IPL 2025 Mega Auction : ఒక్కో సీజన్‌ పూర్తయ్యే కొద్దీ ఇండియన్ ప్రీమియర్ లీగ్ (IPL) పాపులారిటీ అంతకంతకూ పెరుగుతోంది. రాబోయే 2025 సీజన్‌ను మరచిపోలేనిదిగా మార్చేందుకు బీసీసీఐ అన్ని ప్రయత్నాలు చేస్తోంది. పెరిగిన బడ్జెట్‌లు, వేలంలోకి ప్రవేశించే ప్రధాన ఆటగాళ్ళు, యంగ్ ప్లేయర్స్, ఇంకా కొత్త నిబంధనలతో 2025 ఐపీఎల్ అంచనాలను మరింత పెంచుతోంది. ఈ సీజన్‌ కోసం మొత్తం శ్యాలరీ క్యాప్ పరిమితిని రూ.120 కోట్లకు పెంచారు. ఇందులో వేలం పర్స్, పనితీరు బోనస్‌లు, మ్యాచ్ ఫీజులు కలిపి ఉంటాయి. అయితే ఈ దశాబ్దంలోనే 2025 ఐపీఎల్ మెగా వేలం అతిపెద్దదిగా అవతరించనుంది. ఎందుకంటే? అందుకు గల కారణాలను తెలుసుకుందాం.
ఏకంగా రూ.120 కోట్లు - 2008 మొదటి సీజన్‌లో ఒక్కో ఫ్రాంచైజీ గరిష్ఠంగా రూ.21.75 కోట్లు మాత్రమే ఖర్చు చేయాలి. కానీ ఈ సంవత్సరం అతి చిన్న మొత్తంతో వేలంలో పాల్గొంటున్న రాజస్థాన్ రాయల్స్ వద్దనే రూ.41 కోట్లు ఉండటం గమనార్హం. ప్రారంభ సీజన్‌తో పోలిస్తే అప్పటి గరిష్ఠ పరిమితి కన్నా ఇది దాదాపు రెట్టింపు. ఇక ఈ ఏడాది ఏకంగా ఆక్షన్ పర్స్ రూ.120 కోట్లు.
జెడ్డాలో మెగా వేలం -2025 ఐపీఎల్ మెగా వేలం సౌదీ అరేబియాలోని జెడ్డాలో నవంబర్ 24, 25న రెండు రోజుల పాటు జరుగుతుంది. ఈ వేలానికి ఏకంగా 1,574 మంది ప్లేయర్లు రిజిస్టర్‌ చేసుకున్నారు. వీరిలో 409 మంది అంతర్జాతీయ ఆటగాళ్లు ఉన్నారు. దక్షిణాఫ్రికా, ఆస్ట్రేలియా, ఇంగ్లాండ్లకు చెందిన స్టార్ ప్లేయర్లు కూడా ఆసక్తి చూపుతున్నారు. అయితే వీరందరిలో 574 మందిని షార్ట్‌ లిస్ట్ చేశారు నిర్వాహకులు.
టీమ్‌ ఇండియా స్టార్ ప్లేయర్లు -ఈ వేలంలో భారత జట్టు స్టార్ ప్లేయర్లు కూడా పాల్గొంటున్నారు. గతేడాది ఐపీఎల్‌లో కెప్టెన్లుగా ఉన్న రిషబ్ పంత్, కేఎల్ రాహుల్, శ్రేయాస్ అయ్యర్ అందుబాటులో ఉన్నారు.
రిషబ్ పంత్ - రిషబ్ పంత్ ఇప్పటికే బ్యాటింగ్, వికెట్ కీపింగ్, కెప్టెన్సీలో సత్తా చాటాడు. మూడు రకాలుగా ఉపయోగపడే పంత్‌కు ఈ వేలంలో భారీ ధర దక్కుతుందని భావిస్తున్నారు. గత ఏడాది రూ.24.75 కోట్లతో అత్యధిక ధర రికార్డు నెలకొల్పిన మిచెల్ స్టార్క్‌ను అధిగమించే అవకాశం ఉందని చెబుతున్నారు.
కేఎల్ రాహుల్ : ఈ వేలంలో రాహుల్ కూడా రికార్డు స్థాయి ధర పలికే అవకాశాలు ఉన్నాయి. ఐపీఎల్‌లో ప్లేయర్గా చాలా సీజన్లు ఆడాడు, కెప్టెన్‌గా చేసిన అనుభవం కూడా ఉంది.
శ్రేయాస్ అయ్యర్ : 2024 ఐపీఎల్ సీజన్‌లో కేకేఆర్‌కు టైటిల్‌ అందించిన కెప్టెన్‌ శ్రేయాస్ అయ్యర్. ఇప్పుడు వేలంలో అందుబాటులో ఉన్నాడు. కెప్టెన్‌, స్టార్ బ్యాటర్‌ కోసం వెతికే ఫ్రాంచైజీలు అయ్యర్ కోసం పోటీ పడే అవకాశం ఉంది.
స్టార్‌లను రిటైన్‌ చేసుకున్న ఫ్రాంచైజీలు -వేలానికి ముందే ప్లేయర్ రిటెన్షన్‌లతో 2025 ఐపీఎల్ సీజన్‌ రికార్డులను బద్దలు కొట్టింది. హెన్రిచ్ క్లాసెన్ ఐపీఎల్ చరిత్రలో అత్యంత ఖరీదైన రిటెన్షన్‌ ప్లేయర్గా నిలిచాడు. అతడితో సన్‌రైజర్స్ హైదరాబాద్‌ ఏకంగా రూ.23 కోట్లతో ఒప్పందం కుదుర్చుకుంది. విరాట్‌ కోహ్లి (ఆర్సీబీ రూ.21 కోట్లు), నికోలస్ పూరన్ (లఖ్‌నవూ రూ.21 కోట్లు)తో ఊహించని ధర అందుకున్నారు.