డబ్బులు పంచుతానంటూ ఇన్​స్టాగ్రామ్​లో యువకుడు ప్రచారం - ఏకంగా బౌన్సర్లతో దిగి హల్​చల్​

కొండాపూర్​లోని ఏఎంబీ మాల్​లో యువకుడు హల్​చల్​ - ఏఎంబీ మాల్​లో డబ్బులు పంచుతానంటూ ఇన్​స్టాగ్రామ్​లో ప్రచారం - బౌన్సర్లతో ఏఎంబీ మాల్​కు చేరుకుని హల్​చల్​ చేసిన యువకుడు

AMB Mall Instagram Viral Video :సోషల్​ మీడియాలో కొందరు రాత్రికి రాత్రే స్టార్​ అయిపోవాలని వారికి నచ్చిన పనులను చేస్తుంటారు. తోటి వారిని ఇబ్బంది పెడుతున్నామన్న మ్యానర్స్​ లేకుండా పిచ్చిపిచ్చి పనులకు మార్గాలు వెతుకుంటారు. ఇందుకు బెస్ట్​ ఉదాహరణ ఈ నెలలోనే ఒక వ్యక్తి ఓఆర్​ఆర్​పై డబ్బులు దాచుతూ ఆ నగదు తీసుకోవాలని ఇన్​స్టాగ్రామ్​లో రూల్​ చేసి పెట్టాడు. అది చూసిన పోలీసులు అతగాడి ఆట కట్టించి.. అరెస్టు చేశారు. ఇప్పుడు అదే తరహాలో గచ్చిబౌలి పోలీస్​ స్టేషన్​ పరిధిలోని కొండాపూర్​ ఏఎంబీ మాల్​లో ఓ వ్యక్తి డబ్బులు వెదజల్లుతానని హల్​ చల్​ చేశాడు. ఇప్పుడు ఆ వీడియో సోషల్​ మీడియాలో వైరల్​గా మారింది. అయితే అది ఆలస్యంగా వెలుగులోకి వచ్చింది.

ఏఎంబీ మాల్​లో ఉండేవాళ్లు తెలిపిన వివరాల ప్రకారం, కొండాపూర్​లోని ఏఎంబీ మాల్​లో ఓ వ్యక్తి సోషల్​మీడియాలో ఫేమస్​ అవ్వడం కోసం మాల్​లో డబ్బులు ఇస్తానంటూ ఇన్​స్టాగ్రామ్​లో ప్రచారం చేశాడు. తన ఇన్​స్టాగ్రామ్​లోని ఫాలోవర్స్​ అందరూ కొండాపూర్​లోని ఏఎంబీ మాల్​ రెండో అంతస్తు కొస్తే వారికి డబ్బులు ఇస్తానంటూ తన ఇన్​స్టాగ్రామ్​లో వీడియో పోస్టు చేశారుడు. ఆ యువకుడు అనుకున్నట్లుగానే మాల్​కు సూట్​కేసులతో వచ్చాడు. చుట్టూ బౌన్సర్లతో మాల్​లోకి ఎంట్రీ ఇచ్చాడు. దీన్ని ఒక వీడియోగా తీసి పోస్టు చేశాడు.

ఈ వీడియో గురించి గచ్చిబౌలి పోలీసులను అడగగా ఇన్​స్టాగ్రామ్​లో ఆ వీడియో చేసింది వంశీ అనే యువకుడు అని తెలిపారు. గతంలో కూడా సోషల్​ మీడియాలో ఫేమస్​ అవడానికి కేపీహెచ్​బీలో రోడ్లపై పైసలు చల్లి హల్​చల్​ చేశాడని గుర్తు చేశారు. అప్పుడు అతడిపై కూకట్​పల్లి పోలీస్​ స్టేషన్​లో కేసు నమోదు అయిందని.. అయినా సరే వంశీ తీరు మారలేదని అన్నారు. శుక్రవారం కొండాపూర్​లోని ఏఎంబీ మాల్​లో హల్​చల్​ చేసిన విషయంపై ఎలాంటి ఫిర్యాదు రాలేదని పోలీసులు తెలిపారు.