Chandrababu Stone Pelting Case : చంద్రబాబుపై రెండేళ్ల నాటి రాళ్లదాడి కేసులో వైఎస్సార్సీపీ అధినేత జగన్‌కి అత్యంత సన్నిహితులైన మొండితోక సోదరుల చుట్టూ ఉచ్చు బిగుస్తోంది. అప్పటి నందిగామ ఎమ్మెల్యే జగన్మోహనరావు, ఆయన సోదరుడు ఎమ్మెల్సీ అరుణ్‌కుమార్‌ల ఆధ్వర్యంలో అప్పటి ప్రతిపక్ష నేత చంద్రబాబును అంతమొందించే కుట్రకు ప్రణాళిక రచించి, తమ అనుచరులతో అమలుచేసినట్లు పోలీసుల దర్యాప్తులో వెల్లడైంది. వీరి పేర్లను నిందితుల జాబితాలో చేర్చనున్నట్లు సమాచారం. నిందితుల విచారణలో వీరి పాత్ర వెల్లడైంది. ఇప్పటికే 17 మందిని నిందితులుగా గుర్తించి, నలుగురిని అరెస్టు చేశారు. త్వరలో మరిన్ని కీలక అరెస్టులు ఉండొచ్చని తెలుస్తోంది.
2022 నవంబర్ 4న అప్పటి ప్రతిపక్ష నేత చంద్రబాబు ‘బాదుడే బాదుడు’ కార్యక్రమంలో భాగంగా నందిగామలో పర్యటించారు. అ రోజు సాయంత్రం 6:30 గంటలకు ఆయన వాహనం గాంధీబొమ్మ సెంటర్‌ నుంచి మున్సిపల్‌ కార్యాలయం వైపు వెళ్తుండగా రైతుబజార్‌ వద్ద రాళ్లదాడి జరిగింది. ఇందులో సీఎస్‌ఓ మధుకు గాయమైంది. చంద్రబాబు పర్యటనకు రెండు రోజుల ముందు నాటి ఎమ్మెల్యే జగన్మోహనరావు, ఎమ్మెల్సీ అరుణ్‌కుమార్‌ తమ అనుచరులతో భేటీ అయ్యారు.
Chandrababu Convoy Attack Case : చంద్రబాబు కార్యక్రమాన్ని భగ్నం చేసేందుకు కుట్రపన్నారు. ఇందుకు మూడు గ్యాంగ్లను ఏర్పాటుచేశారు. ఓ బృందం విద్యుత్ సరఫరా నిలిపివేయడానికి, మరో రెండు రాళ్లతో దాడి చేసేందుకు ఏర్పాటయ్యాయి. ఒక బృందం గురితప్పినా మరొకటి పని పూర్తిచేసేలా ప్రణాళిక సిద్ధమైంది. అనుకున్నట్లే ఒక గ్యాంగ్ చంద్రబాబు పర్యటన మార్గం వెంబడి కరెంట్ సరఫరాను నిలిపివేసింది. ఇంతలో ఓ బృందం వెంట తెచ్చుకున్న రాళ్లతో దాడిచేసింది.
ఈ ఘటనపై దర్యాప్తులో అప్పటి పోలీసులు నిర్లక్ష్యం ప్రదర్శించారు. వైఎస్సార్సీపీ నేతలకు ఇబ్బంది కలగకూడదనే నాటి విజయవాడ పోలీసు కమిషనర్‌ దర్యాప్తును పక్కదారి పట్టించారు. దాడి సమయంలో చాలామంది చంద్రబాబుపై పూలు చల్లుతున్నారు ఈ క్రమంలో గుర్తుతెలియని వ్యక్తి రాయి గానీ, అలాంటి వస్తువు విసిరి ఉంటాడని భావిస్తున్నామని అప్పటి సీపీ కాంతిరాణా బాధ్యతారహితంగా వ్యాఖ్యలు చేయడంపై అప్పట్లో విమర్శలు వ్యక్తమయ్యాయి. దాడిపై కేవలం సెక్షన్‌ 324 కింద కేసు నమోదు చేశారు. ఈ సెక్షన్‌ కింద ఏడు సంవత్సరాలలోపు శిక్షకే ఆస్కారం ఉంది.