'మల్కాజిగిరిలో తేల్చుకుందాం' - రేవంత్​రెడ్డికి కేటీఆర్​ సవాల్

KTR Challenges CM Revanth Latest News 2024 : ముఖ్యమంత్రి రేవంత్ రెడ్డి, బీఆర్ఎస్ వర్కింగ్ ప్రెసిడెంట్ కేటీఆర్​ల మధ్య వర్డ్ వార్ కొనసాగుతూనే ఉంది. ఇటీవల చేవెళ్ల జనజాతర సభలో రేవంత్ కేటీఆర్​కు సవాల్ విసిరిన విషయం తెలిసిందే. తాజాగా కేటీఆర్​ కూడా సీఎంతో ఛాలెంజ్ చేశారు. మల్కాజిగిరి ఎంపీ స్థానంలో బరిలో నిలిచి తేల్చుకుందామంటూ రేవంత్ రెడ్డికి కేటీఆర్ సవాల్ విసిరారు.

KTR Open Challenges CM Revanth Reddy : సీఎం రేవంత్‌రెడ్డికి బీఆర్ఎస్ పార్టీ కార్యనిర్వాహక అధ్యక్షుడు కేటీఆర్‌ సవాల్‌ విసిరారు. ఇద్దరం ఎమ్మెల్యేలుగా రాజీనామా చేసి మల్కాజిగిరి లోక్​సభ నియోజకవర్గ బరిలో నిల్చొందాం అని అన్నారు. అక్కడ పోటీ చేసి తేల్చుకుందాం అని ఛాలెంజ్ చేశారు. సీఎం రేవంత్ రెడ్డి గత ఎన్నికల్లో సవాల్ చేసి పారి పోయారని, అలాంటి ఆయన మాటకు విలువేముందని ఎద్దేవా చేశారు.

KTR Comments : సీఎం రేవంత్​ రెడ్డికి కేటీఆర్​ సవాల్​ చేసిన విషయం ప్రస్తుతం హాట్​ టాపిక్​ మారింది. తెలంగాణలో ఒక్క ఎంపీ స్థానాన్ని అయినా గెలిచి చూపించాలని బీఆర్​ఎస్​కు సీఎం రేవంత్​ రెడ్డి సవాల్​కు మాజీ మంత్రి కేటీఆర్​ స్పందించారు. మీకు ధైర్యముంటే సీఎం, ఎమ్మెల్యే పదవులకు రాజీనామా చేయండి అని వ్యాఖ్యానించారు. తను సిరిసిల్ల ఎమ్మెల్యే పదవికి రాజీనామా చేసి వస్తాను. ఇద్దరం కలిసి మల్కాజిగిరి ఎంపీకి పోటీ చేసి తేల్చుకుందాం అని ఘాటు విమర్శలు చేశారు.

గతంలోనూ కొడంగల్​, జీహెచ్​ఎంసీ ఎన్నికల్లో కూడా రేవంత్​ రెడ్డి సవాల్​ చేసి పారిపోయారని కేటీఆర్​ ఎద్దేవా చేశారు. సవాల్​ చేసి పారిపోయే రేవంత్​ రెడ్డి మాటకు విలువేముందని వ్యాఖ్యానించారు. రాజకీయాల్లో గెలుపోటములు సహజమే అని పేర్కొన్నారు. ఎన్నికల సమయంలో అధికారం కోసం 420 కి పైగా ఇచ్చిన హామీలను అమలు చేయాలని హితవు పలికారు.

" నాది మేనేజ్​మెంట్​ కోటా ఐతే రాహుల్​, ప్రియంకా గాంధీది ఏం కోటా? రేవంత్​ది పేమేంట్​ కోటానా? డబ్బులిచ్చి పదవి తెచ్చుకున్నారు. పేమెంట్​ కోటా కాబట్టే రేవంత్​ రెడ్డి దిల్లీకి పేమెంట్​ చేయాలి. రాష్ట్రంలోని బిల్డర్లు, వ్యాపారులను బెదిరించి దిల్లీకి రేవంత్​ రెడ్డి కప్పం కట్టాలి. త్వరలో రేవంత్​ రెడ్డి తీరును వ్యతిరేకిస్తూ బిల్డర్లు, వ్యాపారులు రోడ్డుక్కుతారు. మా ప్రభుత్వంలో కొన్ని తప్పులు జరిగి ఉండొచ్చు. అధికారంలో జరిగే తప్పులు అన్నీ సీఎం, మంత్రులకు తెలియాలని లేదు కాదా. తప్పులు జరిగాయనుకుంటే విచారించి చర్యలు తీసుకోండి. మార్చి 2 నుంచి బీఆర్​ఎస్​ అభ్యర్థిత్వాలపై కసరత్తు జరుగుతుంది. ఎంపీ అభ్యర్థిత్వాలపై కేసీఆర్​ సమావేశాలు నిర్వహిస్తారు"- కేటీఆర్​, బీఆర్​ఎస్​ పార్టీ కార్యనిర్వాహక అధ్యక్షుడు