వైసీపీ అరాచకాలకు వారసులు - తల్లిదండ్రుల అధికారాన్ని చలాయిస్తున్న పుత్రరత్నాలు - YSRCP Leaders Sons Irregularities

YSRCP Leaders Sons Irregularities: రైతుల మెడపై కత్తి పెట్టి భూములు కౌలుకిచ్చినట్లు రాయించుకునేదొకరు. కబ్జాకు అడ్డుపడితే కాళ్లు విరిచేస్తానంటూ హెచ్చరించేదొకరు. కమీషన్‌ ఇవ్వలేదని కాంట్రాక్టర్లను చితక్కొట్టేది ఒకరు. ప్రభుత్వ భూముల్ని ఆక్రమించి లేఅవుట్‌ వేసేదొకరు. మా మాటే వినరా అంటూ పోలీసులపైనే చిందులు తొక్కేదొకరు. ఇవీ రాష్ట్రంలో కొందరు వైసీపీ ప్రజాప్రతినిధుల పుత్రరత్నాల అరాచకాలు.

YSRCP Leaders Sons Irregularities:ఉమ్మడి తూర్పుగోదావరి జిల్లా మంత్రి అధికారాన్ని అడ్డుపెట్టుకుని ఓ కుమారుడు కబ్జాలు, దోపిడీల్లో పీహెచ్​డీ చేస్తే, ఇంకో పుత్రరత్నం ఏకంగా రౌడీషీటర్లనే వెనకేసుకుని తిరుగుతూ గ్యాంగ్‌ల్ని నడిపిస్తున్నారు. రాష్ట్రవ్యాప్తంగా సంచలనం సృష్టించిన ఓ అల్లర్ల కేసులో ఎవరెవరిపై కేసులు పెట్టాలో కూడా మంత్రి కుమారులే నిర్దేశించారంటే అధికార దుర్వినియోగానికి ఇంతకన్నా పరాకాష్ఠ ఇంకోటి ఉంటుందా? కక్షకట్టి తమను అల్లర్ల కేసులో ఇరికించారని, తన ఇంటిపై దాడి చేయించారని వైసీపీ నాయకుడే వాపోయే పరిస్థితి నెలకొంది.

డీఎస్పీపైనే తిరగబడ్డ మంత్రి పుత్రరత్నం:ఎక్కడైనా భూవివాదం ఉందంటే రౌడీషీటర్లను అక్కడకు పంపి పంచాయితీ పెడతారు. ఎకరాకు 5లక్షల రూపాయలకుపైనే వసూలు చేస్తారు. తమ తీర్పును పట్టించుకోని వారిపైకి అధికారుల్ని ఉసిగొల్పుతారు! మరో కుమారుడైతే తానే ఎమ్మెల్యేని అన్నట్లు అధికారులు, పోలీసుల్ని వెంటేసుకుని తిరిగేస్తుంటారు. గతంలో నడిరోడ్డుపైనే పుట్టిన రోజు వేడుకలు చేసుకున్నారు. అల్లర్ల కేసులో తమను అన్యాయంగా ఇరికించారంటూ నిలదీసిన గ్రామస్థుల్ని ఠాణాలో పెట్టించి వేధించారు. సైలెన్సర్లు తీసేసి అతివేగంతో వెళ్తున్న బైకుల్ని పోలీసులు స్వాధీనం చేసుకుంటే ఏకంగా డీఎస్పీపైనే తిరగబడ్డాడు ఆ మంత్రి పుత్రరత్నం. ఆ తర్వాత తండ్రి కూడా కుమారుడ్నే వెనకేసుకొచ్చి పట్టుకున్న బైకులతోపాటు మరికొన్నింటిని ఎత్తుకెళ్లారు.

రైతుల భూములు కబ్జా:ఇక కైకలూరుకు మూలస్తంభాన్ని అని చెప్పుకునే నాయకుడి కుమారుడైతే పోలీసుల్ని అడ్డుపెట్టుకుని సెటిల్మెంట్లలో ఆరితేరాడు. కైకలూరులో 64 మంది రైతులు వందెకరాల పొలాల్ని చేపల చెరువులుగా మార్చి లీజుకిస్తున్నారు. దానిపై ఆ నేతాశ్రీ కుమారుడి కన్నుపడింది. ఇక అంతే కౌలుదారుడ్ని బెదిరించి తరిమేశారు. చేపల్ని పట్టి అమ్ముకుని సొమ్ము చేసుకున్నారు. ఇకపై ఆ చెరువుల్లో తామే పంట వేస్తామని, ఇచ్చినంత తీసుకోండని రైతులకు హుకుం జారీ చేశారు.

ఇదే అన్యాయం అంటూ రైతులు స్టేషన్‌కు వెళ్తే పోలీసులు కేసు తీసుకోలేదు సరికదా? ఎంతోకొంత ఇచ్చి సెటిల్‌ చేసుకోండంటూ ఒత్తిడి తెచ్చారు. చివరకు రైతులే తమ భూముల్ని లీజుకిస్తున్నట్లు స్టాంపు పత్రాలపై సంతకాలు పెట్టేలా చేశారు. తమపై ఎవరి ఒత్తిడి లేదంటూ వీడియోలు తీయించి సామాజిక మాధ్యమాల్లో పెట్టించారు. మండలానికి ఒకర్ని పెట్టి 4 మండలాల్లో మట్టి మాఫియాను నడిపిస్తున్నాడు ఆ పుత్రరత్నం.

టీడీపీ తరఫున పోటీ చేయటానికి వీల్లేదంటూ హుకుం:సోషల్‌ మీడియాలో ప్రభుత్వ వ్యతిరేక పోస్టులు పెట్టే వారిపై రౌడీగ్యాంగ్‌తో దాడి చేయిస్తున్నారు. ఎస్సై, సీఐ స్థాయి అధికారులే ముఖ్యనేత కుమారుడి దగ్గరే గొడవ సెటిల్ చేసుకోడంటూ పంపిస్తారు. స్థానిక సంస్థల ఎన్నికల్లో నియోజకవర్గంలోని 4 మండలాల్లో తెలుగుదేశం తరఫున ఎవరూ నిలబడడానికి వీల్లేదంటూ హుకుం జారీ చేశారు.

ఉరవకొండలో అరాచక పర్వం:ఇక ఉరవకొండ నియోజకవర్గంలో వైసీపీ నేత కుమారుడు అనకొండలా తయారయ్యాడు. తండ్రికి ఎలాంటి పదవీ లేకపోయినా పోలీసులు, వాలంటీర్లతో సమావేశాలు పెట్టి పనులు పురమాయిస్తుంటారు. కూడేరు, ఉరవకొండ మండలాల్లో వందలాది అనధికార లేఅవుట్లు వేయించి ఎకరాకు 2 నుంచి 5 లక్షల రూపాయల వరకూ కప్పం కట్టించుకుంటుంటారు.

కూడేరులో ఓ మహిళకు చెందిన 12 ఎకరాల భూమిని నకిలీ ఆధార్‌కార్డు సృష్టించి కాజేశారు. ఉరవకొండలోని వీరభద్రస్వామి ఆలయ మాన్యం భూమిలో 4ఎకరాలు అమ్ముకున్నారు. అంగన్‌వాడీ పోస్టులనూ 5లక్షల రూపాయల చొప్పున అమ్ముకున్నారు. గుట్టలను కొల్లగొట్టి ఎర్రమట్టిని ప్రైవేటు లేఅవుట్లకు విక్రయించడం ద్వారా లక్షల్లో దోచుకుంటున్నారు.

కమీషన్ల కక్కుర్తి: కర్నూలు జిల్లాలో ఒక మహిళా ప్రజాప్రతినిధి కుమారుడైతే ఇనుప ఖనిజం అక్రమ తవ్వకాల్లో ఆరితేరారు. రైల్వే గుత్తేదారుల్నీ వదలకుండా వసూళ్లు చేశారు. అడిగినంత ఇవ్వలేదని అక్కడ పనిచేసే కూలీలు, గుత్తేదారులపై దాడులు చేసి భయభ్రాంతులకు గురి చేశారు. యంత్రాలు ఎత్తుకెళ్లిపోయారు. పోలీసు కేసు నమోదు కావడంతో చేసేదేమీలేక తిరిగిచ్చేశారు. నీటిపారుదల శాఖ పరిధిలో పనులు చేసేందుకు పిలిచిన టెండర్లు రద్దు చేయించి తమకు అనుచరులకు ఇప్పించి కమీషన్లు దండుకున్నారు.

ఇక కర్నూలు జిల్లా ఎమ్మిగనూరు ప్రాంతంలో రియల్‌ ఎస్టేట్‌ వ్యాపారం చేయాలంటే ఒక ప్రజాప్రతినిధి, ఆయన సోదరుడి కుమారులకు ఎకరానికి రూ.6లక్షల చొప్పున కప్పం కట్టాల్సిందే. ఖాళీ స్థలాల్లో దుకాణాలు పెట్టాలంటే 3వేల రూపాయలు సమర్పించుకోవాల్సిందే! సోమేశ్వరకూడలి, అయ్యప్పస్వామి గుడి సమీపంలో 64 సెంట్ల విషయంలో పంచాయితీలు చేసి భారీగా దండుకున్నారు. గుండేకల్లు సమీపంలో సమ్మర్‌ స్టోరేజి ట్యాంకు కోసం సేకరించిన భూమిని తిరిగి రైతులకు ఇప్పించేందుకు ఎకరానికి పదిసెంట్ల చొప్పున కమీషన్‌ దండుకున్నారు.

దోపిడీకి మారుపేరు:శ్రీకాకుళం జిల్లాలో ఇద్దరు ప్రజాప్రతినిధుల కుమారులైతే దోపిడీకి మారుపేరయ్యారు. స్టోన్‌క్రషర్లు, ఇసుక ర్యాంపులన్నీ వారి కనుసన్నల్లోనే నడుస్తాయి. అన్న కుమారుడు 20 ఎకరాల ప్రభుత్వ భూమి ఆక్రమించి లేఅవుట్‌ వేస్తున్నారు. జగనన్న కాలనీ లేఅవుట్ల కోసం ప్రభుత్వ భూమిని కొందరు రైతుల పేర్లతో రాయించి వాటిని ప్రభుత్వానికి విక్రయించిన ఘనత ఆయనది. అందుకు రైతుల నుంచి పెద్దఎత్తున కమీషన్లు దండుకున్నారు. తమ్ముడి కుమారులేమో ఉద్యోగుల బదిలీలు, భూకబ్జాల్లో పండిపోయారు.