Agriculture BSC Course At Jayashankar University :ఆచార్య జయశంకర్ తెలంగాణ రాష్ట్ర అగ్రికల్చర్ యూనివర్సిటీలో 2024-25 విద్యాసంవత్సరానికి సంబంధించి బీఎస్సీ(ఆనర్స్‌) అగ్రికల్చర్ కోర్సులో సెల్ఫ్ ఫైనాన్స్ కోటా సీట్లు భారీగా పెరిగాయి. ప్రస్తుతం ఈ కోటా కింద 227 సీట్లుండగా మరో 200 పెంచినట్లుగా వర్సిటీ ఉపకులపతి(వీసీ) అల్దాస్‌ జానయ్య తెలిపారు. ఈ సీట్లకు ప్రవేశ, వార్షిక రుసుములను తగ్గించినట్లు పేర్కొన్నారు.
ప్రవేశ రుసుం తగ్గింపు :ప్రస్తుతం బీఎస్సీ అగ్రికల్చర్ కోర్సులో ప్రవేశ రుసుం రూ.3 లక్షలు ఉండగా రూ.65 వేలకు, 4 ఏళ్లకు కలిసి మొత్తం రుసుం రూ.10 లక్షలు ఉండగా రూ.5 లక్షలకు తగ్గించినట్లుగా ఆయన వివరించారు. సెల్ఫ్ ఫైనాన్స్ సీట్లను భర్తీ చేసేందుకు త్వరలోనే ప్రత్యేక కౌన్సెలింగ్‌ నిర్వహించనున్నారు. తెలంగాణ అగ్రికల్చర్ వర్సిటీ పరిధిలోని ప్రభుత్వ వ్యవసాయ కళాశాలల్లో సీట్లకు భారీ డిమాండ్‌ ఉంది. ఈ సీట్లకోసం రెండు లక్షల మందికి పైగా దరఖాస్తు చేసుకున్నారు.
200 సెల్ఫ్ ఫైనాన్స్ సీట్లు పెంపు :ప్రస్తుతం కన్వీనర్‌ కోటాలో 615 సీట్లున్నాయి. సెల్ఫ్ ఫైనాన్స్ కింద 227 ఉన్నాయి. మొదటి విడత కౌన్సెలింగ్‌లో కన్వీనర్‌ కోటాలో సీట్లలో 98 శాతానికి పైగా భర్తీ అయ్యాయి. దీంతో చాలామంది విద్యార్థులు సెల్ఫ్ ఫైనాన్స్ సీట్లను ఆశిస్తున్నారు. ప్రవేశ రుసుములు భారీగా ఉండడంతో పేద విద్యార్థులకు అందుబాటులో లేవనే ఫిర్యాదులు వచ్చాయి. ఈ విషయాన్ని విద్యార్థుల తల్లిదండ్రులు కొత్త ఉపకులపతి జానయ్య దృష్టికి తెచ్చారు. ప్రభుత్వంతో ఆయన చర్చించిన అనంతరం సెల్ఫ్ ఫైనాన్స్ సీట్లు పెంచాలని నిర్ణయించారు.