సూరి హత్య కేసులో ప్రధాన నిందితుడు భాను కిరణ్ విడుదల

2011లో సంచలనం రేపిన మద్దెల చెరువు సూరి హత్య కేసు​ - పరిటాల రవి హత్య కేసులో ప్రధాన నిందితుడు మద్దెల చెరువు సూరి - సూరిని తుపాకీతో కాల్చి చంపిన భాను కిరణ్

Nampalli Court Grant Bail to Bhanu Kiran : హైదరాబాద్‌లో సంచలనం రేపిన మద్దెల చెరువు సూరి హత్య కేసులో శిక్షను అనుభవిస్తున్న ప్రధాన నిందితుడు భాను కిరణ్ విడుదలయ్యారు. చంచల్‌గూడ జైలులోనే ఆయన సుమారు 12 ఏళ్ల పాటు ఉన్నాడు. సీఐడీ ఆమ్స్ ఆక్ట్​ కేసులో భాను కిరణ్‌కు నాంపల్లి కోర్టు బెయిల్ మంజూరు చేసింది. దీంతో ఆయన ఈరోజు (నవంబర్​ 06)న చంచల్‌గూడ జైలు నుంచి విడుదలయ్యాడు.

సంచలనం రేపిన సూరి మర్డర్ : జనవరి 4, 2011న మద్దెల చెరువు సూరి, భాను కిరణ్​ చేతిలో హత్యకు గురయ్యాడు. ఆంధ్రప్రదేశ్​లోని అనంతపురం జిల్లా రాప్తాడు మాజీ ఎమ్మెల్యే పరిటాల రవి హత్య కేసులో మద్దెల చెరువు సూరి ప్రధాన నిందితుడు. హైదరాబాద్​లోని సనత్​నగర్​లో భానుకిరణ్​ మద్దెల చెరువు సూరిని తుపాకీతో కాల్చి చంపేశాడు. అప్పట్లో ఈ మర్డర్​ కేసు పెద్ద సంచలనం సృష్టించింది. అనంతపురం ఫ్యాక్షన్​ రాజకీయాలలో పరిటాల రవి, మద్దెల చెరువు సూరి, మొద్దు శీను, భాను కిరణ్​ల పేర్లు ఓ రక్త చరిత్రను తలపిస్తాయనడంలో అతిశయోక్తి లేదు.

సూరీ హత్యకేసులో భాను కిరణ్​ను పోలీసులు అరెస్టు చేశారు. న్యాయస్థానం విచారణ చేపట్టి భాను కిరణ్​కు శిక్షను విధించింది. తాను దాదాపుగా 12ఏళ్ల నుంచి శిక్షను అనుభవిస్తున్నానని భాన్​ కిరణ్​ బెయిల్​ మంజూరు చేయాల్సిందిగా సుప్రీం కోర్టును ఆశ్రయించారు. విచారణ చేపట్టిన ధర్మాసనం స్థానిక కోర్టులోనే ఈ కేసును పరిష్కరించుకోవాలని తెలిపింది. ఈ మేరకు నాంపల్లి కోర్టులో పిటిషన్ వేయగా న్యాయమూర్తి బెయిల్ మంజూరు చేశారు. భాను కిరణ్​ జీవిత ఖైదుపై విచారణ నవంబరు 11వ తేదీన కోర్టు ముందుకు రానుంది.