Problems in Special Officer Rule : పల్లెల్లో ప్రత్యేక అధికారుల పాలన పడకేసింది. పాలకవర్గాల గడువు ముగియడంతో, ప్రత్యేక అధికారుల పాలనలో నెట్టుకొస్తున్న పంచాయతీల్లో, ప్రత్యేక అధికారుల పాలనతో కొత్త చిక్కులు తప్పడం లేదు. అసలే ఉన్న సమస్యలతో కొట్టుమిట్టాడుతున్న గ్రామాల్లో, ఒక్కో అధికారికి మూడు నాలుగు పంచాయతీల నిర్వహణ బాధ్యతలు అప్పగించడం, వారు చుట్టపు చూపుగానే పల్లెల్లో పర్యటనలు చేస్తుండటంతో, సమస్యల చిట్టా అంతకంకతూ పేరుకుపోతోంది.
ప్రధానంగా తాగునీటి సమస్యలతో ప్రజలకు ఇబ్బందులు తప్పడం లేదు.మిషన్ భగీరథ(Mission Bhagiratha) పైపులైన్ల లీకేజీలు వారాల తరబడి పరిష్కారం లేకపోవడం, పాడైన చేతిపంపులు నెలల తరబడి మరమ్మతులు చేయకపోవడం, పారిశుధ్ధ్యంపై పర్యవేక్షణ కొరవడటం వంటి సమస్యలతో పంచాయతీలు విలవిల్లాడుతున్నాయి. పర్యవేక్షించాల్సిన అధికారులు, విధుల భారంతో వారానికోసారి కూడా అటువైపు కన్నెత్తి చూడకపోవడంతో, చాలావరకు పంచాయతీల్లో ప్రజలకు ఇబ్బందులు తప్పడం లేదు
Special Officer Rule in Villages :ఖమ్మం జిల్లాలో 589, భద్రాద్రి కొత్తగూడెం జిల్లాలోని 481 గ్రామ పంచాయతీల్లో ప్రత్యేక అధికారుల పాలన కొనసాగుతోంది. ఈ ఏడాది జనవరి నెలాఖరుకు గ్రామాల్లో పాలకవర్గాల గడువు ముగియడంతో, ప్రభుత్వం ప్రత్యేక అధికారుల పాలనకు శ్రీకారం చుట్టింది. పెద్ద పంచాయతీలకు మండల అధికారులు, చిన్న పంచాయతీలకు ఇతర ప్రభుత్వ శాఖల అధికారులు, సిబ్బందిని ప్రత్యేక అధికారులుగా నియమించి పాలన సాగిస్తున్నారు.
ప్రత్యేక అధికారుల పర్యవేక్షణ లేకపోవడంతో గ్రామాల్లో ఎక్కడికక్కడ సమస్యలు పేరుకుపోతున్నాయి. ఎక్కువ గ్రామాల్లో తాగునీటి ఇబ్బందులు తలెత్తుతున్నాయి. మిషన్ భగీరథ పైపులైన్లు చాలాచోట్ల లీకై నీటి సరఫరా జరగడం లేదు. గ్రామాల్లో బోర్లు పాడైపోయాయి. వాటిని బాగు చేయించే నాథుడే లేకుండా పోయారు. భూగర్భ జలాలు అడుగంటి చేతి పంపులు వట్టిపోతున్నాయి. పారిశుధ్ధ్యం అస్తవ్యస్తంగా మారింది. మురుగు కాల్వల శుభ్రత వారానికోసారి కూడా సాధ్యం కాకపోవడం వల్ల, పారిశుధ్ధ్యం పడకేసింది.