్కిల్​ కేంద్రాల ఏర్పాటుకు ఈ ఒప్పందం జరిగింది. 9 లాంగ్‌టర్మ్, 23 షార్ట్ టర్మ్ కోర్సులను టాటా టెక్నాలజీస్​ నిర్వహించనుంది. వచ్చే విద్యా సంవత్సరం నుంచే ఈ ప్రాజెక్టు అమలుకు సన్నాహాలు చేస్తున్నారు.

Tata Technologies signed MoU with Telangana Government :రాష్ట్రంలోని ఐటీఐ(ITI) కాలేజీలను అధునాతన సాంకేతిక నైపుణ్య శిక్షణ కేంద్రాలుగా మార్చేందుకు టాటా టెక్నాలజీస్(TATA Technologies)​తో రాష్ట్ర ప్రభుత్వం ఒప్పందం కుదుర్చుకుంది. శనివారం సచివాలయంలో ముఖ్యమంత్రి రేవంత్​ రెడ్డి సమక్షంలో రాష్ట్ర అధికారులు, టాటా టెక్నాలజీస్​ ప్రతినిధుల మధ్య ఒప్పందంపై సంతకాలు జరిగాయి. ఈ కార్యక్రమంలో ఉపముఖ్యమంత్రి భట్టి విక్రమార్క, ఐటీ, పరిశ్రమల శాఖ మంత్రి శ్రీధర్​ బాబు, ప్రభుత్వ ప్రధాన కార్యదర్శి శాంతి కుమారి, పరిశ్రమల శాఖ ముఖ్య కార్యదర్శి జయేశ్​ రంజన్​ తదితరులు పాల్గొన్నారు. రాష్ట్ర ఉపాధి శిక్షణా విభాగం ప్రత్యేక ముఖ్య కార్యదర్శి రాణికుముదిని, టాటా టెక్నాలజీస్​ గ్లోజల్​ హ్యూమన్​ రీసోర్సెస్​ ప్రెసిడెంట్​ పవన్​ భగేరియా ఈ ఒప్పందంపై సంతకాలు చేశారు.

రాష్ట్రంలోని 65 ప్రభుత్వ ఐటీఐను సుమారు రూ.2,700 కోట్ల రూపాయలతో స్కిల్లింగ్ కేంద్రాలుగా తీర్చిదిద్దేందుకు ఎంవోయూ(MoU)జరిగింది. సచివాలయంలో టాటా టెక్నాలజీస్​తో సీఎం రేవంత్ రెడ్డి(CM Revanth Reddy) సమావేశమయ్యారు. వర్కుషాప్ నిర్మాణం, యంత్ర పరికరాలు, సామగ్రితో పాటు శిక్షణను అందించే ట్యూటర్ల నియామకాన్ని టాటా టెక్నాలజీస్ చేపడుతుంది. ప్రాజెక్టులో భాగంగా ఐటీఐలలో కొత్తగా 9 లాంగ్ టర్మ్, 23 షార్ట్ టర్మ్ కోర్సులు ప్రవేశపెడతారు. ఏటా 9వేల మందికి అడ్మిషన్లు కల్పిస్తారు. సుమారు లక్ష మందికి షార్ట్ టర్మ్ కోర్సుల ద్వారా శిక్షణను అందిస్తారు. రానున్న 2024 - 25 విద్యా సంవత్సరం నుంచే ఈ ప్రాజెక్టు అమలుకు చేయాలని ప్రభుత్వం నిర్ణయించింది. అక్టోబర్ నుంచి మొదలయ్యే అకడమిక్ సెషన్​కు వర్కుషాపులను అందుబాటులో ఉంచాలని తగినంత ట్యూటర్లను నియమించాలని టాటా టెక్నాలజీ ప్రతినిధులకు సీఎం సూచించారు.

శిక్షణ ఇవ్వటమే కాకుండా యువతకు ఉపాధి కల్పించేందుకు క్యాంపస్ ప్లేస్​మెంట్లపై దృష్టి పెట్టాలని సీఎం రేవంత్​ టాటా టెక్నాలజీ ప్రతినిధులను కోరారు. ప్రత్యేక ప్లేస్​మెంట్ ​సెల్ ఏర్పాటు చేయాలని సీఎం సూచించారు. పరిశ్రమల అవసరాలకు, కోర్సులకు మధ్య ఉన్న భారీ అంతరాన్ని తగ్గించాలని అన్నారు. యువతకు ఉపాధి అవకాశాలను అందించే కోర్సులు అందుబాటులోకి తీసుకువచ్చే లక్ష్యంతోనే ఈ ప్రాజెక్టును చేపట్టినట్లు చెప్పారు. డిగ్రీ, ఇంజినీరింగ్ విద్యార్థులకు తగిన నైపుణ్యాలను అందించేందుకు త్వరలోనే రాష్ట్రంలో స్కిల్ యూనివర్సిటీ(Skill University) నెలకొల్పేందుకు ప్రయత్నాలు చేస్తోందని ఉప ముఖ్యమంత్రి భట్టి విక్రమార్క, మంత్రి శ్రీధర్ బాబు అన్నారు.

దావోస్​లో పడిన బీజం : దావోస్​ వరల్డ్​ ఎకనమిక్​ ఫోరమ్​ వార్షిక సదస్సులో టాటా సన్స్​ ఛైర్మన్​ నటరాజన్​ చంద్రశేఖరన్​తో ముఖ్యమంత్రి రేవంత్​ రెడ్డి సమావేసమై రాష్ట్రంలో పెట్టుబడులతో పాటు పలు ప్రతిపాదనలపై చర్చించిన విషయం తెలిసిందే. అందులో భాగంగా రాష్ట్రంలోని 65 ఐటీఐలను అధునాతన సాంకేతిక నైపుణ్య శిక్షణా కేంద్రాలు తీర్చిదిద్దడానికి టాటా టెక్నాలజీస్​ ముందుకొచ్చింది. ప్రభుత్వ భాగస్వామ్యంతో ఈ కొత్త ప్రాజెక్టును చేపడుతున్న టాటా టెక్నాలజీస్​ ఐటీఐల్లో 9 లాంగ్​ టర్మ్​, 23 షార్ట్​ టర్మ్​ కోర్సులతో పాటు పలు బ్రిడ్జి కోర్సులు నిర్వహిస్తుంది.