ఆంధ్రప్రదేశ్‌లో అభివృద్ధి పనులు - జీవనాడిగా నిలువనున్న అమరావతి ఔటర్‌ ప్రాజెక్టు - Amaravati ORR Project

ORR Amaravati Project in Andhra Pradesh : ఆంధ్రప్రదేశ్‌తో పాటు అమరావతి అభివృద్ధిని పరుగులు పెట్టించి, ఆర్థిక కార్యకలాపాలకు జీవనాడిగా అవుటర్‌ రింగ్‌ రోడ్డు (ORR) ప్రాజెక్టు నిలవనుంది. ఆంధ్రప్రదేశ్‌ పైసా ఖర్చు చేయకుండా పూర్తిగా కేంద్ర ప్రభుత్వ నిధులతో చేపట్టే ఈ నిర్మాణం మౌలిక వసతుల కల్పనకు రాచబాట. రాష్ట్ర అభివృద్ధి ముఖచిత్రాన్ని మేలిమలుపు తిప్పే పరిణామంగా చెప్పవచ్చు. ఈ నిర్మాణం పూర్తి అయితే కలల రాజధాని అమరావతితో కొన్ని నగరాలకు దూరం తగ్గనుంది.

Amaravati Outer Ring Road :అమరావతి ఔటర్‌ ప్రాజెక్టు సాకారమైతే ఆ ఓఆర్‌ఆర్‌ లోపలే కాదు వెలుపల కూడా భూములు బంగారం కానున్నాయి. విస్తృత ఆర్థిక కార్యకలాపాలకు ఈ ప్రాంతం కేంద్రం అవుతోంది. ఓఆర్‌ఆర్‌కు వెలుపలా కొన్ని కిలోమీటర్ల మేర ఈ ప్రభావం ఉంటుంది. రాజధాని అభివృద్ధి ప్రణాళికల్ని అప్పట్లో తెలుగుదేశం ప్రభుత్వం 217 చ.కి.మీ.ల పరిధికే పరిమితం చేయలేదు. అమరావతి పక్కనే ఉన్న విజయవాడ, గుంటూరు, మంగళగిరి, తాడేపల్లి వంటి పట్టణాల్ని కలిపి ఒక మహానగరంగా అభివృద్ధి చేసేందుకు ప్రతిపాదనలకు ఇది శ్రీకారం చుట్టడమే.

అమరావతి ఔటర్‌ ప్రాజెక్టు (ETV Bharat)

జనాభా పెరిగి, ట్రాఫిక్‌ రద్దీ భరించలేని స్థాయికి చేరి, దాన్ని తగ్గించేందుకు, కొత్త ప్రాంతాలకు అభివృద్ధిని విస్తరించేందుకు చాలా నగరాల్లో ఔటర్‌ రింగ్‌రోడ్డులు నిర్మించారు. అమరావతి ఓఆర్‌ఆర్‌ మాత్రం దానికి పూర్తిగా భిన్నం. అమరావతితో పాటు చుట్టుపక్కల ప్రాంతాలూ ప్రణాళికాబద్ధంగా అభివృద్ధి చెందాలన్న లక్ష్యంతో రాజధానికి, ఓఆర్‌ఆర్‌కు ప్రభుత్వం ప్రణాళికలు సిద్ధం చేసింది.

ఓఆర్‌ఆర్‌ను క్రాస్​ చేసే రాష్ట్ర, జాతీయ రహదారులు (ETV Bharat)

ఓఆర్‌ఆర్‌ ముఖ్యాంశాలివీ

• ఉమ్మడి కృష్ణా, గుంటూరు జిల్లాల్లో CRDAపరిధిలో 189 కి.మీ.ల పొడవున నిర్మాణం.
• 150 మీటర్ల వెడల్పుతో, రెండు వైపులా సర్వీస్‌ రోడ్లు, ఆరు వరుసల యాక్సెస్‌ కంట్రోల్‌ ఎక్స్‌ప్రెస్‌వే
• 2018 అంచనాల ప్రకారం నిర్మాణ వ్యయం రూ.17,761.49 కోట్లు.
• అవసరమైన భూమి 3,404 హెక్టార్లు. భూసేకరణ వ్యయం రూ.4,198 కోట్లు.
• అమరావతి ఓఆర్‌ఆర్‌కు కేంద్ర ఉపరితల రవాణా, జాతీయ రహదారుల శాఖ(మోర్త్‌) అంగీకారం తెలిపింది. ఏడో దశ రింగ్‌రోడ్ల అభివృద్ధి కింద మంజూరుచేసింది.
• ‘అవుటర్‌ రింగ్‌ రోడ్‌ ఫర్‌ న్యూ క్యాపిటల్‌ సిటీ’ అని ఈ ప్రాజెక్టుకు పేరు పెట్టారు.
• కృష్ణా, గుంటూరు జిల్లాల మీదుగా వెళ్లే జాతీయ రహదారులు, రాష్ట్ర రహదారులు, జిల్లా ప్రధాన రహదారులను 13 చోట్ల ఓఆర్‌ఆర్‌ క్రాస్‌ చేస్తుంది.
• విజయవాడ నుంచి హైదరాబాద్‌ వెళ్లే మార్గంలో కంచికచర్ల వద్ద ఓఆర్‌ఆర్‌ మొదలై గుంటూరు నగరం వెలుపల పొత్తూరు వద్ద కోల్‌కతా-చెన్నై రహదారిలో కలుస్తుంది.
• అక్కడి నుంచి కృష్ణా జిల్లా తోట్లవల్లూరు పరిధిలో ఎన్‌హెచ్‌-65లో, అక్కడి నుంచి విజయవాడ-ఏలూరు మార్గంలో పొట్టిపాడు టోల్‌ప్లాజా సమీపంలో జాతీయ రహదారి-16ను కలుస్తుంది.
• ఓఆర్‌ఆర్‌లో భాగంగా రెండుచోట్ల కృష్ణానదిపై ఐకానిక్‌ వంతెనలు
• అమరావతి ఆలయానికి సమీపంలోనూ, దిగువన కృష్ణాజిల్లా తోట్లవల్లూరు వద్ద ఈ వంతెనలు, వీటితో పాటు ఓఆర్‌ఆర్‌ మార్గంలో 12 ప్రధాన వంతెనలు, 51 చిన్న వంతెనలు
• ఓఆర్‌ఆర్‌ లోపల మండలాలు : 40
• ఉమ్మడి కృష్ణాజిల్లా పరిధిలో కంచికచర్ల, వీరులపాడు, జి.కొండూరు, మైలవరం, ఆగిరిపల్లి, బాపులపాడు, గన్నవరం, ఉంగుటూరు, కంకిపాడు, తోట్లవల్లూరు కలిపి 10 మండలాల్లోని 49 గ్రామాల మీదుగా వెళ్తుంది.
• ఉమ్మడి గుంటూరు జిల్లా పరిధిలో కొల్లిపర, పొన్నూరు, తెనాలి, చేబ్రోలు, వట్టిచెరుకూరు, గుంటూరు, మేడికొండూరు, యడ్లపాడు, తాడికొండ, పెదకూరపాడు, అమరావతి మండలాల్లోని 38 గ్రామాల మీదుగా సాగుతుంది.
• ఓఆర్‌ఆర్‌ పరిధిలోని పట్టణాలు, గ్రామాల్లోని జనాభా సుమారు 40 లక్షలు
  

  : అమరావతి ఔటర్‌ ప్రాజెక్టు మ్యాప్​ (ETV Bharat)

ఈ ప్రాజెక్టు ఎంతో కీలకం

• ఓఆర్‌ఆర్‌ నిర్మాణం పూర్తయితే అమరావతి కేంద్రంగా రింగ్‌రోడ్డు లోపల, వెలుపల చుట్టూ కొన్ని కిలోమీటర్ల వరకు అభివృద్ధి పరుగులు
• ఓఆర్‌ఆర్‌ నిర్మాణం పూర్తయితే రాబోయే కొన్నేళ్లలోనే విజయవాడ, అమరావతి, తాడేపల్లి, మంగళగిరి, గుంటూరు కలసి మెగా సిటీగా మారతాయి.
• ఈ ప్రాంతం మీదుగా వెళ్లే జాతీయ, రాష్ట్ర రహదారుల్ని అనుసంధానిస్తూ ఓఆర్‌ఆర్‌ నిర్మించడం వల్ల ఆంధ్రప్రదేశ్​లోని ఇతర చోట్లకు, పొరుగు రాష్ట్రాలకు అమరావతితో అనుసంధానం పెరుగుతుంది.

ట్రాఫిక్‌ కష్టాలకు చెల్లుచీటి

• ప్రస్తుతం అమరావతికి చేరుకోవాలంటే విజయవాడ, గుంటూరు, తాడేపల్లి, మంగళగిరి మీదుగా వెళ్లాల్సిందే. ట్రాఫిక్‌ సమస్యలు ఉంటాయి. దూరం ఎక్కువవుతుంది. ఓఆర్‌ఆర్‌ నిర్మిస్తే ఆంధ్రప్రదేశ్​లోని వివిధ ప్రాంతాలు, ఇతర రాష్ట్రాల నుంచి రోడ్డు మార్గంలో వచ్చేవారూ నేరుగా అమరావతి చేరుకోవచ్చు.
• ప్రతిపాదిత మచిలీపట్నం, నిజాంపట్నం పోర్టులు అమరావతికి చెరోవైపు ఉన్నాయి. తెలంగాణ, ఛత్తీస్‌గఢ్‌ వంటి తీరప్రాంతం లేని రాష్ట్రాలకు (హింటర్‌ల్యాండ్‌) ఈ పోర్టులు దగ్గరవుతాయి.
• అమరావతి, విజయవాడ, గుంటూరు నుంచి గన్నవరం, శంషాబాద్‌ విమానాశ్రయాలకు ఓఆర్‌ఆర్‌ నుంచి వెళ్లడం తేలిక.
• విశాఖ-హైదరాబాద్‌ ట్రాఫిక్‌, విజయవాడకు రావాల్సిన అవసరమే లేదు. ఓఆర్‌ఆర్‌ వెళ్లొచ్చు.
• అమరావతి, విజయవాడ, గుంటూరు, తెనాలి మధ్య మేజర్‌ కనెక్టివిటీ ఏర్పడుతుంది.

ఓఆర్‌ఆర్‌కు లోపల, వెలుపల ఉన్న ప్రాంతాల్లో గుంటుపల్లి, నున్న, గన్నవరం, పెదవడ్లపూడి, పెదకాకాని, పెదపరిమి ప్రాంతాల్ని అర్బన్‌ నోడ్స్‌గా, మైలవరం, ఆగిరిపల్లి, పెదఅవుటపల్లి, రేపల్లె, నందివెలుగు, వేజెండ్ల, పేరేచర్ల, అమరావతి(పాత), కంచికచర్లను గ్రోత్‌ సెంటర్లుగా అభివృద్ధి చేయాలన్నది లక్ష్యం. 17 శాటిలైట్‌ టౌన్‌షిప్‌లు అభివృద్ధి చేయాలన్న ప్రతిపాదన ఉంది.