మెదక్‌ జిల్లాలో ఘోర రోడ్డు ప్రమాదం - నలుగురు మృతి

మనోహరాబాద్ మండలం పోతారం వద్ద రోడ్డు ప్రమాదం - ట్రాక్టర్‌, బైకు ఢీకొని నలుగురు దుర్మరణం

Four Members Died in Medak Road Accident :మెదక్‌ జిల్లాలో శనివారం సాయంత్రం ఘోర ప్రమాదం జరిగింది. ఈ ప్రమాదంలో ఒకే కుటుంబానికి చెందిన నలుగురు అక్కడికక్కడే ప్రాణాలు కోల్పోయారు. మనోహరాబాద్‌ మండలం పోతారం గ్రామం వద్ద రోడ్డుపై స్థానిక రైతులు ధాన్యం ఆరబోశారు. ధాన్యం కుప్పలు ఉండడంతో రోడ్డుకు ఒకవైపు నుంచే వెహికల్స్ రాకపోకలు కొనసాగుతున్నాయి. ఈ క్రమంలోనే ఆంజనేయులు తన తమ్ముడి భార్య పిల్లలను బస్ ఎక్కించడానికి బైక్​పై వెళ్తుండగా ఎదురుగా వచ్చిన ట్రాక్టర్‌ బలంగా ఢీకొట్టింది.

ఈ ప్రమాదంలో ఆంజనేయులు (50), ఆయన మరదలు లత(35) , ఆమె ఇద్దరు పిల్లలు సహస్ర(10), శాన్వి(6) ఘటనా స్థలంలోనే ప్రాణాలు కోల్పోయారు. ప్రమాదం జరిగిన తర్వాత ట్రాక్టర్ డ్రైవర్ ఆపకుండా వెళ్లిపోయాడు. దీంతో మృతదేహాలను తూప్రాన్ ఆసుపత్రికి తరలిస్తుండగా గ్రామస్థులు అడ్డుకొని, మృతుల కుటుంబాలకు న్యాయం చేయాలని డిమాండ్ చేశారు.