రేపటి నుంచే భారత్-బంగ్లా టీ20 టిక్కెట్స్​ - ఆఫ్​లైన్​ లేదు గురూ, త్వరపడండి మరి! - India Bangladesh T20 Match Tickets

రేపటి నుంచి భారత్-బంగ్లా టీ20 టిక్కెట్లు విక్రయం. ఉప్పల్ వేదికగా ఈనెల 12న జరగనున్న భారత్ - బంగ్లాదేశ్ 3వ T20 మ్యాచ్

India Vs Bangladesh T20 Tickets :టీమిండియా - బంగ్లాదేశ్‌ మధ్య ఈనెల 12న ఉప్పల్‌ స్టేడియంలో నిర్వహించే టీ 20 3వ మ్యాచ్‌ టికెట్లను శనివారం నుంచి ఆన్​లైన్​లో అందుబాటులో ఉండనున్నట్లు హెచ్‌సీఏ అధ్యక్షుడు జగన్​ మోహన్​ రావు ఒక ప్రకటనలో తెలిపారు. మధ్యాహ్నం 12.30 గంటలకు పేటీఎం ఇన్​సైడర్‌ వెబ్​సైట్‌, యాప్​లో టికెట్లు విక్రయానికి పెడుతామని వెల్లడించారు.

టికెట్ల ప్రారంభ ధర రూ.750 నుంచి రూ.15 వేల వరకు ఉంటాయని ఆయన తెలిపారు. ఆన్‌లైన్​లో ముందుగా టికెట్లు బుక్‌ చేసుకున్న వారు ఈనెల 8వ తేదీ నుంచి 12 వరకు జింఖానా స్టేడియంలో ఉదయం 11 నుంచి సాయంత్రం 7 గంటల వరకు రిడంప్షన్‌ చేసుకోవాలని సూచించారు. ప్రభుత్వం జారీ చేసిన ఏదైనా ఐడీ కార్డు చూపించి, ఆన్​లైన్‌ టికెట్‌ బుక్‌ చేసుకున్న ప్రింట్‌ చూపించి టికెట్లు పొందాలని కోరారు. అదేవిధంగా మ్యాచ్ టిక్కెట్లను ఆఫ్​లైన్ కౌంటర్లలో విక్రయించడం లేదని స్పష్టం చేశారు.

Rachakonda CP On India Vs Bangladesh Match :క్రికెట్ అభిమానులకు ఎలాంటి అసౌకర్యం లేకుండా మ్యాచ్ ఏర్పాట్లు పూర్తి చేశామని రాచకొండ పోలీస్‌ కమీషనర్ సుధీర్ బాబు తెలిపారు. ఉప్పల్ రాజీవ్ గాంధీ అంతర్జాతీయ స్టేడియంలో ఈనెల 12న జరగనున్న టీ 20 క్రికెట్ మ్యాచ్ నిర్వహణకు సంబంధించిన భద్రతా ఏర్పాట్లు పైన సీపీ సుధీర్ బాబు స్టేడియంలో డీసీపీలు, ఏసీపీలు, జీహెచ్ఎంసీ, అగ్నిమాపక, ఎలక్ట్రిసిటీ డిపార్ట్మెంట్ తోపాటు హైదరాబాద్ క్రికెట్ అసోసియేషన్ ప్రతినిధులతో కలిసి సమీక్షా సమావేశం నిర్వహించారు.

రాచకొండ కమిషనరేట్ పరిధిలో క్రికెట్ పోటీలు నిర్వహించడం గొప్ప అవకాశమని, ఎన్ని సవాళ్లు ఎదురైనా తగిన విధంగా పటిష్ఠమైన భద్రతా ఏర్పాట్లు చేయాలని, ప్రేక్షకులకు ఎటువంటి అసౌకర్యం కలగకుండా బందోబస్తు ఏర్పాట్లు చేయాలని అధికారులను ఆయన అదేశించారు. టికెట్ల పంపిణీలో ఎటువంటి గందరగోళం లేకుండా చూడాలని నిర్వహణ బృందానికి ఆయన సూచించారు. మ్యాచ్ కోసం వచ్చే ప్రేక్షకులకు ఎటువంటి అసౌకర్యం కలగకుండా ఉండేందుకు అవసరమైన పార్కింగ్ ఏర్పాట్లు చేయాలని సూచించారు.

సాధారణ వాహనదారుల రాకపోకలకు ఎటువంటి ఇబ్బందులూ లేకుండా, ఉప్పల్ ప్రధాన రహదారి మీద ట్రాఫిక్ జామ్ ఏర్పడకుండా ఏర్పాట్లు చేయాలని అధికారులకు ఆదేశాలు ఇచ్చారు. స్టేడియం పరిసరాల్లో సీసీటీవీలను ఏర్పాటు చేయాలని సూచించారు. ప్రతీ ఒక్కరి కదలికలూ సీసీటీవీ కెమెరాల్లో నిక్షిప్తం అవుతాయని ఆయన పేర్కొన్నారు. నకిలీ టికెట్లు అమ్మేవారిపైన కఠిన చర్యలు తీసుకుంటామని, టికెట్ల పంపిణీ పూర్తి పారదర్శకంగా జరుగుతుందని, ఎటువంటి పుకార్లనూ నమ్మవద్దని సీపీ తెలిపారు.