జగన్ 'సిద్ధం' సభలకు ఆర్టీసీ బస్సులు ఫుల్​ - ఓటేసే వారికి నైయ్‌ - మర్మమేంటో ! - NO Special Buses For Voters

NO Special APSRTC Buses For Voters: సార్వత్రిక ఎన్నికల వేళ సొంతూళ్లకు వెళ్లేవారికి తగినన్ని బస్సులు సమకూర్చడంలో ఆర్టీసీ చేతులెత్తేసింది. రద్దీకి అనుగుణంగా ప్రత్యేక బస్సులు ఏర్పాటు చేయడంలో విఫలమైంది. హైదరాబాద్‌ నుంచి ఎలాగోలా విజయవాడ చేరుకున్నా అక్కడి నుంచి జిల్లాలకు బస్సుల కొరతతో అష్టకష్టాలు పడ్డారు. అధికార పార్టీ సభలకు దండిగా బస్సులను సమకూర్చే అధికారులకు ఇప్పుడెందుకు చేతకాలేదనే విమర్శలు వెల్లువెత్తుతున్నాయి.

NO Special APSRTC Buses For Voters :జగన్‌ సిద్ధం సభలు అనగానే వేల సంఖ్యలో బస్సులు సమకూర్చి స్వామిభక్తి చాటుకున్న ఆర్టీసీ ఎండీ ద్వారకా తిరుమలరావు ఓటేసేందుకు సొంతూళ్లకు వచ్చే సామాన్య ప్రజలకు మాత్రం ఏర్పాటు చేయడంలో విఫలమయ్యారు. అవసరమైనన్ని బస్సులు ఏర్పాటు చేయకుండా ''వాళ్లచావు వాళ్లు చావని'' అనేలా వదిలేశారు. హైదరాబాద్, చెన్నై, బెంగళూరు వంటి నగరాల్లోని ఏపీకి చెందిన వారంతా ఓటేసేందుకు తప్పకుండా సొంతూళ్లకు వస్తారనేది అందరికీ తెలిసిన విషయమే అయినా డీజీపీ ర్యాంక్‌ అధికారి అయిన ఆర్టీసీ ఎండీకి మాత్రం ఎందుకు తెలియలేదనేది ఆశ్చర్యం కలిగిస్తోంది. హైదరాబాద్‌ నుంచి వచ్చే బస్సుల్లో సీట్లన్నీ ముందే బుక్‌ కావడంతో మరిన్ని ప్రత్యేక బస్సులు ఏర్పాటు చేయకుండా ఆర్టీసీ అధికారులు చోద్యం చూశారు. దీంతో ప్రయాణికులు తీవ్ర ఇబ్బందులు ఎదుర్కొంటున్నారు.

Andhra Pradesh Election 2024 :సంక్రాంతికి ఊళ్లకి వచ్చేవారి కోసం రెగ్యులర్‌ బస్సులు కాకుండా ఏటా దాదాపు 4 వేల వరకు ప్రత్యేక బస్సులు, అదే సంఖ్యలో తిరుగు ప్రయాణం కోసం అందుబాటులో ఉంచుతారు. ఎన్నికల సమయంలో కూడా దాదాపు అంతే రద్దీ ఉంటుంది. పైగా సోమవారం పోలింగ్‌ జరగనుండగా శని, ఆదివారాలు వరుసగా సెలవులు వచ్చాయి. దీంతో రద్దీ అధికంగా ఉంటుందనే కనీస అంచనా కూడా వేయలేకపోయారు. హైదరాబాద్‌ నుంచి రాష్ట్రంలోని అన్ని జిల్లాలకు రెగ్యులర్‌ సర్వీసులతో పాటు అదనంగా శుక్ర, శనివారాల్లో రోజుకు 300 చొప్పున మాత్రమే ప్రత్యేక బస్సులు ఏర్పాటు చేశారు. శనివారం 205 బస్సులే సిద్ధం చేశారు. దీంతో అవి ఏమాత్రం సరిపోవడం లేదు.

హైదరాబాద్‌ నుంచి విజయవాడ, మచిలీపట్నం, కోనసీమ, తూర్పుగోదావరి, పశ్చిమగోదావరి, ఏలూరు, గుంటూరు, నర్సరావుపేట, ఒంగోలు, నెల్లూరు, నంద్యాల, కర్నూలు, కడపలకు వెళ్లే బస్సుల్లో అత్యంత రద్దీ నెలకొంది. ఆయా జిల్లాలకు మరిన్ని అదనపు బస్సులు నడపలేక చేతులెత్తేశారు. తెలంగాణ ఆర్టీసీ వరుసగా మూడు రోజులు కలిపి 400 ప్రత్యేక బస్సులు నడుపుతున్నా అవి కూడా సరిపోవడంలేదు. శనివారం ఉదయం నుంచి ఆర్టీసీ సర్వర్‌లో సాంకేతిక సమస్యలు తలెత్తడం వల్ల టికెట్ల జారీలోనూ ఇబ్బందులు ఏర్పడ్డాయి. కొందరు ప్రయాణికులకి డబ్బులు కట్‌ అయినా టికెట్లు జారీ కాలేదు. ప్రయాణికుల రద్దీని ఆసరాగా చేసుకుని పలు ప్రైవేట్‌ ట్రావెల్‌ సంస్థలు నిలువు దోపిడీ చేస్తున్నాయి. హైదరాబాద్‌ నుంచి విశాఖపట్నానికి 4 వేల రూపాయల వరకు ఛార్జీలు పెంచాయి.

ఈ నెల 8 నుంచి ఆదివారం వరకు హైదరాబాద్‌ నుంచి రాష్ట్రంలో వివిధ ప్రాంతాలకు వెయ్యీ 48 ప్రత్యేక బస్సులు అందుబాటులో ఉంచామని ఆర్టీసీ పేర్కొంది. వీటన్నింటిలో సాధారణ ఛార్జీలే వసూలు చేస్తున్నట్లు ఎండీ ద్వారకా తిరుమలరావు శనివారం ఓ ప్రకటనలో తెలిపారు.