జీహెచ్ఎంసీ, హెచ్ఎండీఏలో భవన నిర్మాణ అనుమతులపై విజిలెన్స్ విచారణ : సీఎం రేవంత్​

CM Revanth Reddy Review on GHMC : జీహెచ్ఎంసీ, హెచ్ఎండీఏలో భవన నిర్మాణ అనుమతులపై విజిలెన్స్ విచారణ జరపనున్నట్లు ముఖ్యమంత్రి రేవంత్ రెడ్డి వెల్లడించారు. రాష్ట్రంలోని కొత్త కార్పొరేషన్లకు ఐఏఎస్​లను, మున్సిపాలిటీలకు గ్రూప్ 1 అధికారులను కమిషనర్లుగా నియమించాలని సీఎం తెలిపారు. గ్రేటర్ హైదరాబాద్​కు వచ్చే 50 ఏళ్లకు మంచినీటి అవసరాలపై ప్రణాళికలు తయారు చేయాలని సీఎం రేవంత్ రెడ్డి ఆదేశించారు. మెట్రో రైలు కొత్త మార్గాలకు త్వరలో శంకుస్థాపన చేయనున్నట్లు ఆయన తెలిపారు.

CM Revanth Reddy Review on GHMC :జీహెచ్ఎంసీ, హెచ్ఎండీఏలో భవన నిర్మాణాలకు ఇష్టం వచ్చినట్టుగా అనుమతులు ఇచ్చారని ముఖ్యమంత్రి రేవంత్ రెడ్డి(CM Revanth Reddy) అసహనం వ్యక్తం చేశారు. భవన నిర్మాణ అనుమతులకు సంబంధించిన చాలా ఫైళ్లు క‌నిపించ‌డం లేదని సీఎం ఆగ్రహం వ్యక్తం చేశారు. ఆన్‌లైన్​లో లేకుండా ఇష్టారీతిగా అనుమతులు ఇచ్చారన్నారు. హెచ్ంఎండీఏ, జీహెచ్ఎంసీలో 15 రోజుల్లో విజిలెన్స్ దాడులు జ‌రుగుతాయని సీఎం స్పష్టం చేశారు. హెచ్​ఎండీఏ(HMDA) కార్యాలయంలో పురపాలక, జీహెచ్​ఎంసీ, జలమండలిపై ముఖ్యమంత్రి రేవంత్​ రెడ్డి సుమారు నాలుగు గంటల పాటు సమీక్షను నిర్వహించారు. ఈ సమీక్షలో రెవెన్యూ శాఖ మంత్రి పొంగులేటి శ్రీనివాస్​రెడ్డి, ఉన్నతాధికారులు పాల్గొన్నారు.

ఇష్టానుసారంగా వ్య‌వ‌హ‌రించిన అధికారులు ఇంటికిపోతారని ఆయన అన్నారు. భవన నిర్మాణ అనుమతుల ఫైళ్లు క్లియర్​గా ఉండాల్సిందేనని ఆన్‌లైన్‌లో లేని వాటి జాబితా త‌యారు చేయాలని ఆదేశించారు. హెచ్ఎండీఏ వెబ్‌సైట్ నుంచి చెరువుల వివరాలు ఎందుకు తొలగిస్తున్నారని సీఎం రేవంత్​ రెడ్డి ప్రశ్నించారు. దాదాపు 3,500 చెరువల డేటా ఆన్​లైన్​లో ఉండాల్సిందేనని ఆదేశించారు. ఆక్రమణ కాకుండా చెరువుల వద్ద వెంటనే సీసీ కెమెరాలు ఏర్పాటు చేయాలని సూచించారు.

CM Revanth Fires on GHMC Officers : ఉదయాన్నే కాలనీల్లో పర్యటించని జీహెచ్​ఎంసీ(GHMC) జోనల్​ కమిషనర్లు ఇంటికి వెళ్లిపోవచ్చని ముఖ్యమంత్రి రేవంత్​ రెడ్డి వ్యాఖ్యానించారు. కుర్చీల్లో కూర్చొనే పోస్టులు కావాలంటే వేరే ఇస్తామని అన్నారు. న్యూయార్క్​ టైమ్​ స్క్వేర్​ తరహాలో హైదరాబాద్​లో వీడియో ప్రకటన బోర్డును ఏర్పాటు చేయాలని సూచించారు. మల్టీ యుటిలిటీ టవర్స్​ను ఏర్పాటు చేయాలన్నారు. వీధి దీపాల వ్యవస్థ మెరుగుపరచాలని చెప్పారు. హైదరాబాద్​లో పిల్లల కోసం క్రీడా మైదానాలు ఏర్పాటు చేయాలని అధికారులకు తెలిపారు. నగరంలో ప్రైవేటు సెక్టార్​లో మల్టీ లెవెల్​ పార్కింగ్​ ఏర్పాటుకు సీఎం రేవంత్​ సూచించారు.

జలమండలిపై సీఎం సమీక్ష :

• స్థానిక చెరువుల‌ను స్టోరేజీ ట్యాంకులుగా ఉప‌యోగించుకోవాల‌ని సూచ‌న‌.
• హైద‌రాబాద్ న‌గ‌రానికి మంచి నీటి కొర‌త లేకుండా చూడాల‌ని ఆదేశాలు.
• మ‌ల్ల‌న్న సాగ‌ర్‌, కొండ‌పోచ‌మ్మ, రంగ‌నాయ‌క సాగ‌ర్ నుంచి హైద‌రాబాద్‌కు తాగు నీటి స‌ర‌ఫ‌రా అయ్యేలా ప్ర‌ణాళిక ర‌చించాల‌ని ఆదేశం.
• వ‌చ్చే 50 ఏళ్ల తాగు నీటి అవ‌స‌రాల కోసం ప్ర‌ణాళిక‌లు ర‌చించాల‌ని అధికారుల‌కు సూచించిన సీఎం.
• ఔట‌ర్ రింగు రోడ్డు బ‌య‌ట ఉన్న చెరువుల‌ను క్ల‌స్ట‌ర్లుగా విభ‌జించాల‌ని సూచ‌న‌.
• హైద‌రాబాద్‌లో విలువైన ప్ర‌భుత్వ ఆస్తుల జాబితాను ప్ర‌భుత్వానికి సమర్పించాలి.
• హైద‌రాబాద్‌లో ఏవైనా ప్రారంభోత్స‌వాలు ఉంటే వారం రోజుల్లో పెట్టుకోవాలి.
• మెట్రో కొత్త మార్గాల‌కు త్వ‌ర‌లో శంకుస్థాప‌న.

జీహెచ్​ఎంసీలో వయసు పైబడిన కార్మికుల స్థానంలో వారి కుటుంబ సభ్యులకు అవకాశం :రాష్ట్రంలో కొత్త‌గా ఏర్ప‌డిన 85 మున్సిపాలిటీల్లో క‌మిష‌న‌ర్లు లేక‌పోవ‌డంపై సీఎం రేవంత్ రెడ్డి ఆశ్చ‌ర్యం వ్యక్తం చేశారు. కొత్త కార్పొరేషన్లకు ఐఏఎస్​లను, మున్సిపాలిటీలకు గ్రూప్​ 1 అధికారులను కమిషనర్​లుగా నియమించాలని సీఎం తెలిపారు. మున్సిపల్​ కార్మికులకు ప్రమాద బీమా(Bhema)పై అధ్యయనం చేయాలని ఆదేశించారు. ఆస్తి పన్ను మదింపు కోసం డ్రోన్​ కెమెరాలను ఉపయోగించేందుకు అధ్యయనం చేయాలని ఆదేశించారు. జీహెచ్​ఎంసీలో వయసు పైబడిన కార్మికుల స్థానంలో వారి కుటుంబ సభ్యులకు అవకాశం కల్పించాలని సీఎం రేవంత్​ రెడ్డి సూచించారు.