మీ పిల్లలకు ఏఐపై శిక్షణ ఇప్పించాలని ఉందా - మరి ఇంకెందుకు ఆలస్యం వెంటనే ఇలా చేయండి! - AI Awareness Training Program Hyd

Learnorama Technologies AI Training Camp : కృత్రిమ మేధ అన్ని రంగాలను శాసిస్తోంది. ఏఐపై పట్టు సాధిస్తే సులభంగా విజయాలు సాధించొచ్చు. మానవ వనరుల కొరతను కృత్రిమ మేధ సాయంతో అధిగమించొచ్చు. కష్టతరమైన పనిని సైతం సులభంగా చేయవచ్చు. ఇంత కీలకమైన ఏఐపై విద్యార్థులకు అవగాహన కల్పించేలా లర్నోరమా టెక్నాలజీస్‌ ప్రత్యేక శిక్షణ ఇస్తోంది. విద్యార్థులను సాంకేతికంగా తీర్చిదిద్దుతోంది.

AI Awareness Training Program in Hyderabad : మెదడలోని ఆలోచనలను సులభంగా పట్టేయ గల సాంకేతికత కృత్రిమ మేధ సొంతం. సెర్చ్ ఇంజిన్‌లో మనం ఏదైనా పదం టైప్ చేస్తుండగానే, దానికి అనుగుణంగా ఉన్న తర్వాత పదాలన్నీ వరుసగా కింద వస్తుంటాయి. దాంతో మనకు కావాల్సిన పదాలను ఎంపిక చేసుకొని సులభంగా సమాచారం సేకరించుకోవచ్చు. సెర్చ్‌ ఇంజిన్ దగ్గరి నుంచి వెబ్‌సైట్‌లు, విద్య, వ్యాపారం, వైద్యం ఇలా అన్ని రంగాలు కృత్రిమ ఏఐపై ఆధారపడి పని చేస్తున్నాయి.

తల్లిదండ్రులు సైతం తమ పిల్లలకు చిన్నప్పటి నుంచే కృత్రిమ మేధకు సంబంధించిన కోర్సులు నేర్పించడానికి ఆసక్తి చూపిస్తున్నారు. లర్నోరమా టెక్నాలజీ సైతం ఈ ఆశయంతోనే ప్రత్యేక శిబిరం నిర్వహిస్తోంది. ప్రాథమిక స్థాయి నుంచే విద్యార్థులకు ఏఐపై అవగాహన కల్పించడం ద్వారా పెరిగి పెద్దయ్యాక దానిపై పూర్తి పట్టు సాధిస్తారనే ఉద్దేశంతో లర్నోరమా టెక్నాలజీస్‌ ప్రతినిధులు శిక్షణ ఇస్తున్నారు.

"కృతిమ మేధను ఉపయోగించి పిల్లలు వెబ్‌సైట్‌లు డిజైన్ చేశారు. అందులో ఈ కామర్స్ వెబ్‌సైట్‌లు, సర్వీస్ వెబ్‌సైట్‌లు రూపొందించారు. ఈ కామర్స్ చేసిన వారికి యంగెస్ట్ ఎంటర్‌ప్రెన్యూనర్‌ అవార్డులకు దరఖాస్తు చేస్తాం." - కార్తీక్‌ రెడ్డి, లర్నోరమా టెక్నాలజీస్

ప్రతి రంగం కూడా కృత్రిమ మేధపై ఆధారపడి పని చేస్తుండటంతో, దానిపై విద్యార్థులకు ప్రాథమిక స్థాయి నుంచే చైతన్యపర్చేలా శిక్షణ ఇస్తోంది. సర్వీస్ వెబ్‌సైట్, ఈ కామర్స్ వెబ్‌సైట్‌ రూపొందించడానికి ఎంతో సాంకేతిక పరిజ్ఞానం కావాలి. కానీ ఏఐ ఆధారంగా విద్యార్థులతో సులభంగా వీటిని రూపొందించేలా లర్నోరమా టెక్నాలజీస్ ఆధ్వర్యంలో శిక్షణ ఇచ్చారు. నెల రోజుల పాటు శిక్షణ తీసుకున్న వారు సొంతంగా వెబ్‌సైట్‌లు రూపొందించారు.

కొంతమంది ఈ కామర్స్ వెబ్‌సైట్‌లు రూపొందించి, వాటిలో టీషర్ట్‌లు, టోపీలు, ఇతర వస్తువులు విక్రయానికి పెట్టగా, మరికొంత మంది విద్యార్థులు గేమింగ్ వెబ్‌సైట్‌లు రూపొందించగా, ఓ విద్యార్థి అనాథ ఆశ్రమాలకు సంబంధించిన వివరాలను పొందుపర్చుతూ వెబ్‌సైట్ రూపొందించారు. కృత్రిమ మేధ వల్ల నిరుద్యోగం తలెత్తుతుందనే విషయంలో ఎలాంటి వాస్తవంలేదని, ఆ రంగంపై పట్టు సాధిస్తే మరిన్ని అవకాశాలు లభిస్తాయని ఐటీ నిపుణులు చెబుతున్నారు.

"కృతిమ మేధను ఉపయోగించి వెబ్‌సైట్ రూపొందించాలంటే ఏమేమి కావాలో నేర్చుకున్నాం. ఇది మాకు చాలా ఉపయోగకరంగా ఉంది. మేము వెబ్‌సైట్లను రూపొందించాం. కొందరూ ఈ కామర్స్ వెబ్‌సైట్‌ని రూపొందించగా, మరికొందరం కలిసి గేమింగ్ వెబ్‌సైట్‌ని రూపొందించాం. ఈ శిక్షణ కార్యక్రమం ద్వారా మేము ఎన్నో కొత్త విషయాలు నేర్చుకున్నాం."- విద్యార్థులు