Ministers have Expressed Nara Ramamurthy Naidu Condolences : ముఖ్యమంత్రి చంద్రబాబు సోదరుడు, మాజీ ఎమ్మెల్యే నారా రామ్మూర్తి నాయుడు మృతి పట్ల రాష్ట్ర మంత్రులు, ఎంపీలు, ఎమ్మెల్యేలు, ఎమ్మెల్సీలు తీవ్ర దిగ్భ్రాంతి వ్యక్తం చేశారు. డిప్యూటీ సీఎం పవన్‌కల్యాణ్‌, మంత్రులు నారా లోకేశ్, శాసనసభాపతి చింతకాయల అయ్యన్నపాత్రుడు, కొల్లురవీంద్ర, గొట్టిపాటి రవికుమార్‌, అనగాని సత్యప్రసాద్‌, అచ్చెన్నాయుడు, నారాయ‌ణ, నిమ్మల రామానాయుడు, డోలాబాలవీరాంజనేయస్వామి, మండిపల్లి రాంప్రసాద్ రెడ్డి, కందుల దుర్గేష్, బీసీ జనార్థన్ రెడ్డి, సవిత, ఎంపీ కేశినేని శివ‌నాథ్ (చిన్ని), చీఫ్ విప్ జీవీ ఆంజనేయులు, శాసనమండలి చీఫ్ విప్ పంచుమర్తి అనురాధ సంతాపం వ్యక్తం చేశారు. మాజీ ఎమ్మెల్యే నారా రామ్మూర్తి నాయుడు మృతి వార్త తీవ్ర దిగ్భ్రాంతి క‌లిగించిందన్నారు.
ప్రముఖుల సంతాపం: తమ్ముడు రామ్మూర్తినాయుడు నన్ను విడిచి వెళ్లిపోయాడని బాధాతప్త హృదయంతో అందరికీ తెలియచేస్తున్నానని సీఎం చంద్రబాబు అన్నారు. రామ్మూర్తి నాయుడు ప్రజాజీవితంలో పరిపూర్ణ మనసుతో ప్రజలకు సేవలు చేశాడని కొనియాడారు. మా నుంచి దూరమై కుటుంబంలో ఎంతో విషాదం నింపాడని, రామ్మూర్తినాయుడి ఆత్మకు శాంతి కలగాలని కోరుకుంటున్నానని సీఎం చంద్రబాబు అన్నారు.
కుటుంబ సభ్యులకు ప్రగాఢ సానుభూతి : ఎమ్మెల్యేగా చంద్రగిరి నియోజకవర్గానికి నారా రామ్మూర్తి నాయుడు చేసిన సేవలు ఎనలేనివని కొనియాడారు. ప్రజల సంక్షేమం కోసం నారా రామ్మూర్తి నాయుడు అందించిన కృషి ఎప్పటికీ చిరస్మరణీయమన్నారు. మాజీ ఎమ్మెల్యే నారా రామ్మూర్తి నాయుడు కుటుంబస‌భ్యుల‌కి ప్రగాఢ సానుభూతిని తెలిపారు. ఆయన పవిత్ర ఆత్మకు శాంతి చేకూరాలని భగవంతుడిని వేడుకున్నారు. ఆయన కుటుంబ సభ్యులకు ప్రగాఢ సానుభూతి తెలిపారు.