నంద్యాలలో మర్డర్ కేసు - ఇద్దరు పోలీసులపై వేటు - Nandyal Brutal Murder Case Updates

Nandyal Brutal Murder Case Updates : నంద్యాల జిల్లాలో పాత కక్షలతో ఓ వ్యక్తి దారుణ హత్యకు గురయ్యాడు. ప్రత్యర్థులు ఆయనపై దాడి చేసి భార్య కళ్లెదుటే దారుణంగా హత్య చేశారు. ఈ ఘటనపై పోలీసుల దర్యాప్తు కొనసాగుతోంది. అయితే మరోవైపు దీనిపై నిర్లక్ష్యంగా వ్యవహరించినందుకు ఉన్నతాధికారులు ఇద్దరు పోలీసులను సస్పెండ్ చేశారు.

Brutal Murder in Mahanandi : నంద్యాల జిల్లాలో పాత కక్షలు భగ్గుమన్నాయి. మహానంది మండలం సీతారామాపురం గ్రామంలో శనివారం నాడు అర్ధరాత్రి దాటిన తర్వాత పసుపులేటి సుబ్బరాయుడు (68) అలియాస్‌ పెద్దన్నను బుడ్డారెడ్డి శ్రీనివాస్​రెడ్డి ఆయన అనుచరులు దారుణంగా హత్య చేశారు. 38 మంది వారిపై ఇంటిపై దాడిచేసి, పెద్దన్నను కర్రలు, ఇనుప రాడ్లతో కొట్టారు. అనంతరం బండరాయితో తలపై మోది అతని భార్య కళ్ల ముందే కిరాతకంగా హతమార్చారు. ఈ ఘటనపై పోలీసుల దర్యాప్తు కొనసాగుతోంది.

Two Cops Suspend in Nandyal Murder Case : అయితే మరోవైపు ఘటనకు ముందు పరిస్థితిపై సకాలంలో ఉన్నతాధికారులకు సమాచారం చేరవేయడంలో సీఐ, ఎస్సై విఫలమయ్యారంటూ అధికారులు వారిపై చర్యలు తీసుకున్నారు. ఇందులో భాగంగా నంద్యాల రూరల్‌ సీఐ శివకుమార్‌రెడ్డి, మహనంది ఎస్సై నాగేంద్రప్రసాద్‌పై సస్పెన్షన్‌ వేటు పడింది.

A Person Killed in Sitaramapuram :పసుపులేటి సుబ్బరాయుడి హత్యకు ఆర్థిక విభేదాలే కారణమని సమాచారం. బుడ్డారెడ్డి శ్రీనివాసరెడ్డి, పసుపులేటి సుబ్బరాయుడు ఇద్దరూ వైఎస్సార్సీపీలో ఉన్నప్పుడే ఆర్థికపరమైన విషయాల్లో ఘర్షణలు పడేవారు. సుబ్బరాయుడుకు చెందిన 15 సెంట్ల స్థలాన్ని శ్రీనివాసరెడ్డి తీసుకోవడం, మరోచోట స్థలం ఇస్తానని చెప్పిన మాట మూడు సంవత్సరాలుగా అమలు చేయకపోవడంతో ఇద్దరి మధ్య గొడవలు జరిగేవి. దీనికి తోడూ శ్రీనివాసరెడ్డి వైఎస్సార్సీపీ నుంచి టీడీపీలోకి మారినా సుబ్బరాయుడు వైఎస్సార్సీపీలోనే ఉండిపోయారు.

మరోవైపు తన ఎకరా పొలాన్ని శ్రీనివాసరెడ్డి తీసుకున్నాడని, ప్రత్యామ్నాయంగా ఇస్తానన్న పొలం ఇవ్వాలని నిలదీస్తే అత్యాచారం కేసు పెట్టించి జైలుకు పంపించాడని గ్రామానికి చెందిన పల్లంరాజు వాపోయారు. ఈ క్రమంలోనే శనివారం అర్ధరాత్రి సుబ్బరాయుడు, పల్లంరాజుల ఇళ్లపై దాడులు జరగడానికి వారితో శ్రీనివాసరెడ్డికి ఉన్న విభేదాలే కారణమని సమాచారం. సుబ్బరాయుడి హత్యోదంతంలో పోలీసులు వ్యవహరించిన తీరుపైనా విమర్శలు వచ్చాయి.

మహానంది ఎస్సై నాగేంద్రప్రసాద్‌ కేవలం ఇద్దరు కానిస్టేబుళ్లతో సీతారామపురానికి వెళ్లారు. అయితే పరిస్థితి తీవ్రతను పోలీసు ఉన్నతాధికారులకు వివరించకపోవడంపై విమర్శలు వచ్చాయి. నంద్యాల శివారు నుంచి ఐదు కిలో మీటర్ల దూరంలోనే ఉన్న సీతారామపురానికి అదనపు బలగాల్ని పంపాలని కోరితే కేవలం 15 నుంచి 20 నిమిషాల్లోనే చేరుకునే అవకాశం ఉన్నా ఉదాసీనంగా వ్యవహరించారని స్థానికులు ఆగ్రహం వ్యక్తం చేస్తున్నారు. శ్రీనివాసరెడ్డితోపాటు సుమారు 38 మంది గ్రామంలో దాడి చేయడానికి తిరుగుతున్నా, వచ్చిన వారిలో సుమారు 10 మంది గ్రామస్థులే కాకపోయినా చర్యలు తీసుకోవడంలో విఫలమయ్యారనే ప్రచారం జరుగుతోంది. ఈ పరిణామాల నేపథ్యంలోనే అధికారులు సీఐ, ఎస్సైపై చర్యలు తీసుకున్నారు.