బీఆర్​ఎస్​కు బిగ్​ షాక్​ - కాంగ్రెస్ గూటికి చేరిన ఎమ్మెల్యే పోచారం శ్రీనివాస్​ రెడ్డి - CM Revanth Met Pocharam Srinivas

CM Revanth Met Pocharam Srinivas Reddy : తెలంగాణలోని బీఆర్​ఎస్​ ఎమ్మెల్యే, మాజీ స్పీకర్​ పోచారం శ్రీనివాస్​ రెడ్డితో ఆ రాష్ట్ర ముఖ్యమంత్రి రేవంత్​ రెడ్డి భేటీ అయ్యారు. ఈ సందర్భంగా పార్టీలోకి రావాల్సిందిగా సీఎం పోచారంను కోరగా, ఆయన సముఖత వ్యక్తం చేశారు. దీంతో సీఎం రేవంత్​ రెడ్డి ఆయనకు శాలువా కప్పి పార్టీలోకి ఆహ్వానించారు.

CM Revanth Reddy met BRS MLA Pocharam Srinivas Reddy :తెలంగాణలోని కామారెడ్డి జిల్లా బాన్సువాడ బీఆర్​ఎస్​ ఎమ్మెల్యే పోచారం శ్రీనివాస్​ రెడ్డి ఇంటికి సీఎం రేవంత్​ రెడ్డి వెళ్లారు. పోచారాన్ని కాంగ్రెస్​ పార్టీలోకి సీఎం రేవంత్​ రెడ్డి ఆహ్వానించారు. ముఖ్యమంత్రి ఆహ్వానం పట్ల పోచారం సానుకూలంగా స్పందించడంతో పార్టీ కండువా కప్పి పార్టీలోకి ఆహ్వానించారు. బీఆర్​ఎస్​లో సీనియర్​ నేతగా ఉన్న శ్రీనివాస్​ రెడ్డి, కుమారుడు భాస్కర్​ రెడ్డితో కలిసి హస్తం గూటికి చేరడంతో 'కారు'కు పెద్ద షాక్​ తగిలినట్లైంది.

ఈ సందర్భంగా సీఎం రేవంత్​ రెడ్డి మాట్లాడుతూ రైతుల సంక్షేమానికి తమ ప్రభుత్వం ప్రాధాన్యత ఇస్తోందని తెలిపారు. రైతుల సంక్షేమానికి పోచారం ఎన్నో సేవలు అందించారన్నారు. పోచారం సలహాలు, సూచనలు తీసుకునేందుకు వచ్చామని చెప్పారు. పోచారం సూచనలకు ప్రాధాన్యత ఇస్తామని స్పష్టం చేశారు. భవిష్యత్​లో పోచారం శ్రీనివాస్​ రెడ్డికి సముచిత గౌరవం కల్పిస్తామని సీఎం రేవంత్​ హామీ ఇచ్చారు.

"తెలంగాణ పునర్నిర్మాణంలో భాగంగా పోచారం శ్రీనివాస్ రెడ్డి గారిని కలిశాము. పెద్దలుగా అండగా నిలబడాలని వారిని కోరాం. తెలంగాణ రైతుల సంక్షేమ కోసం పోచారం కాంగ్రెస్​లో చేరారు. రైతుల సంక్షేమంపై వారి సలహాలు సూచనలు తీసుకుని ముందుకెళ్తాం. రైతు రుణమాఫీ విధివిధానాలపై ఇవాళ మంత్రి వర్గ సమావేశంలో నిర్ణయం తీసుకోబోతున్నాం. భవిష్యత్​లో పోచారం శ్రీనివాస్​ రెడ్డికి సముచిత గౌరవం ఇస్తాం. నిజామాబాద్​ జిల్లాలో అసంపూర్తిగా ఉన్న ప్రాజెక్టులను పూర్తి చేసేందుకు ఆయన సహకారం తీసుకుంటాం. ఇది రైతు రాజ్యం. రైతు సంక్షేమ రాజ్యం. రైతు సంక్షేమం కోసం అవసరమైన అందరినీ కలుపుకుని పోతాం."- రేవంత్​ రెడ్డి, తెలంగాణ ముఖ్యమంత్రి

బీఆర్​ఎస్​ నేతల నిరసన : బీఆర్​ఎస్​ ఎమ్మెల్యే పోచారం శ్రీనివాస్​ రెడ్డి ఇంటి వద్ద ఉద్రిక్తత పరిస్థితి నెలకొంది. పోచారం ఇంట్లో సీఎం రేవంత్​ ఉండగానే ఇంటి బయట బీఆర్​ఎస్​ నిరసనలు తెలిపింది. పోచారం నివాసం వద్ద బాల్క సుమన్​, బీఆర్​ఎస్​ నేతలు నిరసన వ్యక్తం చేశారు. ఆందోళనకు దిగిన బీఆర్​ఎస్​ నేతలను పోలీసులు అడ్డుకున్నారు. ఈ క్రమంలో బీఆర్​ఎస్​, కాంగ్రెస్​ నేతల మధ్య తోపులాట, కాస్త ఘర్షణ జరిగింది. బాల్క సుమన్​, బీఆర్​ఎస్​ నేతలను పోలీసులు అదుపులోకి తీసుకున్నారు.