రేపు ఉరుములు, మెరుపులతో కూడిన వర్షాలు! - ఆ జిల్లాలకు వర్ష సూచన

ఇవాళ, రేపు తెలికపాటి నుంచి మోస్తారు వర్షాలు కురిసే అవకాశం ఉందన్న ఐఎండీ - హైదరాబాద్​లో పలుచోట్ల కురిసిన వర్షం

Telangana Rainfall Alert Update :బంగాళాఖాతంలో ఏర్పడిన అల్పపీడనం బలహీనపడుతుండడంతో అధికంగా వీస్తున్న తూర్పు గాలుల వల్ల రాష్ట్రంలో ఇవాళ, రేపు తేలికపాటి నుంచి మోస్తరు వర్షాలు కురిసే అవకాశం ఉందని హైదరాబాద్ వాతావరణ కేంద్రం ప్రకటించింది. దక్షిణ తెలంగాణ జిల్లాల్లో అనేక చోట్ల, మిగతా జిల్లాల్లో అక్కడక్కడ జల్లులు కురిసే అవకాశం ఉన్నట్లు తెలిపింది. రేపు ఉరుములు, మెరుపులతో కూడిన తేలికపాటి నుంచి మోస్తారు వర్షం కురిసే అవకాశం ఉన్నట్లు వాతావరణ కేంద్రం వెల్లడించింది.

హైదరాబాద్​లో వర్షాలు :ఇవాళ తెల్లవారుజాము నుంచే భాగ్యనగరంలోని పలు ప్రాంతాలతో పాటు జిల్లాల్లోనూ తేలిక పాటి నుంచి మోస్తరు వర్షం కురిసింది. తుఫాన్​ కారణంగా ఒక్కసారిగా నగరంలో వాతావరణం చల్లబడింది. హైదరాబాద్​, అమీర్​పేట్, సనత్​ నగర్, బోరబండ, యూసఫ్​ గూడ, జూబ్లీహిల్స్​ పరిసర ప్రాంతాల్లో వర్షపు జల్లులు కురిశాయి.

ధాన్యం కొనుగోలు కేంద్రాల్లో తడిసిన ధాన్యం :మహబూబాబాద్ జిల్లా వ్యాప్తంగా చిరు జల్లులు కురుస్తున్నాయి. మంగళవారం సాయంత్రం నుంచి ఆకాశం మేఘావృతమై ఉంది. రాత్రి నుండి బుధవారం ఉదయం వరకు కురుస్తున్న జల్లులతో ప్రజలు ఇబ్బందులు ఎదుర్కొంటున్నారు. డోర్నకల్ నియోజకవర్గ పరిధిలోని అన్ని మండలాల్లో ఇదే పరిస్థితి నెలకొంది. డోర్నకల్ నియోజకవర్గంలోని పలు మండలాల్లో కురిసిన అకాల వర్షానికి పలు కొనుగోలు కేంద్రాల్లో ధాన్యం తడిసిపోయింది.

కురవి, సీరోల్ ,డోర్నకల్, నరసింహులపేట మండలాల్లోని కొనుగోలు కేంద్రాల్లో రైతులు ధాన్యాన్ని విక్రయించి కొన్ని రోజులవుతున్నప్పటికీ ధాన్యం బస్తాలు తరలించడంలో జాప్యం జరుగుతుంది. వాహనాలు సకాలంలో రాకపోవడంతో కొనుగోలు కేంద్రాల్లో ధాన్యాన్ని నిల్వ ఉంచారు. నిల్వ ఉంచిన బస్తాలు, ధాన్యం నిల్వలు అకాల వర్షానికి తడిసి ముద్దయిన్నందని రైతులు ఆవేదన వ్యక్తం చేస్తున్నారు. కాంపెల్లి కేంద్రంలో టార్పాలిన్ కవర్లపై నిలిచిన వర్షపు నీటిని ఎత్తిపోశారు. వర్షాలకు ధాన్యం తడవకుండా రైతన్నలు జాగ్రత్తలు పడుతున్నారు. పలు కేంద్రాల్లో నిల్వ చేసిన ధాన్యానికి వెంటనే కాంటాలు నిర్వహించి మిల్లులకు తరలించాలని రైతులు డిమాండ్ చేస్తున్నారు.