Shivam Dube Wife Emotional Post :చెన్నై సూపర్ కింగ్స్ ప్లేయర్, టీమ్ఇండియా ఇండియా మాజీ కెప్టెన్‌ మహేంద్ర సింగ్ ధోనీకి ఉన్న ఫ్యాన్ ఫాలోయింగ్ గురించి ప్రత్యేకంగా చెప్పనక్కర్లేదు. ఆయన బ్యాట్ పట్టుకుని స్టేడియంకు వచ్చాడంటే ఇక అభిమానుల్లో ఎక్కడ లేని ఉత్సాహం వస్తుంది. అతడ్ని చూసేందుకు సుదూర ప్రాంతాల నుంచి కూడా వస్తుంటారు. సామాన్య ప్రజల నుంచి సెలబ్రిటీల వరకు చాలా మంది ధోనీకి వీరాభిమానులుగా ఉన్నారు. తాజాగా చెన్నై జట్టు ప్లేయర్ శివమ్ దూబె భార్య అంజుమ్‌ ఖాన్ కూడా ఇదే విషయంపై నెట్టింట షేర్ చేసిన ఓ పోస్ట్ ఇప్పుడు సోషల్ మీడియాలో ట్రెండ్ అవుతోంది.
"మహీ టీమ్ఇండియాకు కెప్టెన్‌గా వ్యవహరిస్తున్న రోజులవి. మొదటిసారి నేను ఓ న్యూస్‌ ఛానెల్‌లో ఆయన పేరు విన్నాను. ఆయన గురించి తెలియనంత వరకు నాకు క్రికెట్‌ అంటే ఇష్టం మాత్రమే ఉండేది. కానీ, నాకు తెలియకుండానే ఆ రోజు ఆ ఇంటర్వ్యూ మొత్తాన్ని ఎందుకు చూశానో తెలియదు. అది నాకు సాధారణంగా అనిపించలేదు. అప్పటి నుంచి ఇప్పటివరకు క్రికెట్‌ మ్యాచ్‌లన్నింటినీ చూస్తాను. ధోనీ ఆడే మ్యాచ్లను మాత్రం అసలు మిస్సవ్వను. జట్టు కష్టాల్లో ఉన్న సమయంలో మహీ ఉంటే గెలిపిస్తారన్న ధైర్యం ఉంటుంది. ధోనీ అంటే క్రికెట్‌, క్రికెట్‌ అంటే ధోనీ" అంటూ ఎమోషనలయ్యారు. ఇక ఇదే పోస్ట్లో ఆమె మరిన్ని ఆసక్తికరమైన విషయాల గురించి చెప్పారు.
"మొదటి సారి ధోనీని చూసినప్పుడు పొడవాటి హెయిర్‌ స్టైల్‌తో కనిపించారు. అప్పుడు నాకు నా చిన్నప్పటి రోజులు గుర్తుకు వచ్చాయి. నేను ఎంతో ఎమోషనల్‌గానూ కనెక్ట్‌ అయ్యాను. ఆయన్ను కలవాలనే ఆశ నా భర్త శివమ్ ద్వారా నెరవేరింది. మ్యాచ్ జరుగుతున్న సమయంలో శివమ్‌కు మద్దతుగా అరుస్తూ ఉండేదాన్ని. కానీ, అక్కడ ధోనీ ఉంటే మాత్రం ఇంకాస్త ఎక్కువగానే అరుస్తుంటాను. ఆయన టీమ్‌లో శివమ్ కూడా ఉండాలనేదే నా కోరిక. ఆయన నుంచి ఎంతో నేర్చుకోవాలి" అంటూ తన మనసులోని మాట చెప్పారు.