అసెంబ్లీకి వెళ్లే ధైర్యం లేదా?- జగన్ రాజీనామా చేయాలి : షర్మిల

వైఎస్సార్సీపీ ఎమ్మెల్యేలంతా అసెంబ్లీకి వెళ్లాలని కాంగ్రెస్ పక్షాన షర్మిల లేఖ - ప్రజలు జగన్‌ను ఎమ్మెల్యేగా గెలిపిస్తే అసెంబ్లీకి వెళ్లరా? అని ప్రశ్న

Sharmila Comments on MLA Jagan :పులివెందుల ఎమ్మెల్యే వైఎస్ జగన్ మోహన్ రెడ్డి (MLA Jagan Mohan Reddy) సహా వైఎస్సార్సీపీ ఎమ్మెల్యేలు అసెంబ్లీకి వెళ్లకపోవడాన్ని ఏపీ కాంగ్రెస్‌ అధ్యక్షురాలు అధ్యక్షురాలు వైఎస్ షర్మిల (YS Sharmila) మరోసారి తప్పుబట్టారు. అసెంబ్లీకి వెళ్లే ధైర్యం జగన్‌కు లేదా అని ప్రశ్నించిన షర్మిల అసెంబ్లీకి వెళ్లకుంటే రాజీనామా చేయాలని డిమాండ్ చేశారు. ప్రతిపక్ష హోదా ఇవ్వట్లేదు, మైకు ఇవ్వరని చెబుతూ మారాం చేయడం విడ్డూరంగా ఉందని ఎద్దేవా చేశారు. ఎమ్మెల్యేగా గెలిపిస్తే శాసనసభకు వెళ్లకుండా జగన్ ప్రజలకు వెన్నుపోటు పొడిచారని విమర్శించారు. వైఎస్సార్సీపీ ఎమ్మెల్యేలంతా అసెంబ్లీకి వెళ్లాలని కాంగ్రెస్ తరఫున లేఖ రాసినట్లు తెలిపారు. విజయవాడలో మీడియాతో వైఎస్‌ షర్మిల మాట్లాడారు.

జగన్‌కు ప్రతిపక్ష హోదా ఇవ్వకపోవడం ఆయన స్వయంకృతాపరాధమేనని ఏపీ కాంగ్రెస్‌ అధ్యక్షురాలు వైఎస్‌ షర్మిల అన్నారు. 151 స్థానాల్లో గెలిపిస్తే ప్రజలకు ఎన్నో మాయమాటలు చెప్పి ఆయన మోసం చేశారని ఆరోపించారు. వైఎస్సార్సీపీ హయాంలో జరిగిన అవినీతి, అక్రమాలను గమనించి ప్రజలు 11 సీట్లే ఇచ్చారని స్పష్టం చేశారు. ఆ కృతజ్ఞతైనా ఉండాలి కదా అని ప్రశ్నించారు.

ఎన్నికలకు వెళితే ప్రజలే బుద్ధి చెబుతారు :జగన్‌ అహంకారం, అజ్ఞానం బయటపడుతోందని వైఎస్ షర్మిల అన్నారు. అసెంబ్లీకి వెళ్లే ధైర్యం, సామర్థ్యం లేవా? దీనికి ఆయన సమాధానం చెప్పాలని డిమాండ్ చేశారు. వైఎస్సార్సీపీ ఎమ్మెల్యేలనూ ఇవే ప్రశ్నలు అడుతున్నామని అన్నారు. సభకు వెళ్లకపోవడమంటే ప్రజలకు వెన్నుపోటు పొడవడం కాదా? అని ప్రశ్నించారు. బడ్జెట్‌ ప్రవేశపెడితే వైఎస్సార్సీపీ సభ్యులు కనీసం హాజరు కాలేదని గుర్తు చేశారు. అసెంబ్లీకి వెళ్లకపోతే రాజీనామా చేయాలని డిమాండ్ చేశారు. అప్పుడు ఎన్నికలకు వెళితే ప్రజలే బుద్ధి చెబుతారని ఆమె అన్నారు.

ప్రజా వంచన బడ్జెట్‌ :రాష్ట్ర ప్రభుత్వం అసెంబ్లీలో ప్రవేశపెట్టిన బడ్జెట్‌లో స్పష్టత లేదని వైఎస్ షర్మిల అన్నారు. సూపర్‌ సిక్స్‌ పథకాల అమలుకు దాదాపు రూ.1.20లక్షల కోట్లు కావాలనే అంచనా ఉండగా కనీసం పావు వంతు కూడా కేటాయింపులు చేయలేదని ఆరోపించారు. ఇది ప్రజా వంచన బడ్జెట్‌గా కాంగ్రెస్‌ పార్టీ భావిస్తోందని తెలిపారు.

కోటి మంది మహిళలకు మహిళా శక్తి కింద నెలకు 1500 ఇస్తామని చెప్పారని, తీరా బడ్జెట్లో కేటాయింపులు లేవన్నారు. తల్లికి వందనం పేరుతో 80 లక్షల మంది బిడ్డలకు 12 వేల‌ కోట్లు ఖర్చు అయ్యే పథకానికి కేవలం 2వేల 400 కోట్ల రూపాయలే కేటాయించారని చెప్పారు. మహిళలకు ఉచిత బస్సు ప్రయాణానికి బడ్జెట్​లో‌ కేటాయింపులు లేవన్నారు. నిరుద్యోగ భృతి కింద 3,000 నెలకు ఇస్తామని చెప్పగా, ప్రస్తుతం కేటాయింపులు లేవని ఆరోపించారు. ఎన్నికలలో గెలవడానికి మాత్రమే చంద్రబాబు వాగ్దానం చేశారా అని షర్మిల ప్రశ్నించారు. వాటిని అమలు చేసి, ప్రజల కష్టం తీర్చే బాధ్యత ముఖ్యమంత్రికి లేదా అని ప్రశ్నించారు. ఇది ప్రజల బడ్జెట్ కాదని, ఓట్ల కోసమే వాగ్దానాలు చేశారని విమర్శించారు.