ప్రపంచ క్రికెట్‌పై ఆస్ట్రేలియా ఆధిపత్యం

Under 19 World Cup 2024 Australia : అండర్ - 19లో నాలుగోసారి జగజ్జేతగా అవతరించి టైటిల్​ను ఎగరేసుకుపోయింది ఆస్ట్రేలియా. అలా ఈ అండర్​ 19 టైటిల్‌తో పాటు ఆస్ట్రేలియా అన్ని విభాగాల్లోనూ పురుషులు, మహిళలు, జూనియర్‌ లెవెల్​లో వరల్డ్​ ఛాంపియన్‌గా(వన్డే ఫార్మాట్‌లో అవతరించింది.

Under 19 World Cup 2024 Australia : ఫిబ్రవరి 11 భారత కుర్రాళ్ల కల చెదిరిన సంగతి తెలిసిందే. అండర్‌ - 19 వరల్డ్ కప్​ చేజారింది. ఆదివారం జరిగిన తుదిపోరులో డిఫెండింగ్‌ ఛాంపియన్‌ టీమ్‌ఇండియాను 79 పరుగుల తేడాతో ఆస్ట్రేలియా జట్టు ఓడించింది. అయితే ఆస్ట్రేలియా ఇప్పుడేమి తొలిసారి ఆధిపత్యం చెలాయించలేదు. ప్రపంచ క్రికెట్‌పై కంగారుల జట్టు ఎప్పటినుంచో ఆధిపత్యం‌ కొనసాగిస్తూనే ఉంది. ఫార్మాట్లకు అతీతంగా వరుస టైటిల్స్​ను ఖాతాలో వేసుకుంటూ ప్రపంచ క్రికెట్‌ను శాశిస్తోంది. ఈ మధ్య కాలంలో జరిగిన అన్ని మెగా ఈవెంట్ల ఫైనల్స్‌లోనూ ఆసీస్​ విజయాలు సాధిస్తూ దూసుకెళ్లింది.

ఇంకా చెప్పాలంటే ఆస్ట్రేలియా క్రికెట్​ హవా కేవలం పురుషుల క్రికెట్‌కు మాత్రమే పరిమితం కాలేదు. మహిళ క్రికెట్‌లోనూ డామినేషన్​ చేస్తూనే ఉంది. అలా ఇప్పుడు ఆస్ట్రేలియన్లు జూనియర్​ విభాగంలోనూ అదరగొట్టారు. అండర్‌ 19 వరల్డ్‌కప్‌ ఫైనల్​లో యువ ఆసీస్‌ జట్టు యంగ్‌ ఇండియాను చిత్తుగా ఓడించింది. ఈ అండర్ - 19లో నాలుగోసారి జగజ్జేతగా అవతరించి టైటిల్​ను ఎగరేసుకుపోయింది. అలా ఈ అండర్​ 19 టైటిల్‌తో ఆస్ట్రేలియా అన్ని విభాగాల్లోనూ పురుషులు, మహిళలు, జూనియర్‌ లెవెల్​లో వరల్డ్​ ఛాంపియన్‌గా(వన్డే ఫార్మాట్‌లో) అవతరించింది.

• వన్డే వరల్డ్‌కప్‌ ఛాంపియన్‌ - ఆస్ట్రేలియా
• అండర్‌ 19 వరల్డ్‌కప్‌ ఛాంపియన్‌ - ఆస్ట్రేలియా
• మహిళల వన్డే వరల్డ్‌కప్‌ ఛాంపియన్‌ - ఆస్ట్రేలియా
• మహిళల టీ20 ఛాంపియన్‌ - ఆస్ట్రేలియా
• వరల్డ్‌ టెస్ట్‌ ఛాంపియన్‌ - ఆస్ట్రేలియా

ఇక అండర్ - ​19 వరల్డ్‌ కప్‌ 2024 ఫైనల్ విషయానికొస్తే.. యంగ్​ ఆస్ట్రేలియా భారత కుర్రాళ్లను​ 79 పరుగుల తేడాతో ఓటమి రుచిని చూపించింది. ఏకపక్షంగా సాగిన ఈ మ్యాచ్‌లో మొదట బ్యాటింగ్​కు దిగిన ఆస్ట్రేలియా నిర్ణీత ఓవర్లలో 7 వికెట్లు కోల్పోయి 253 పరుగులు చేసింది హర్జాస్‌ సింగ్‌ (64 బంతుల్లో 55; 3×4, 3×6) కీలక ఇన్నింగ్స్‌ ఆడాడు. కెప్టెన్‌ హ్యూ వీబ్జెన్‌ (48), ఒలీవర్‌ పీక్‌ (46 నాటౌట్‌), హ్యారీ డిక్సన్‌ (42) కూడా మంచిగా రాణించారు. భారత బౌలర్లలో రాజ్‌ లింబాని (3/38), నమన్‌ తివారి (2/63) అదరగొట్టారు. ఇక ఛేదనలో చేతులెత్తేసిన యంగ్‌ ఇండియా 43.5 ఓవర్లలో 174 పరుగులకు కుప్పకూలిపోయింది. ఆదర్శ్‌ సింగ్‌ (77 బంతుల్లో 47; 4×4, 1×6), హైదరాబాద్‌ కుర్రాడు మురుగన్‌ అభిషేక్‌ ( 46 బంతుల్లో 42; 5×4, 1×6) తప్ప మిగతా బ్యాటర్లు చేతులెత్తేశారు. ఆసీస్‌ బౌలర్లలో మ్యాన్‌ ఆఫ్‌ ద మ్యాచ్‌ బియర్డ్‌మన్‌ (3/15), మెక్‌మిలన్‌ (3/43), విడ్లర్‌ (2/35) విజృంభించారు. ఈ ఓటమితో భారత క్రికెట్ అభిమానులంతా నిరాశ పడిపోయారు.