హైదరాబాద్​లో 25 వేల మ్యాన్​హోల్స్ - మూత తెరిచారో మునిగిపోతారు!! - MANHOLE SAFETY MEASURES IN HYD

25 Thousand Manholes in Hyderabad : హైదరాబాద్​లో వర్షాలు ఎక్కువగా కురుస్తున్నందున మ్యాన్​హోల్స్ ​నిండిపోయి కనిపించకుండా ప్రమాదంగా మారే అవకాశం ఉంది. ఈ విషయాన్ని గమనించిన అధికారులు ముందస్తు చర్యలు చేపట్టారు. ఎక్కువ లోతు ఉన్న మ్యాన్​హోల్స్​ ప్రజలకు కనిపించే విధంగా ఎరుపు రంగు వేస్తున్నారు.

Precautionary Measures on Manholes in Hyderabad: హైదరాబాద్​లో భారీ వర్షాలు పడుతున్నందున అధికార యంత్రాంగం ముందస్తు చర్యలు చేపట్టింది. వరద నీటితో మ్యాన్​హోల్స్​ నిండిపోయి ప్రజలకు కనిపించకుండా ఉండే ప్రమాదం ఉందని, దీని వల్ల తీవ్ర నష్టం జరిగేందుకు అవకాశం ఉందని భావించింది. ఈ క్రమంలోనే జలమండలి అధికారులు వరదలోనూ ప్రజలకు మ్యాన్​హోల్స్ కనిపించేలా వాటిపైన ఎరుపు రంగు వేస్తున్నారు. భాగ్యనగరంలో ఎక్కువ లోతు ఉన్నవి అధికంగా ఉన్నందున వాటిని ఎవరైనా తెరిస్తే కఠిన చర్యలు తీసుకుంటామని హెచ్చరించారు.

Red Color Manholes in Hyderabad: వర్షాలు పడినప్పుడు రోడ్లపై అధికంగా నీరు ప్రవహించి మ్యాన్​హోల్స్​ను స్థానికులు తప్ప ఇతరులు గుర్తించేందుకు ఇబ్బందిగా ఉండేది. కొన్నిసార్లు మ్యాన్​హోల్​లో పడి ప్రమాదానికి గురై ప్రాణాలు కోల్పోయిన సంఘటనలు కూడా ఉన్నాయి. కొంత మంది మరణించిన ఘటనలు ఉన్నాయి. వీటన్నింటని దృష్టిలో పెట్టుకున్న అధికారులు ముందస్తు జాగ్రత్తలు చేపట్టారు. జీహెచ్​ఎంసీ పరిధిలో ఉన్న లోతైన మ్యాన్​హోల్స్​ను ప్రజలు గుర్తించేలా జలమండలి ప్రత్యేక ఏర్పాట్లు చేస్తోంది. అవి అత్యంత ప్రమాదకరమని తెలిసే విధంగా వాటికి ఎరుపు రంగును వేస్తోంది.

Manholes in Hyderabad Covered with Safety Grills: జీహెచ్​ఎంసీ వ్యాప్తంగా సుమారు 25 వేలకు పైగా లోతైన మ్యాన్​హోల్స్​ ఉన్నాయని అధికారులు తెలిపారు. వీటిపై ప్రస్తుతం సేఫ్టీ గ్రిల్స్​ ఏర్పాటు చేస్తున్నారు. వర్షాకాలం అయినందున మ్యాన్​హోల్స్​లో పడకుండా తగిన చర్యలు తీసుకుంటున్నారు. నగరంలో రహదారులు, ఇతర ప్రాంతాల్లో ఉన్న మ్యాన్​హోల్స్​ను ఎవరైనా తెరిస్తే వారిపై క్రిమినల్​ కేసులు నమోదు చేసి జైలుకు పంపిస్తామని జలమండలి హెచ్చరించింది.

Manhole Cleaning and Safety Measures: జలమండలి చట్టం 1989 సెక్షన్‌ 74 ప్రకారం అక్రమంగా మ్యాన్‌హోల్స్​ తెరిస్తే క్రిమినల్‌ కేసులు పెట్టే అధికారం జలమండలికి ఉందని పేర్కొంది. వానలు కురుస్తుండటంతో ఎమర్జెన్సీ రెస్పాన్స్‌ టీమ్‌, సేఫ్టీ ప్రొటోకాల్‌ టీమ్‌ వాహనాలను సిద్ధం చేశామని తెలిపింది. వర్షాకాలంలో ఎప్పటికప్పుడు మ్యాన్‌హోల్స్​ను శుభ్రం చేసేందుకు యంత్రాలను సిద్దం చేశామని వెల్లడించింది. సీవరేజ్‌ సమస్యలు ఉంటే ప్రజలు జలమండలి వినియోగదారుల సేవా కేంద్రం 155313కు ఫోన్‌ చేసి సమాచారం అందించాలని కోరింది.