వానలే వానలు - ఉప్పొంగుతున్న వాగులు - బొగ్గు ఉత్పత్తికి ఆటంకాలు - Heavy Rain Alert To Telangana

Heavy Rains In Telangana : బంగాళాఖాతంలో అల్పపీడన ప్రభావంతో తెలంగాణలో ఇవాళ కూడా భారీ నుంచి అతి భారీ వర్షాలు కురుస్తాయని వాతావరణ శాఖ వెల్లడించింది. పలు జిల్లాలకు రెడ్‌, ఆరెంజ్ హెచ్చరికలు జారీ చేసింది. మరోవైపు రాష్ట్రవ్యాప్తంగా చాలాచోట్ల చెరువులు, వాగులు ప్రమాదకరంగా మారాయి. భూపాలపల్లి జిల్లాలో వాగు ఉప్పొంగడంతో బొలేరో వాహనం కొట్టుకుపోయింది.

Heavy Rain Alert To Telangana :రాష్ట్ర వ్యాప్తంగా ఎడతెరిపి వర్షాలు కురుస్తున్నాయి. బంగాళాఖాతంలో తీవ్ర అల్పపీడనం ప్రభావంతో ఇవాళ కూడా భారీ నుంచి అతి భారీ వర్షాలు పడే అవకాశముందని వాతావరణ శాఖ అధికారులు తెలిపారు. రాగల 12 గంటల్లో అల్పపీడనం వాయు గుండంగా మారే అవకాశముందని పేర్కొన్నారు. విరామం కాం లేకుండా కురుస్తున్న వర్షాలకు రోడ్లన్ని జలమయమయ్యాయి. చాలా గ్రామాల్లో ప్రజలు ఇళ్లకే పరిమితమయ్యారు.

పలు జిల్లాలకు రెడ్‌ అలర్ట్ : హైదరాబాద్‌లో ఇవాళ భారీ వర్షం కురిసే అవకాశముందని వాతావరణ శాఖ తెలిపింది. ములుగు, భద్రాద్రి, ఖమ్మం, మహబూబాబాద్‌, ములుగు, భద్రాద్రి, ఖమ్మం, మహబూబాబాద్‌ జిల్లాలకు రెడ్‌ అలర్ట్‌ జారీ చేశారు. ఆసిఫాబాద్‌, మంచిర్యాల, కరీంనగర్‌, పెద్దపల్లి జిల్లాలకు ఆరెంజ్‌ అలర్ట్‌ ప్రకటించారు. భూపాలపల్లి, వరంగల్‌, హనుమకొండ జిల్లాల్లోనూ భారీ వర్షాలు కురుస్తాయని ప్రజలు అప్రమత్తంగా ఉండాలని సూచించారు.

జయశంకర్‌ భూపాలపల్లి జిల్లాలో వాగులు వంకలు ఉప్పొంగుతున్నాయి. మహదేవపూర్, కాళేశ్వరం మార్గంలో ఎడపల్లి వాగు ఉప్పొంగడంతో లోలెవెల్ వంతెన పైనుంచి వరద నీరు ప్రమాదకరంగా ప్రవహిస్తోంది. దీంతో రాకపోకలు నిలిచిపోయాయి. కేశవపూర్ సమీపంలోని పెద్దవాగు ఉప్పొంగడంతో లో లెవెల్ వంతెన పై నుంచి నీరు ప్రవహిస్తుండగా కాటారం మేడారం ప్రధాన రహదారిపై రాకపోకలు నిలిచిపోయాయి. భూపాలపల్లి జిల్లా కాటారం మండలంలోని దామెరుకుంట-గుండ్రాత్ పల్లి మధ్య వాగు ఉధృతిలో బొలెరో వాహనం కొట్టుకుపోయింది. గ్రామస్థుల సాయంతో డ్రైవర్‌ సురక్షితంగా బయటపడ్డారు.

వర్షం కారణంగా బొగ్గు ఉత్పత్తికి ఆటంకం : పెద్దపల్లి జిల్లాలో ఎడతెరిపి లేకుండా కురుస్తున్న వర్షానికి మహదేవ్​పూర్, పలిమెల, కాటారం, మల్హర్ ముత్తారం, మంథని, రామగిరి, కమాన్పూర్ జనజీవనం స్తంభించింది. వాగులు వంకలు పొంగిపొర్లుతున్నాయి. కల్వర్టుల మీద నుంచి వరద పోటెత్తుడుతుండడంతో రాకపోకలు నిలిచిపోయాయి. రామగిరి మండలంలో భారీ వర్షం కురుస్తుండడంతో ఓసిపి 2లో బొగ్గు ఉత్పత్తికి కొద్దిగా ఆటంకాలు ఏర్పడ్డాయి.

భారీ వర్షం కారణంగా మంచిర్యాల జిల్లా జాతీయ రహదారులన్ని నీటి మయమయ్యాయి. భీమారం మండలంలో వాగులు వంకలు నిండుగా ప్రవహిస్తున్నాయి. దీంతో 63వ జాతీయ రహదారిపై వరద నీరు ప్రవహిస్తూ ఉండడంతో చెన్నూర్ నుంచి మంచిర్యాల రాకపోకలు సాగించే వాహనదారులు ఇబ్బంది పడ్డారు. మరోవైపు భారీ వర్షాల కారణంగా మంచిర్యాల జిల్లా మందమర్రి, శ్రీరాంపూర్ ఏరియాల్లోని కళ్యాణిఖని, రామకృష్ణాపూర్, శ్రీరాంపూర్, ఇందారం ఉపరితల గనుల్లో బొగ్గు ఉత్పత్తి నిలిచిపోయింది. నాలుగు ఉపరితల గన్ను లోని క్వారీలో 2.20 లక్షల క్యూబిక్ మట్టి వెలికితీత పనులు నిలిచిపోవడంతో సుమారు 22 వేల టన్నుల బొగ్గు ఉత్పత్తికి ఆటంకం ఏర్పడింది.