బ్యాంకు ఉద్యోగార్థులకు గుడ్​న్యూస్​ - డిస్క్రిప్టివ్‌ టెస్ట్​ లేకుండానే ఐడీబీఐలో జాబ్స్​!

డిగ్రీ విద్యార్హతతో ఐడీబీఐలో ఎగ్జిక్యూటివ్‌ల పోస్టుల భర్తీ - పరీక్ష, ఇంటర్వ్యూలతో నియామకాలు - డిస్క్రిప్టివ్‌ ఎగ్జామ్ లేదు

IDBI Executives Recruitment - 2024 :బ్యాంకు ఉద్యోగార్థులకు గుడ్​న్యూస్​! ఇండస్ట్రియల్‌ డెవలప్‌మెంట్‌ బ్యాంక్‌ ఆఫ్‌ ఇండియా (ఐడీబీఐ) ఎగ్జిక్యూటివ్‌- సేల్స్‌ అండ్‌ ఆపరేషన్స్‌ పోస్టులకు గానూ 1000 ఖాళీలను భర్తీ చేయబోతోంది. డిగ్రీ విద్యార్హతతో అప్లై చేసుకోవచ్చు. ఎగ్జామ్​, ఇంటర్వ్యూలతో నియామకాలుంటాయి. ఎంపికైనవారు రెండు సంవత్సరాలపాటు విధుల్లో కొనసాగుతారు. తర్వాత సంస్థ అవసరాల ప్రకారం పర్మినెంట్​ ఉద్యోగంలోకి తీసుకుంటారు.

ఈ పోస్టులకు అప్లై చేసుకోవడానికి జనరల్‌ అభ్యర్థుల వయసు 25 ఏళ్లు మించరాదు. ఐబీపీఎస్, ఎస్‌బీఐ పీవో పోస్టుల్లో వీరికి 30 ఏళ్ల వరకు ఛాన్స్ ఉంది. అందువల్ల పోటీ కొంచెం తక్కువగా ఉండే అవకాశం ఉంది. అలాగే డిస్క్రిప్టివ్‌ టెస్ట్​ లేకపోవడం కలిసొచ్చే అంశమే. ఆన్‌లైన్‌ ఎగ్జామ్, డాక్యుమెంట్‌ వెరిఫికేషన్, ఇంటర్వ్యూ, ప్రీ రిక్రూట్‌మెంట్‌ మెడికల్‌ టెస్టులతో అపాయింట్​ చేస్తారు. ఈ ఖాళీలను కాంట్రాక్టు ప్రాతిపదికన భర్తీ చేస్తున్నప్పటికీ మెరుగైన పనితీరు కనబరిచిన ప్రతిభావంతులకు శాశ్వత విధుల్లోకి తీసుకోవచ్చు.

ఇంటర్వ్యూ, ఫైనల్​ సెలక్షన్

ఆన్‌లైన్‌ పరీక్షలో సెక్షన్లవారీ, మొత్తం మీద కనీస మార్కులు సాధించాలి. ఇలా అర్హులైనవారి జాబితా నుంచి మెరిట్, రిజర్వేషన్‌ ప్రకారం విభాగాల వారీ ఒక్కో ఖాళీకి కొంత మంది చొప్పున ఇంటర్వ్యూకి సెలక్ట్​ చేస్తారు. ఈ సంఖ్యను ఐడీబీఐ ఫైనల్​ చేస్తుంది.

ఇంటర్వ్యూకి వంద మార్కులు ఉంటాయి. ఇందులో 50 మార్కులు సాధించడం తప్పనిసరి. ఎస్సీ, ఎస్టీ, ఓబీసీ, దివ్యాంగులైతే 45 మార్కులు చాలు. ఇంటర్వ్యూలో క్వాలిఫై మార్కులు పొందిన వారు పరీక్షలో సాధించిన మార్కుల్లో 3/4 వంతు, ఇంటర్వ్యూ స్కోరులో 1/4 వంతు మార్కులు కలిపి మెరిట్‌ లిస్ట్​ రూపొందించి, ఉద్యోగానికి తీసుకుంటారు.

ఆన్లైన్​ ఎగ్జామ్

ఇందులో 200 ప్రశ్నలు ఉంటాయి. ప్రతి ప్రశ్నకు ఒకటి చొప్పున 200 మార్కులు కేటాయిస్తారు. పరీక్ష సమయం 2 గంటలు. తప్పు సమాధానానికి పావు మార్కు కట్ చేస్తారు. వీటిని ఆబ్జెక్టివ్‌ విధానంలోనే అడుగుతారు. ఇంగ్లిష్, హిందీ లాంగ్వేజ్​లలో ప్రశ్నలుంటాయి. ఇంగ్లీష్ విభాగం ప్రశ్నలు మాత్రం ఆంగ్లంలోనే వస్తాయి.

IDBI Executives Recruitment - 2024 (ETV Bharat)

శాలరీ

ఎగ్జిక్యూటివ్‌ సేల్స్‌ అండ్‌ ఆపరేషన్స్‌లో చేరినవారికి తొలి ఏడాది ప్రతి నెల రూ.29,000, రెండో ఏడాది రూ.31,000 చొప్పున చెల్లిస్తారు. రెండేళ్ల సేవల అనంతరం బ్యాంకు నిర్వహించే టెస్ట్​లో విజయవంతమైతే వీరినీ శాశ్వత ప్రాతిపదికన విధుల్లోకి తీసుకుని, జూనియర్‌ అసిస్టెంట్‌ మేనేజర్‌ గ్రేడ్‌ ‘ఓ’ హోదా కల్పిస్తారు. ఈ టైంలో ఏడాదికి రూ.6.14- రూ.6.50 లక్షలు వేతనం అందుతుంది.

ప్రశ్నలు ఏ అంశాల్లో?

✦ లాజికల్‌ రీజనింగ్, డేటా అనాలిసిస్‌ అండ్‌ ఇంటర్‌ప్రెటేషన్‌ : నాన్‌ వెర్బల్‌ సిరీస్, అనాలజీ, కోడింగ్‌-డీకోడింగ్, ఆడ్‌మన్‌ అవుట్, క్లాక్, క్యాలెండర్, బ్లడ్​ రిలేషన్స్, డైరెక్షన్స్, క్యూబ్స్, డైస్, వెన్‌ చిత్రాలు, కౌంటింగ్‌ ఫిగర్స్, పజిల్స్, సిలాజిజమ్, ర్యాంకింగ్, సీక్వెన్స్, సింబాలిక్‌ ఆపరేషన్స్, నంబర్‌ ఎనాలజీ, ఫిగర్‌ ఎనాలజీ, వెన్‌ డయాగ్రమ్స్, నంబర్‌ క్లాసిఫికేషన్, సిరీస్, వర్డ్‌ బిల్డింగ్‌ తదితర సెక్షన్స్​లలో ప్రశ్నలు వస్తాయి. ఎక్కువ ప్రశ్నలు లాజిక్​తో ముడిపడి ఉంటాయి. మేథ్స్​లోని ప్రాథమికాంశాలపై అవగాహన ఉండాలి. వీలైనన్ని మాదిరి ప్రశ్నలు ట్రై చేయాలి.

✦ జనరల్‌/ ఎకానమీ/ బ్యాంకింగ్‌ అవేర్‌నెస్‌/ కంప్యూటర్‌/ ఐటీ : బ్యాంకులు, ఆర్థిక వ్యవహారాలకు అధిక ప్రాధాన్యం. అందువల్ల.. రిజర్వ్​ బ్యాంక్​ ఆఫ్ ఇండియా, బ్యాంక్‌ పదజాలం, బీమా, రెపో, రివర్స్‌ రెపో, వడ్డీరేట్లు, బ్యాంకుల కార్యకలాపాలు, బ్యాంకుల విలీనం, తాజా ఆర్థిక నిర్ణయాలు, బ్యాంకులు- మెయిన్ ఆఫీసులు- అధిపతులు.. ఇవన్నీ తెలుసుకోవాలి. జనరల్‌ అవేర్‌నెస్‌లో భాగంగా కరెంట్​ అఫైర్స్​ ప్రశ్నలుగా వస్తాయి. దేశ చరిత్ర, సంస్కృతి, భూగోళం, పాలిటీ, సైన్స్‌ల్లో ప్రైమరీ అవగాహనను పరిశీలిస్తారు. నియామకాలు, అవార్డులు, విన్నర్స్, ఎలక్షన్స్, బుక్స్-ఆథర్స, ప్రముఖుల పర్యటనలు, మరణాలకు ప్రాధాన్యమివ్వాలి. ఎకనామిక్స్‌లో బేసిక్ టాపిక్స్ చదువుతూ, ఆర్థిక ఒప్పందాలపై అవగాహన పెంచుకోవాలి. కంప్యూటర్‌/ఐటీల బేసిక్ నాలెడ్జి తప్పనిసరి. బ్యాంకు కార్యకలాపాలకు అవసరమయ్యే కనీస టెక్నికల్ ఐడియాను/నాలెడ్జిని పరిశీలిస్తారు.

✦ క్వాంటిటేటివ్‌ ఆప్టిట్యూడ్‌ :పర్సంటేజ్స్​, నిష్పత్తి-అనుపాతం, ప్రాఫిట్ అండ్ లాస్, చక్రవడ్డీ, బారువడ్డీ, కాలం-దూరం, టైం అండ్ వర్క్, పడవలు-ప్రవాహాలు, రైళ్లు, సరాసరి, వ్యాపార భాగస్వామ్యం ఇలా ప్రతి అంశం నుంచి ఒక ప్రశ్న వస్తుంది. సమాధానం త్వరగా గుర్తించడానికి లాజిక్, షార్ట్‌ కట్స్‌ వాడాలి. వీలైనన్ని మాదిరి ప్రశ్నల ప్రాక్టీస్ ద్వారా జవాబు త్వరగా గుర్తించే నైపుణ్యం సొంతమవుతుంది.

✦ ఇంగ్లిష్‌ లాంగ్వేజ్‌ :ఆంగ్లవ్యాకరణంపై అవగాహన పెంచుకోవాలి. వేగంగా చదివి, సమాచారాన్ని గ్రహించే నైపుణ్యాలు పెంపొందించుకుంటే కాంప్రహెన్షన్‌లో అధికంగా మార్కులు పొందవచ్చు. ఇంగ్లీష్ న్యూస్​ పేపర్స్​ చదవడం, వార్తలు వినడం ద్వారా భాషపై పట్టు పెంచుకోవడానికి ప్రయత్నించాలి. కాంప్రహెన్షన్, క్లోజ్‌ టెస్టు, జంబుల్డ్‌ సెంటెన్స్, సెంటెన్స్‌ ఇంప్రూవ్‌మెంట్‌/కరెక్షన్‌ నుంచి కొన్ని, గ్రామర్​ నుంచి వర్డ్‌ సబ్‌స్టిట్యూషన్, ఇడియమ్స్‌ అండ్‌ ఫ్రేజెస్, సిననిమ్స్‌- యాంటనిమ్స్, వాయిస్, డైరెక్ట్, ఇండైరెక్ట్‌ స్పీచుల్లో క్వశ్చిన్స్ అడుగుతారు.

ముఖ్య వివరాలు

ఖాళీలు : ఎగ్జిక్యూటివ్‌ సేల్స్‌ అండ్‌ ఆపరేషన్స్‌ 1000 ఖాళీల్లో.. అన్​ రిజర్వడ్​ 448, ఓబీసీ 231, ఎస్సీ 127, ఎస్టీ 94, ఈడబ్ల్యుఎస్‌ 100 పోస్టులు ఉన్నాయి

క్వాలిఫికేషన్ : ఏదైనా డిగ్రీ

వయసు :అక్టోబరు 1, 2024 నాటికి 20 - 25 వయస్సు లోపు ఉండాలి. అంటే అక్టోబరు 2, 1999 - అక్టోబరు 1, 2004 మధ్య జన్మించినవారు అర్హత కలిగివున్నట్లే. ఎస్సీ, ఎస్టీలకు ఐదేళ్లు, ఓబీసీలకు మూడేళ్లు, దివ్యాంగులకు పదేళ్లు గరిష్ఠ వయసులో రిలాక్షన్స్ వర్తిస్తాయి.

ఆన్‌లైన్‌ దరఖాస్తుకు చివరి తేదీ :నవంబరు 16 2024

ఆన్‌లైన్‌ పరీక్ష తేదీ :1-డిసెంబరు -2024 (ఆదివారం)

తెలుగు రాష్ట్రాల్లో ఆన్‌లైన్‌ పరీక్ష కేంద్రాలు : ఆంధ్రప్రదేశ్​లో.. ఏలూరు, గుంటూరు, కడప, కాకినాడ, కర్నూలు, నెల్లూరు, ఒంగోలు, రాజమహేంద్రవరం, శ్రీకాకుళం, తిరుపతి, విజయవాడ, వైజాగ్, విజయనగరం. తెలంగాణలో.. హైదరాబాద్, కరీంనగర్, ఖమ్మం, వరంగల్‌ జిల్లాలో మాత్రమే.

అప్లికేషన్ ఫీజు :ఎస్సీ, ఎస్టీ, దివ్యాంగులకు రూ.250. మిగిలిన అందరికీ రూ.1050

వెబ్‌సైట్‌:https://www.idbibank.in/idbi-bank-careers-current-openings.aspx

ఇలా ప్రిపరేషన్ ఐతే బెటర్ :

⍟ ఎగ్జామ్​కు సుమారు 20 రోజులే ఉంది. ఈ తక్కువ టైం ఇప్పటికే బ్యాంకు పరీక్షలకు సన్నద్ధమవుతున్నవారికి మంచి అవకాశం. ఇటీవలే గ్రాడ్యుయేషన్‌ పూర్తిచేసిన లేటెస్ట్ అభ్యర్థులు ముందుగా ప్రాథమికాంశాలతో అధ్యయనం ప్రారంభించాలి. అనంతరం ఎక్కువ మార్కులు సాధించడానికి అనుకూలమైన అంశాలను పూర్తిచేసుకోవాలి. ఆ తర్వాత మిగిలిన అంశాలను స్టడీ చేయాలి.

⍟ పరీక్షలో ఉన్న ప్రాధాన్యం దృష్ట్యా రీజనింగ్, జనరల్‌ అవేర్‌నెస్‌ పార్ట్​లపై ప్రత్యేక శ్రద్ధ వహించాలి.

⍟ అంశాలన్నీ కనీసం 15 రోజుల్లో పూర్తిచేసుకోవాలి. చివరి 5 రోజులు మాక్‌ టెస్టులకు సమయం కేటాయించాలి. ఐబీపీఎస్, ఎస్‌బీఐ పీవో పాత ప్రశ్నపత్రాలనూ బాగా ప్రాక్టీస్ చేయాలి.

⍟ మాక్‌ టెస్టులతో ఎగ్జామ్ విధానానికి అలవాటు పడటమే కాకుండా నిర్ణీత సమయంలో ఏ విభాగంలో ఎన్ని క్వశ్చిన్స్ సాధించగలుగుతున్నారో తెలుస్తుంది. దాని ప్రకారం ఎంత వేగంతో సమాధానం ఇవ్వాలో అర్థం చేసుకుని, ప్రాక్టీస్​ను మెరుగుపరచుకోవాలి.

⍟ మాక్‌ టెస్టుల్లో ఇబ్బంది పడుతోన్న, తప్పులు జరుగుతోన్న టాపిక్స్​పై ప్రత్యేక దృష్టి సారించాలి. తర్వాత టెస్ట్​లో పునరావృతం కాకుండా చూసుకోవాలి. ఇలా విశ్లేషించుకుంటూ రెడీ అయితే తక్కువ వ్యవధిలోనే అంశాలు, సమయ పాలనపై పట్టు సాధించవచ్చు.

⍟ నెగటీవ్ మార్కులు ఉన్నందున తెలియని ప్రశ్నను వదిలేయడమే మంచిది. అలాగే ఎక్కవ టైం తీసుకునే ప్రశ్నలను చివరలోనే ప్రయత్నించాలి. ప్రతి సెక్షన్‌లోనూ మినిమం మార్కులు పొందేలా చూసుకోవాలి. స్వల్ప వ్యవధిలో పూర్తయ్యే తేలికైన ప్రశ్నలకు పరీక్షలో అధిక ప్రాధాన్యమివ్వాలి.