ఇన్​స్టాగ్రామ్​తో కి'లేడీ' వలపు వల - అమెరికా నుంచి రప్పించి మరీ కిడ్నాప్​ - ఆ తర్వాత ఏమైందంటే? - NRI Trapped in Women Cheating

ఇన్​స్టాలో వలపు వల - ఎన్నారైని రప్పించి కిడ్నాప్ చేసిన వైజాగ్​ యువతి - విచారణలో పోలీసులు షాక్

NRI Trapped in Women Cheating at Vizag : తీయటి కబుర్లతో ఓ యువతి, యువకులను ముగ్గులో దింపి అందిన మేరకు డబ్బులు గుంజుతూ మోసాలకు పాల్పడుతున్న సంఘటన ఇది. అమెరికాలో జాబ్​ చేస్తున్న ఓ ఎన్నారై యువకుడిని మాయమాటలతో దగ్గరకు రప్పించుకుని బలవంతంగా నిశ్చితార్థం చేయించుకుని పెళ్లి చేసుకోవాలని తీవ్ర ఒత్తిడికి గురి చేసిన ఉదంతంలో చివరకు ఆ కి'లేడీ' పోలీసులకు చిక్కింది. ఇందుకు సంబంధించి భీమిలి సీఐ బి.సుధాకర్ తెలిపిన వివరాల ప్రకారం,

విశాఖపట్నం మురళీనగర్​కు చెందిన కొరుప్రోలు జోయ్ జమీనా (25) అనే యువతి అమెరికాలో ఉంటున్న ఎన్నారై మనోహర్​తో ఇన్​స్టాగ్రామ్​లో పరిచయం పెంచుకుంది. వైజాగ్​లో నివాసముంటున్న యువకుడి తల్లిదండ్రుల వద్దకు వెళ్లి స్నేహితురాలిని అంటూ పరిచయం చేసుకొంది. రోజుల పాటు మంచిగా నటిస్తూ మీ అబ్బాయిని పెళ్లి చేసుకుంటానని చెప్పగా వారు నిరాకరించారు. దీంతో ఆమె అమెరికా నుంచి యువకుడ్ని రప్పించి, ఎయిర్​పోర్ట్​ నుంచి నేరుగా మురళీనగర్ ఎన్జీవో కాలనీలో ఉంటున్న తన ఇంటికి తీసుకుపోయింది. మత్తు పానీయం ఇచ్చి ఇరువురు సన్నిహితంగా ఉంటున్నట్లు ఫొటోలు తీసింది. వాటితో తనను పెళ్లి చేసుకోవాలని బ్లాక్ మెయిల్ చేసింది.

Woman Kidnapped NRI in Visakha :భీమిలిలోని ఓ రెస్టారెంట్లో రూ.5 లక్షలు ఖర్చు చేయించి తన స్నేహితుల సమక్షంలో బలవంతంగా నిశ్చితార్థం చేయించుకుంది. అనంతరం పెళ్లి చేసుకోకపోతే అభ్యంతరకర ఫొటోలను బహిర్గతం చేస్తానని బెదిరిస్తూ వేధింపులకు గురి చేసింది. ఎన్నారై మనోహర్​ను రోజుల తరబడి ఇంట్లో బంధించింది. ఆమె నుంచి తప్పించుకున్న బాధితుడు, ఆమె ఉచ్చు నుంచి పూర్తిగా విముక్తి పొందేందుకు ఈ నెల 4న భీమిలి పోలీస్ స్టేషన్​లో ఫిర్యాదు చేశాడు. దీంతో నిందితురాలి నుంచి ల్యాప్​టాప్​, ఒక ట్యాబ్, మూడు సెల్​ఫోన్లు, ఒక కారును పోలీసులు స్వాధీనం చేసుకున్నారు. గతంలోనూ ఇదే తరహాలో పలువురిని మోసగించి పెద్ద మొత్తంలో డబ్బులు వసూలు చేసినట్లు తెలిపారు. నిందితురాలిని అరెస్ట్ చేసి, రిమాండ్​కు తరలించారు. ఈ కేసుకు సంబంధమున్న ఆమె అనుచరులపైనా చర్యలు తీసుకుంటామని సీఐ పేర్కొన్నారు.