ప్రేమ పేరుతో యువకుడు - దెయ్యం వదిలిస్తానని స్వామిజీ - మైనర్ బాలిక​పై లైంగిక దాడి

Swamiji Rape On Minor Girl: తిరుపతి జిల్లా రేణిగుంటలో జరిగిన దారుణ ఘటన సంచలనం రేపింది. దెయ్యం వదిలిస్తానంటూ ఓ స్వామీ, ప్రేమ పేరుతో మోసం చేసిన మరో యువకుడు అమాయకురాలైన మైనర్‌ బాలిక (14)పై లైంగిక దాడులకు పాల్పడ్డారు.

Rape On Minor Girl in Tirupati :తిరుపతి జిల్లా రేణిగుంటలో జరిగిన దారుణ ఘటన సంచలనం రేపింది. ప్రేమ పేరుతో ఓ యువకుడు, దెయ్యం వదిలిస్తానంటూ స్వామీజీ అమాయకురాలైన మైనర్‌ బాలిక (14)పై లైంగిక దాడులకు పాల్పడ్డారు. జరిగిన విషయాన్ని బాధితురాలు మైనర్ బాలిక తల్లిదండ్రులకు చెప్పి పోలీసులను ఆశ్రయించింది. రేణిగుంట మండలం గాజులమండ్యం పోలీసులు తెలిపిన వివరాల మేరకు అన్నమయ్య జిల్లా రైల్వే కోడూరుకు చెందిన ఓ కుటుంబం పిల్లల చదువుల కోసం తిరుపతికి వచ్చారు. కుటుంబంలోని మైనర్ బాలిక ఓ పాఠశాలలో చదువుకుంటోంది.

ఆ బాలికకు 7 నెలల క్రితం రైలు ప్రయాణంలో మహమ్మద్ షఫీ అనే యువకుడితో పరిచయం ఏర్పడింది. తన పేరు అభిరామ్ అని, తిరుపతిలోని ఒక ప్రైవేటు కంపెనీలో ఉద్యోగం చేస్తున్నట్లు బాలికను నమ్మించాడు. అభిరామ్ అలియాస్ మహమ్మద్ షఫీతో ఏర్పడిన పరిచయం కొద్ది రోజులకు ప్రేమగా మారింది. అతడ్ని పూర్తిగా నమ్మిన మైనర్ బాలిక అవసరాలకు ఇంట్లోని డబ్బు, నగలను తీసుకెళ్లి ఇచ్చింది. ఇంటిలోని డబ్బు, నగలు కనిపించకపోవడంతో నిలదీసిన తల్లిదండ్రులకు అసలు విషయం చెప్పింది.

మైనర్‌ కుమార్తెపై అత్యాచారం- కీచక తండ్రికి 150 ఏళ్ల జైలు శిక్ష!

ఆ నిజమే శాపమైంది :అభిరామ్ అలియాస్ మహమ్మద్ షఫీతో ఉన్న ప్రేమ వ్యవహారాన్ని కుమార్తె తల్లిదండ్రులకు చెప్పింది. దెయ్యం పట్టిందని భావించిన తల్లిదండ్రులు కొందరి సలహాతో రేణిగుంటలోని రాజరాజేశ్వరీ ఆశ్రమానికి తీసుకెళ్లారు. బాలికకు మానసిక స్థితి బాగోలేదని, దెయ్యం పట్టిందని నమ్మించిన ఆశ్రమ నిర్వాహకుడు మూర్తి స్వామి 3 రోజులపాటు బాలికతో అర్ధరాత్రి ఒంటరిగా పూజలు చేయాలన్నాడు. ఈ మేరకు బాలిక తల్లిదండ్రులను నమ్మించాడు. గత నెల ఫిబ్రవరి 20న రాత్రి మైనర్ బాలికను పూజలు చేయించేందుకు తండ్రి ఆశ్రమానికి తీసుకెళ్లాడు.

ఈ క్రమంలో మూర్తిస్వామి తండ్రిని ఒక గదిలో ఉంచి, మరొక గదిలోకి మైనర్ బాలికను తీసుకెళ్లి లైంగిక దాడికి పాల్పడ్డాడు. లైంగిక దాడి విషయాన్ని బయట వ్యక్తులకు చెబితే తల్లిదండ్రులకు క్షుద్రపూజలు చేసి కాళ్లు, చేతులు పోగడతానని మైనర్ బాలికను భయపెట్టాడు. జరిగిన అఘాయిత్యాన్ని తల్లిదండ్రులకు చెబితే లాభం లేదనుకున్న బాలిక ప్రియుడు అభిరామ్ అలియాస్ మహమ్మద్ షఫీకి చెప్పింది. శ్రీరాజేశ్వరి పీఠం నిర్వాహకుడు మూర్తిస్వామి దొంగ అవతారాన్ని బయట పెడతానన్న మహమ్మద్ షఫీ, తల్లిదండ్రులతో ఆశ్రమానికి వచ్చిన మైనర్ బాలికను పక్కా పథకం ప్రకారం కిడ్నాప్ చేసాడు. స్నేహితులు షమర్, శరత్​ల సాయంతో మైనర్ బాలికను కారులో తీసుకెళ్లాడు. ఆశ్రమంలో కూమార్తె కనిపించకపోవడంతో బాలిక తండ్రి పోలీసులను ఆశ్రయించాడు. ఈ మేరకు గాజులమండ్యం పోలీసులు మిస్సింగ్ కేసు నమోదు నమోదు చేశారు.

పక్కా పథకం ప్రకారం :మైనర్ బాలికను తీసుకెళ్లిన యువకుడు, 3 రోజుల పాటు నెల్లూరులోని ఓ లాడ్జిలో ఉంచాడు. అక్కడి నుంచి తెలంగాణలోని అదిలాబాద్ జిల్లా మంచిర్యాలలోని రాముడి గుడికి తీసుకెళ్లి పెళ్లి చేసుకున్నాడు. మంచిర్యాల నుంచి హైదరాబాద్ చేరుకుని వారం రోజుల పాటు అక్కడే ఉన్న షఫీ బాలికపై లైంగిక దాడికి పాల్పడ్డాడు. అనంతరం షఫీ తీరుపై అనుమానం వచ్చిన మైనర్ బాలిక ఆధార్ కార్డు పరిశీలించింది. తాను ప్రేమించింది అభిరామ్​ను కాదని, మహమ్మద్ షఫీ అని తెలుసుకుని తల్లిదండ్రులకు సమాచారం ఇచ్చింది. మోసపోయిన తీరును తల్లిదండ్రులకు చెప్పుకుంది. తల్లిదండ్రుల ద్వారా జరిగిన విషయాలు తెలుసుకున్న పోలీసులు ఆశ్చర్యానికి గురయ్యారు.

ఈ మేరకు పోలీసులు మైనర్ బాలికను చైల్డ్ వెల్ఫేర్, మహిళ కమిషన్, మహిళ జడ్జి ఎదుట హాజరుపరిచారు. రేణిగుంట డీఎస్పీ భవ్య కిషోర్ నేతృత్వంలో జరిగిన వైద్య పరీక్షల ఆధారంగా మైనర్ బాలికపై లైంగిక దాడికి పాల్పడిన ఆశ్రమ నిర్వాహకుడు మూర్తి స్వామి, అభిరామ్ అలియాస్ మహమ్మద్ షఫీలపై పలు సెక్షన్​లపై కేసు నమోదు చేశారు. అభిరామ్ అలియాస్ మహమ్మద్ షఫీ, అతని స్నేహితులు షమర్, శరత్​లను అదుపులోకి తీసుకొని రిమాండ్​కు తరలించారు. పరారీలో ఉన్న ఆశ్రమ నిర్వాహకుడు మూర్తిస్వామి కోసం గాలిస్తున్నారు. ప్రత్యేక బృందాలను ఏర్పాటు చేసి గాలిస్తున్నట్లు డీఎస్పీ భవ్య కిషోర్ మీడియాకు తెలిపారు.