కర్నూలు ఈనాడు కార్యాలయంపై దాడిని ఖండిస్తూ రాష్ట్రవ్యాప్తంగా ఆందోళనలు

State Wide Agitation About Attack on Eenadu Office: కర్నూలు ఈనాడు కార్యాలయంపై పాణ్యం ఎమ్మెల్యే అనుచరుల దాడిని ఖండిస్తూ, రాష్ట్రవ్యాప్తంగా ఆందోళనలు, నిరసనలు, ర్యాలీలు చేపట్టారు. ఈ కార్యక్రమాల్లో జర్నలిస్ట్​ సంఘాలు, పలు ప్రజా సంఘాలు, రాజకీయ పార్టీలు పాల్గొన్నాయి.

State Wide Agitation About Attack on Eenadu Office: కర్నూలులోని ఈనాడు కార్యాలయంపై పాణ్యం ఎమ్మెల్యే కాటసాని రాంభూపాల్​ రెడ్డి అనుచరుల దాడిని జర్నలిస్టు సంఘాలు, రాజకీయ పార్టీలు తీవ్రంగా ఖండిస్తున్నాయి. విజయవాడ ప్రెస్‌ క్లబ్‌ వద్ద జర్నలిస్టుల ఆధ్వర్యంలో ఆందోళన నిర్వహించగా, ఉరవకొండలో కళ్లకు నల్లరిబ్బన్లు కట్టుకుని నిరసన తెలిపారు. కడపలో నిరసన తెలిపిన జర్నలిస్ట్​ సంఘం, దాడి చేసిన వారిని అరెస్టు చేయాలని డిమాండ్​ చేసింది. అంతేకాకుండా మద్దికేరలో విలేకరిపై దాడిని ఖండిస్తూ విలేకరులు ఆందోళన నిర్వహించారు.

కర్నూలులో: కర్నూలు కలెక్టరేట్ ఎదుట జర్నలిస్టు సంఘాలు, ప్రతిపక్ష, వామపక్ష పార్టీల ఆధ్వర్యంలో ఆందోళన నిర్వహించారు. అనంతరం రోడ్డుపై బైఠాయించి రాస్తారోకో చేపట్టారు. ఈ క్రమంలో పోలీసులకు, నిరసనకారులకు మధ్య వాగ్వాదం జరిగింది. ఈనాడు కార్యాలయంపై దాడి చేసిన నిందితులపై కఠిన చర్యలు తీసుకోవాలని నాయకులు డిమాండ్ చేశారు.

ఈనాడు కార్యాలయంపై దాడిని ఖండిస్తూ జిల్లాలోని ఎమ్మిగనూరులో జర్నలిస్ట్ సంఘాలు, ప్రజా సంఘాలు, రాజకీయ పార్టీల ఆధ్వర్యంలో ధర్నా నిర్వహించారు. ర్యాలీగా సోమప్ప కూడలి చేరుకుని రహదారిపై బైఠాయించారు. దాడి చేసిన వారిని వెంటనే అరెస్టు చేయాలని నినాదాలు చేశారు. తహసీల్దార్ కార్యాలయం ఎదుట ధర్నా నిర్వహించి, ప్రభుత్వానికి వ్యతిరేకంగా నినాదాలు చేశారు.

పత్రికా స్వేచ్ఛ హరిస్తున్నారు: ముఖ్యమంత్రి వైఎస్ జగన్ మోహన్ రెడ్డి వాస్తవాలు వెలుగులోకి తీసుకు వస్తున్న పత్రికలు, టీవీ ఛానళ్ల గొంతు నొక్కాలని కుట్ర పన్నుతున్నాడని ఆరోపించారు. ఓర్వకల్లులో తెలుగుదేశం శ్రేణులు ఆందోళన నిర్వహించారు. జాతీయ రహదారిపై ఎమ్మెల్యే కాటసాని రాంభూపాల్ రెడ్డి దిష్టిబొమ్మను దగ్ధం చేశారు. నిందితులపై కఠిన చర్యలు తీసుకోవాలని డిమాండ్ చేశారు. పత్రికా స్వేచ్ఛను కాపాడాలని కోరారు.

విజయవాడలో జర్నలిస్టుల ఆందోళన:కర్నూలు ఈనాడు కార్యాలయంపై దాడి ఘటనను నిరసిస్తూ విజయవాడలో ఆందోళన నిర్వహించారు. విజయవాడ ప్రెస్‌క్లబ్‌ వద్ద జర్నలిస్టుల ఆధ్వర్యంలో నిర్వహించిన ఈ ఆందోళన కార్యక్రమంలో ఏపీయూడబ్ల్యూజే, వీజేఎఫ్‌ సంఘాల నేతలు పాల్గొన్నారు. అంతేకాకుండా ఫొటో జర్నలిస్టుల యూనియన్‌, ఇతర సంఘాల ఆధ్వర్యంలో నిరసన చేపట్టారు.

కడపలో నిరసన:ఈనాడు కార్యాలయంపై దాడిని ఖండిస్తూ కడప అంబేడ్కర్‌ కూడలి వద్ద జర్నలిస్ట్ సంఘాలు, తెలుగుదేశం, ప్రజాసంఘాలు నిరసన తెలిపాయి. దాడి చేసిన దుండగులను వెంటనే అరెస్టు చేయాలని నిరసనకారులు డిమాండ్ చేశారు.

ఆంధ్రజ్యోతి విలేకరిపై దాడి: మద్దికేర ఆంధ్రజ్యోతి విలేకరి వీరశేఖర్​పై దాడికి నిరసనగా విలేకరులు ఆందోళన చేపట్టారు. తెలుగుదేశం, సీపీఐ, జనసేన కార్యకర్తలు ర్యాలీ నిర్వహించారు. స్థానిక బస్టాండ్ నుంచి తాహశీల్దార్ కార్యాలయం వరకు ఈ ర్యాలీ చేపట్టారు. దాడికి పాల్పడిన వారిని కఠినంగా శిక్షించాలని నినాదాలు చేశారు. అనంతరం తహసీల్దార్ రజాక్ వలికి వినతిపత్రం అందించారు.

అవినీతిని బయటపెడుతున్న పత్రిక విలేకరులపై జగన్మోహన్ రెడ్డి భౌతిక దాడులు చేయించి దౌర్జన్యాలకు పాల్పడుతోందని విమర్శించారు. రాబోవు రోజుల్లో వైఎస్సార్​సీపీ ఈ దాడులకు మూల్యం చెల్లించుకోక తప్పదని హెచ్చరించారు విలేకరులపై దాడికి పాల్పడిన వారిని వెంటనే అరెస్ట్ చేసి కఠినంగా శిక్షించాలని కోరారు.