Highest Liqour Sales in Warangal : ఉమ్మడి వరంగల్ జిల్లాలో దసరా పండుగ సందర్భంగా మద్యం విక్రయాలు రాష్ట్రంలోనే రికార్డు బద్దలు కొట్టాయి. రాష్ట్రంలోనే పెరుగుదల అధికంగా నమోదైంది. మందు బాబుల వల్ల ప్రభుత్వానికి వచ్చిన ఆదాయం చూస్తే అబ్బా అనాల్సిందే. వరంగల్ పట్టణ, రూరల్‌ పరిధిలో 49.88 శాతం, జనగామ జిల్లాలో 89.87 శాతం విక్రయాలు అధికంగా పెరిగాయి. ఉమ్మడి వరంగల్ జిల్లాలో మొత్తంగా 294 వైన్స్, 134 బార్‌ అండ్‌ రెస్టారెంట్లు ఉన్నాయి.
గతేడాది దసరా పండుగ సందర్భంగా రూ.95 కోట్ల 53 లక్షల అమ్మకాలు జరిగితే ఈసారి అదే 14 రోజుల్లోనే రూ.142 కోట్ల 76లక్షలకు చేరి రికార్డులను బ్రేక్ చేశాయి. దాదాపు రూ.48 కోట్ల 26లక్షలు ఎక్కువగా వచ్చాయి. ఈ నెల చివర్లో దీపావళి ఉండటంతో విక్రయాలు మరింత పెరిగే అవకాశం ఉన్నట్లు ఎక్సైజ్ శాఖ అధికారులు భావిస్తున్నారు.
బెల్ట్ షాపుల ద్వారా:ఉమ్మడి వరంగల్ జిల్లాలో మద్యం విక్రయాలు ఎక్కువగా పెరగడానికి పలు కారణాలు ఉన్నాయి. అందులో ప్రధానమైంది వైన్ షాపు పరిధిలో ఉన్న బెల్ట్ షాపులు. వాస్తవానికి ప్రతి గ్రామంలో కిరాణ దుకాణాలు, ఇళ్లల్లోనూ మద్యం విక్రయిస్తున్నారు. వీటి నిర్వాహణకు ప్రత్యేక సమయం అని ఏమీ లేదు. కొన్ని ప్రాంతాల్లో 24 గంటలు కూడా మందు దొరుకుతోంది. డిజిటల్ పేమేంట్స్ కూడా విక్రయాలు పెరుగుదలకు కారణంగా ఉంటుందని నిర్వాహకులు భావిస్తున్నారు.